2 TIMOTHI 1 - Kok Borok (Re-edited) Bible (BSI)

¹ Ang Pol omono swihoro. Ang Kaitorni morji bai Khristo Jisuni chonghor; chwng Khristo Jisu bai thansa wngma bising tẃi mwthangjakna hwnmani kókno pírna bagwi ang rohorjago-

² Khájani sajla Timothino ang swihoro. Apha Kaitorni bai chini Subrai Khristo Jisu nono khairok thung, maya chá thung tei khá kwchang rw thung.

Khá rak rwmani kók

³ Ani chuchusong Kaitorno suri langma tẃi’-no ang khá sutrang khe bono hambai rw-o. Hor sal suri san brúm brúm ang nono muitu khlaiwi bono hambai rw-o.

⁴ Nwng kapmano ang muitu mano, hakhe ang tongthok sukna tẃi khe nwng bai malaina belai muchungwi tong kha.

⁵ Nwng kwrak khe poito khlaimano ang muitu mano, nini nwchwi Lois bai nwma Uniki abo hai khe poito khlaiwi tongo. Nwngbo abo haino poito khlai-o hwnwi ang khá ka-o.

⁶ Aboni bagwi ang nono muitu khlaiwi rwna nai-o, ang nini saka yak bera phuru Kaitor nono rwmani suarno samungo phnangwi ton di.

⁷ Tamni hwn ba Kaitor chwngno rwmani Phola abo chwngno bwkha kusu khlai ya, bini Phola chwngno belai khe’-no phan se rw-o, hamjak rw-o, phiya sak soiwi man rw-o.

⁸ Chini Subraini bagwi kók sana ta lachi di; phiya bini bagwi alongo tongnai ani bagwibo ta lachi di. Tamo khe Kaitor nono phan rwma tẃi Kothoma Kahamni bagwi se bui bai baksa sátokjak di.

⁹ Bo chwngno mwthangwi bini borok wngna bagwi ring kha, abo chini samung khlaima bai ya, bo khá chabwi khairokma bai se. O swngchar wng ya sini’-no bo chwngno Khristo Jisuni bising tẃi omo tẃi khe khairok kha,

¹⁰ tabuk khe bo chwngno khairokmani abo chini Mwthangnaisa Khristo Jisu phaima tẃi phunukjak kha. Butharnaini phanno bo swbai kha, phiya Kothoma Kahamni bising tẃi borok kwthang tong phlainani lamano phunuk kha.

¹¹ Kaitor ano Kothoma Kaham pírna bagwi chonghor bai phrwngnai khe chong kha,

¹² aboni bagwino ang omo hai sátokjago. Hai phano ang kisa phano khá bái ya, tamni hwn ba ang poito khlaimani a Kaitorno ang saui mano; hakhe ang saui man súgo a Sal phai ya sak bo ani yago yapharwi tonmano narwgwi tonwi mano.

¹³ Nwng a lama-o him di hwnwi ang phrwngmani kók kubuino romwi tong di, phiya chwng Khristo Jisu bai thansa wngma bising tẃi poito khlaiwi rwjakma hai poito khe tong di, hamjak rwjakma hai hamjagwi tong di.

¹⁴ Nini yago yapharmani manwi kahamrokno chini bisingo tongnai Phola Kwtharni phan bai narwgwi ton di.

¹⁵ Nwng saui mano Asia angkoro bebak’-no ano khibiui klang kha, Phugel bai Hermogenibo abo haino ano khibiui klang kha.

¹⁶ Kaitor Onisiporni núkhungno khairok thung, bo ano kwbángma’-no khá srang rw kha. Ano alongo tongo hwnwibo bo lachijak yaui,

¹⁷ Rumo sógwi khe’-no ano nuk ya sak biji-biji khe rutuk kha.

¹⁸ A Salo bo Subrai bai maya chájakna bagwi Subrai bono khairok thung. Episo bo ani bagwi bwswk samung khlai kha nwng kaham khe’-no abo saui mano.