2 SAMUEL 24 - Kok Borok (Re-edited) Bible (BSI)

Daud borok lekhamani

¹ Subraiyung Israilrokno tei uáisa Jolijak kha, hakhe bo Daudno dagiui, “Tháng di, Israil bai Judani bororokno lekhaui di,” hwnwi sa kha.

² Hakhe Daud sengkrak bokhorok Joab bai tongnairokno hai hwnwi dagi kha, “Tháng di, ha gwnangwini bebak Israil bosongno, Danni simi Birseba jora bororokno lekhaui di, hakhe bwswk bororok tong ang saui mannai.”

³ Tamo khe Joab habugrano hai hwnwi sa kha, “Subraiyung nini Kaitor tabuk tongmani slái teibo kusungra jora báng rw thung, ani habugra mokol baithang abono nuk lang thung; hwn ba tamo wngwi habugra ba abo tẃi hai samung tangna muchung kha?”

⁴ Tamo khe habugra dagimano Joab tei bini tẃiphangrok ma khna kha; hakhe Joab tei kubun sengkrak bokhorokrok Israil bororokno lekhanani bagwi habugrani bwskangni tháng lai kha.

⁵ Bórok Jordan bár laiwi harung kwcharni simi cheng laiwi Gadni bwkhak tẃi khe Jajer jora.

⁶ Hakhe bórok Giliad tei Hitisarokni ha Kades jora sógwi kha tei Dan jora tháng lai kha tei Danni simi bórok Sidonno kitingwi sók phai kha,

⁷ hakhe bórok Turni nok kwrakma-o tei Hibisa bai Kanansarokni kamiyungrogo tei páithago khe Negebni simi Judiani Birseba-o tháng lai kha.

⁸ Hakhe bórok bebak ha gwnangwi thángwi páithago nokha talchuku tei salnwi chini salo Jerusalemo sók phai lai kha.

⁹ Hakhe Joab habugrani thani choba nang lai mannai Israilo khorok 800,000 tei Juda-o khorok 500,000 choba bachaui mannai bororok tongo.

¹⁰ Tamo khe Daud bororokno lekha bai khe bini bwkha thwijak kha; Daud Subraiyungno hai hwnwi sa kha, “Ang abo hai samung tangwi sumsok kotorma khlai kha. Hai phano Subraiyung ano nakar ja si di. Ang khá si ya wngwi belai butuani samung khlaijak kha.”

¹¹ Teini phungo Daud phung aiwi bacha khe, Daudni, diyari Gadni thani kók diyari sajak kha.

¹² Daudno thángwi, “Subraiyung nini bwskango podtham yapharo, nwng chongwi namani hai’-no ang khlai manna tẃi nwng podsano saiwi na di,” hwnwi sa kha.

¹³ Hakhe Gad Daudni thani phaiwi hai hwnwi sẃng phai kha, “Nini ha-o nokha bisik tham asari da nangno eba taltham jora riphrikjagwi da khárwi tongnai eba saltham jora nini ha-o bok de nangjak rwnai? Tabuk uansugwi chong di, ano rwui rohornaino ang tamo sauinai ano saui rohor di.”

¹⁴ Hakhe Daud Gadno hai hwnwi sa kha, “Ang belai ayuk-muyuk nang kha, Subraiyungni yago klaimani se, ham kugo tamni hwn ba bo khairokma kupulung; hai phano borokni yago le ta klai thung.”

¹⁵ Hakhe Subraiyung, Israilrokni ha-o phungni simi chongjakmani jora bok manjak rw kha. Danni simi Birseba jora khorok 70,000 bororok thwi bai kha.

¹⁶ Subraiyungni suari Jerusalemno sokomorna bagwi yak pholok khe, Subraiyung bini bwkha sláiwi bororokno sokomorwi tongnai suarino, “Wng kha, nini yak thak si di!” hwnwi sa kha. Suari aphuru Jebussa Arauna mai nakma khola-o tongo.

¹⁷ Hakhe Daud bororokno butharnai suarino nuk khe Subraiyungno hai hwnwi sa kha, “Nai di, ang sumsok khlai kha, ang se samung cha ya khlainai; bórok tamo khlai kha ba? Nwng ang bai ani núkhungno simi se sátok di.”

¹⁸ A salo’-no Gad Daudni thani phaiwi, “Jebussarokni Araunani mai nakma jidolo thángwi Subraiyungni bagwi háyá kaisa snamwi di,” hwnwi sa phai kha.

¹⁹ Hakhe Subraiyung dagima hai’-no Gadni kók khnaui toksaui tháng kha.

²⁰ Tei Arauna naikhlai naiwi nuk kha, bo habugra bai bini selengrokno bini thani phai lai tongma nuhur kha; hakhe Arauna nongkhorwi tháng kha tei habugrano ha-o klaiwi khulum kha.

²¹ Arauna hai hwnwi sa kha, “Habugra, ani bugra tamni bini selengni thani phai?” Daud hai hwnwi sa kha, “Nini mai nakma jagano paiwi bororokni aroni bok nangma norjakna bagwi aro Subraiyungni háyá snamnai.”

²² Hakhe Arauna Daudno hai hwnwi sa kha, “Ani bugra, habugra na di, nini muchung tẃi, iko oro, sógwi yapharna bagwi musukrokbo tongo tei bolni bagwi abórokni horbakrok tei bailing bo tongo.

²³ O bugra, Arauna omorok bebak’-no habugrano rwui rw kha.” Hakhe Arauna bono hai hwnwi sa phi kha, “Subraiyung nini Kaitor nono yachak thung.”

²⁴ Tamo khe habugra Araunano hai hwnwi sa kha, “I’nhi, ang rang bai se paiwi nanai; ani Subraiyungno Kaitorni thani ang ahai’-no mungsa yaphar glak.” Hakhe Daud mai nakma ha bai musuk beresrok rukphai belep lep bachi bai paiwi na kha.

²⁵ Daud aro Subraiyungni bagwi háyá kaisa snam kha tei sógwi yapharmung bai khakchang yapharmung yaphar kha. Hakhe Subraiyung bini hani bagwi koiwi surimano khna kha tei Israil hani bokrok kwmaui tháng bai kha.