AMOS 2 - Kok Borok (Re-edited) Bible (BSI)

Moab

¹ Subraiyung hai hwnwi sa-o: “Moabni mungtham tei se mungbrwi sumsok khlaimani bagwi ang bórokno sa se sátoknai; tamni hwn ba bórok Idomni habugrani bekrengrokno thapla cha rwui sógwi pái kha.

² Hakhe ang ha Moabo hór rohorwi Keriotni nok kwrakrokno kham rwnai, tei sengkrakrokni chiri-mokororok bai, totro pungmani khorang bai tei chobani khorang bai Moab ma gaijanai;

³ ang bini habugrano butharwi páinai, tei bini tangphangroknobo buthar bainai,” hwnwi Subraiyung sa-o.

Juda

⁴ Subraiyung hai hwnwi sa-o: “Judani bororok mungtham tei mungbrwi sumsok khlaimani bagwi ang bórokno sa se sátoknai; tamni hwn ba bórok Subraiyungni kerongno sak nang li ya tei bini raidano tẃi lai li ya, tamo khe bórokni chuchusong tei tatal lama-o him tẃi khe himwi bórokbo lama koró bai kha.

⁵ Aboni bagwi ang Judani saka-o hór rohornai tei abo Jerusalemni nok kwrakrokno kham rw bainai.”

Israilrokno Kaitor buj thumma

⁶ Subraiyung hai hwnwi sa-o: “Israilni mungtham tei mungbrwi sumsok khlaimani bagwi ang bórokno sa se sátoknai; tamni hwn ba bórok rukphaini bagwi borok kahamrokno tei yaklap jorsani bagwi kwrwirokno phal kha,

⁷ bórok kwrwirokni bokhorokno hani hadlwino kádul tẃi khe kádul kha, tei bigrarokno lamani norwi rohor kha; bupha bai bwsa phasaknwi se bwrwi khoroksa bai uaijaui tong lai kha tei ani mung kwtharno hamya khlai kha;

⁸ bórok háyárokni gana-o, kwrwirokni aro namani rí saka-o khe roko lai kha; bórokni Kaitorni nogo, bórok bui rang ma tẃimani rang bai chuak paiwi tubumano nung lai-o.

⁹ “Amorsong sidar buphang hai kuchuk phano uk buphang hai kwrakma phano ang bórokno norokni bwskango sokomor kha; ang bini sakani bwtháino tei yaphangni yarwngno sokomor kha.

¹⁰ Ang norokno Amorsarokni hano norokno rwna bagwi ha Ijipni tikhlaiwi tubu kha tei hasing panthoro nokha bisi brwichi tẃither kha.

¹¹ O Israilni bororok, ang norokni bwsarokni bisingni baksa baksano diyari tei baksa baksano khe Najaritrok snamwi tisa kha. Abo kubui ya de?” hwnwi Subraiyung sa-o.

¹² “Tamo khe norok Najaritrokno chuak khan lai kha tei diyarirokno khe ‘Nwng kók diyari ta sakhlai di’ hwnwi dagi kha.

¹³ “Nai di, ang tabuk nono mai kupulung tẃijak malkhung khungsa bai phere rwui sinklwk rwma hai khe nono kepek rw sinai.

¹⁴ Doui khabrumwi mannairokbo sakno mwthangwi man glak, phan gwnangroknibo bórokni phan phunugui man glak, sengkrakrokbo bórokni langmano mwthangwi man glak;

¹⁵ badukhung koknairokbo jai khe bachaui man glak doui khárwi mannairokbo khárwi sakno mwthangwi man glak tei korai kanairok suda se sakni langmano mwthangwi narwgwi man glak;

¹⁶ tei sengkrakrokni bere bwkha kotor kuk sengkrak se a salo rí khibiui sak bukcha khe khár anw,” hwnwi Subraiyung sa-o.