2 TIMOTHI 3 - Kok Borok (Re-edited) Bible (BSI)

Mol páina phuruni kók

¹ Nwng o kókno si di. Mol páina phuru belai tong kesep wngnai.

² Bororok sakni kaham simi nainai, rangni bagwi khámainai, kók kotor sanai, kung chuknai. Bórok lachi rwnai, buma-buphani kók khna ya wngnai, hambai rw ya wngnai, Kaitorno suri ya wngnai.

³ Bórok khairok ya wngnai, maya chá ya wngnai, kók hamya sanai, bebago’-no yak láiwi thamchi kutung wngnai; borok kahamno naislernai;

⁴ bórok bandinai, yang yang uansuk yaui samung tangnai, kung chugui torsanai; bórok Kaitorno hamjak yaui tongthok cháthokno hamjak kuknai;

⁵ bórok chini dormoni tongmung tẃi’-no tongnai, hai phano aboni sói phanno khe nornai. Abo tẃi bororok bai ta tong di.

^6-7 Abo tẃirokni bere baksa nogo tháng thángwi bwrwi helengrokno yak kha-o, a bwrwirok sumsokni bagwi bokhorok hilikjak, bórok podrepot khe muchungwi tongo, bórok srwngna máng nai tongo tamo khe kubuino saui man phlai ya.

⁸ Jani bai Jambri Musino kebeng tẃi’-no o bororokbo abo hai khe’-no kubuino kebengo, o bororok wng kha bwkha sitra, bórok poito kwmajak.

⁹ Bórok kwbáng kuchugo kasaui man glak, tamni hwn ba Jani bai Jambri wngma hai bórok bwswk si ya abono joto’-no saui mano.

Kók páithak

^10-11 Ang phrwngmano nwng saui man kha, ani tongmungno nwng saui man kha, ang tamo muchung nwng saui man kha; ang poito khlaimanobo nwng nuk kha, ang khá lokmanobo nuk kha, ang hamjakmanobo nuk kha, ang soimanobo nuk kha, ang sátokjakmanobo nuk kha, ang tekto manmanobo nuk kha. Ang Antioko, Ikoni-o tei Lustra-o tamo wng kha nwng bebak’-no saui mano, nwng saui mano ang bwswk sátokjagwi soi kha. Hai phano Subrai ano abórok bebakni yakni phiyók kha.

¹² Khristo Jisu bai thansa wngwi Kaitorno suriui tongna nainairok bórok bebak’-no sátokjaknai;

¹³ borok hamyarok bai borok phatrarok hamya wng rwrwknai, bórok buinobo bandinai, bórokbo bui bai bandijaknai.

¹⁴ Nwng khe phrwngmarokno kwrak khe poito khlaimarokno tẃiwi tong di. Nono sabo phrwng nwng saui mano,

¹⁵ nwng chwrai phangsni simi Elembak Kwtharno si-o hwnwi saui mano. A Elembak Kwthar Khristo Jisuno poito khlaima bising tẃi mwthangjaknani kókno nono phrwngwi mano.

¹⁶ Elembakni bebak kókno Kaitor bai koboljagwi swimani; abo kubuino phrwng thani chúgo, tatalno tatal hwnwi phunuk thani chúgo, samung cha yano cha rw thani chúgo, phiya kaham khe tongnani phrwng thani chúgo;

¹⁷ abo tẃi khe Kaitorni borok chúk súgwi mano, joto samung kahamni bagwi bini nangmani manwi bebakno mano.