AMOS 1 - Kok Borok (Re-edited) Bible (BSI)

¹ Tekoa-o tongnai mera mwrwknai Amosni kók, Ujia Judani habugra tei Joasni bwsla Jeroboam Israilni habugra cháui tongmani jora-o bangla phaimani nokha bisik nwini swkang Amos Israilno tẃiwi nukmani kók.

² Hakhe bo hai hwnwi sa kha: “Subraiyung Siyon hathái-o tongwi sokoromo tei Jerusalemni khorang khlai-o; sula khrangjak mwran saui thángo, tei Karmel hachuk rampra sa-o.”

Israilni ganani dopharokno Kaitor buj thummani Siriya:

³ Subraiyung hai hwnwi sa-o: “Damaskosni mungtham sumsokni bagwi, tei se mungbrwi sumsokni bagwi ang bono sa se sátoknai; tamni hwn ba bórok Giliadno sorni biching gwnang mai nakjaknai bai nak kha.

⁴ Aboni bagwino ang Hajaelni nogo hór rohornai, tei abo Benhadadni nok kwrakrokno kham rw bainai.

⁵ Ang Damaskosni kamiyung duglam berepjaknaino swbainai, tei Abenni harungo tong bainai bororokno tei Siriyani habugrani suar tẃi tongnaino norwi khibinai; Aramni bororok ha Kiro khaui tlangjaknai,” hwnwi Subraiyung sa-o.

Philistia

⁶ Subraiyung hai hwnwi sa-o, “Gajani mungtham sumsokni bagwi, tei se bini mungbrwi sumsokni bagwi ang bono sa se sátoknai; tamni hwn ba bórok bebak dophano khaui tlangwi Idomni thani yapharwi rwi kha.

⁷ Aboni bagwi ang Gajani chokdeualo hór rohornai tei a hór bini nok kwrakmarok bebakno kham rw bainai.

⁸ “Ang Asdodo tong bainai bororokno tei Askelonni habugra wngwi cháui tongnaino nornai; Ang Ekronni saka-o yak tisanai, tei bebak yógwi tong rwknai Philistiasarok komornai,” hwnwi Subraiyung Kaitor sa-o.

Taiyar

⁹ Subraiyung hai hwnwi sa-o: “Turni mungtham sumsokni bagwi, tei se bini mungbrwi sumsokni bagwi ang bórokno sa se sátoknai; tamni hwn ba bórok bebak dopharokno ha Idomni thani yapharwi rw kha tei takhuk hwnwi bayap khamani kókno muitu khlai li ya.

¹⁰ Aboni bagwi ang Turni chokdeual saka-o hór rohornai, hakhe abo bini bebak nok kwrakrokno kham rwnai.”

Idom

¹¹ Subraiyung hai hwnwi sa-o: “Idomni mungtham tei mungbrwi sumsok khlaimani bagwi ang bórokno sa se sátoknai; tamni hwn ba bo khairokma pogwi bini takhukno seng tẃiwi riphrik kha tei bini jolima nukjak phai máng tong kha, mol brúm brúm se tongwi tong si-o.

¹² Hakhe ang Temanni saka-o hór rohornai, abo Bosrani nok kwrakrokno kham rw bainai.”

Ammon

¹³ Subraiyung hai hwnwi sa o: “Ammonsarok mungtham tei mungbrwi sumsok khlaimani bagwi ang bórokno sa se sátoknai; tamni hwn ba bórok bórokni ha ari phuarna bagwi Giliado sakderiya bwrwirokni bohok pekhak rwui rw kha.

¹⁴ Aboni bagwi ang chobani salo chobani chiri-mokorokni bisingo, kirimasingcha bangkundri hai chobani bisingo Rabbani chokdeualo hór phnangwi rwnai, hakhe abo bini nok kwrakrokno kham rwui páinai;

¹⁵ aphuru khe bórokni habugra buini ha-o khaui tlangjaknai, bo bai baksa bini tangphangrokbo tlangjaknai’ hwnwi Subraiyung sa-o.”