2 SAMUEL 5 - Kok Borok (Re-edited) Bible (BSI)

Daud Israil bai Judani habugra chámani

¹ Bebak Israil bosongni bororok Hebrono Daudni thani phaiwi hai hwnwi sa phai kha, “Nai di chwng nini bahan-bwthẃi se.

² Agi-o Sol bugra cháui tong phurubo, nwng Israilrokno tẃidul kha Subraiyung nono hai hwnwi sa kha, ‘Nwng ani Israil bororokni mwrwknai tei nwng bórokni bubagra wngnai.’ ”

³ Hakhe Israilni bebak tẃiphangrok Hebron o habugrani thani phai lai kha. Tei bubagra Daud bórok bai Subraiyungni bwskango kók kha lai kha, aboni yagulo bórok Daudno Israilni habugra chá rw lai kha.

⁴ Daud habugra chá phuru bini umor nokha bisi thamchi wng kha, bo nokha bisi brwichi jora habugra chá lang kha.

⁵ Hebrono tongwi Judia-o nokha bisisni tei taldok, Jerusalemo tongwi Israil tei Juda-o nokha bisi thamchitham jora habugra chá lang kha.

⁶ Habugra bini bororok bai khe Jerusalemo a hani borok Jebussarokni aro tháng kha; aroni bororok bugra Daudno hai hwnwi sa lai kha, “Nwng oro habwi man glak, mokol nuk yarok tei yakung yak man yarokbo nono hap rw glak. Bórok Daudno habwi man glak hwnwi uansuk laimani.”

⁷ Tamo khe Daud Siyonni nok kwrakrokno segwi na kha, hakhe abono Daudni kamiyung hwnwi sijak kha.

⁸ A salo Daud hai hwnwi sa kha, “Jebussarokno swprakna thángnairok twisa bwkhak nongkhorwi thángwi Daudno naislernai mokol phularokno tei khorarokno swpragwi thung. Aboni bagwi omo hai kók sajagwi tongo, phularok, yakung man yarok nok bisingo habwi man glak.”

⁹ Daud kamiyung nok krago khe tong kha tei abono Daudni kamiyung hwnwi mung phar kha. Bo abono kitingwi kamiyungrok tang kha.

¹⁰ Daud phankrak wng rwrwk wng kha, tamni hwn ba Subraiyung Phan gwnang Kaitor bini logi-o tongo.

¹¹ Turni habugra Hiram Daudni thani bororok rohor kha, bo sidar buphangrok mistirirok, holongni samung tangnairokno Daudni noyung tangnani bagwi rohor kha.

¹² Tei Daud saui man kha Subraiyung bono Israilni habugra chá rwui, bini Israil bororokni bagwi bini hano hamcha rw kha.

¹³ Daud Hebronni Jerusalemo thángmani yagulo, bo kwbángma hikrok tei hik kotoirokno na phi kha, hakhe Daud teibo kwbángma chwla bwsarok tei bwrwi bwsarokno man phi kha.

¹⁴ Jerusalemo bini bwsa achai bainairok wng kha Samua, Sobab, Nathan, Solomon,

¹⁵ Ibar, Elisua, Nepheg, Japhia,

¹⁶ Elisama, Eliada tei Eliphelet.

Philistiasarokno mechenmani

¹⁷ Philistiasarok Daudno Israilni habugra chá kha hwnwi khna khe, bebak Philistiasarok, Daudno rutukna tháng lai kha. Daud abono khna khe kamiyungni nok krakma-o tháng kha.

¹⁸ Philistiasarok Rephaim harungo phaiwi pung phai kha.

¹⁹ Daud Subraiyungno, “Ang Philistiasarok bai choba khlainai de? Nwng bórokno ani yago yapharnai de?” hwnwi sẃngwi nai kha. Hakhe Subraiyung Daudno, “Nwng thángwi nang lai si di, ang bórokno sói’-no nini yago yapharnai,” hwnwi sa kha.

²⁰ Hakhe Daud Bal Perajimo thángwi bórokno aro mechenwi hai hwnwi sa kha, “Subraiyung ani arirokno twi kotor swbai tẃi khe mechen kha.” Aboni bagwi abono Bal Perajim hwnjago.

²¹ Philistiasarok bórokni takjak mwtairokno khibiui klang lai kha tei Daud bai bini bororok abórokno tlangwi tháng lai kha.

²² Hakhe Philistiasarok tei uáisa Rephaim harungo tháng kha tei Rephaim harungo kupulung wng lai phai kha.

²³ Daud tei uáisa Subraiyungno sẃngwi nai phi khe hai hwnwi sajak kha, “Nwng aro ta tháng gra di; bórokno uklok tẃi khe se kitingwi di tei balsam buphangrok tongma tẃi khe bórokno swpragwi di.

²⁴ Balsam buphang sakarogo sengkrakrok himmani sari khna khe nwng tiyar wngwi nongkhor si di, tamni hwn ba aphuru Philistiani sengkrakrokno sokomorna bagwi Subraiyung nini slái swkang thángsok kha.”

²⁵ Hakhe Subraiyung dagima hai’-no Daud khlai kha; Gibeonni simi Gejero sógwi ya sak Philistiasarokno buthar kha.