2 SAMUEL 22 - Kok Borok (Re-edited) Bible (BSI)

Daud kwplai wngwi rwchapmani

¹ Subraiyung Daudno, Sol tei bini bebak arirokni yakni phiyókma salo, Daud Subraiyungni thani omo hai khe lobwi rwchap kha.

² Bo hai hwnwi sa kha, “Subraiyung ani holong, ano kati rwnai, tei ano phiyóknai.”

³ Ani Kaitor ani holong, bini thani se ang bokhorok bomo bo ani phui tei bo ano mwthangnai, ano nok kwrak, ani katimung, ani mwthangnai; ano jolimungni phiyógo.

⁴ Ang Subraiyungno ringnai bo se lobjaknani chúgo, tei ang ani arirokni yakni yók kha.

⁵ “Thwinani aphal ano kiting kha, tei komornani-o kochogwi tongmani.

⁶ Tei morkeni buduk bai kwswngjak tongmani, tei thwinani khẃini bwskango tongmani.

⁷ “Ani tekto phuru ang ani Subraiyungno ring kha, ani Kaitorno ring kha, bini nok kwtharo tongwi bo ani khorang khna kha. Ani kapma bini khunju-o sógwi kha.

⁸ “Hakhe ha tei holong kwlwiwi lilak kha; nokhani thonglabo kwlwi kha, tamni hwn ba bo jolijak kha!

⁹ Bini bukungni hoku nongkhor kha, khampranai hór tei hórjlai bini búkhúkni nongkhor kha; bini aroni hokhi bothrai nongkhor kha.

¹⁰ Bo nokhano kong rwui nongkhorwi phai kha, mwnakma bini yakung yaphango.

¹¹ Bo cherubni saka-o kasa kha. Bo nokbarni bwkrango khe nukjak kha.

¹² Bo sakno mwnak bai kholop kha, chumui rwjama, twi bai kupulung bono kiting kha.

¹³ Kwchẃngma bini bwskangni khampranai hórjlai nongkhor kha.

¹⁴ Hakhe Subraiyung chukhani phirang bai kok hor kha, tei kwplai kukni khorang bai sa kha.

¹⁵ Bo chakhla kok horwi bórokno oroi-poroi khlai kha; nokha philik rwui bórokno uphla-káphla khlai kha.

¹⁶ Subraiyung damrokmani bai, bini bukungni hama nongkhormani bai twijlangni twimukrok nukjak kha, tei hayungni thonglarok bukcha wng kha.

¹⁷ “Bo kuchukni yak pholok horwi, ano twi kwbángmani khocha kha.

¹⁸ Bo phan gwnang arirokni yakni ano phiyók kha; ano naislernairokni yakni phiyók kha, bórok ani slái phan gwnang kuk gwja.

¹⁹ Ani digi-sigini salo bórok ani thani phai-o, phiya ba Subraiyung ani tongthai wng kha.

²⁰ Bo ano haphar kuar o tubu kha, bo ano hamjagwi phiyók kha.

²¹ “Ang bujsói tẃima bai, bo ano sokat rw kha; ani yak kwtharni bagwi ano su-ui rw kha.

²² Tamni hwn ba ang Subraiyungni lamarokno tẃi tong kha, ani Kaitor bai cha ya khlaiwi kagwi tháng li ya.

²³ Tamni hwn ba bebak bini dagimarok, ani bwskango, tei bini dagimungrokno ang khibi li ya.

²⁴ Bini thani ani mungsa majra kwrwi, sakno ang hamya bai kwchal khe ton kha.

²⁵ Aboni bagwi Subraiyung ani sói samungni bagwi su-ui rw kha, bini mokolo ani srai-sraino nugwi.

²⁶ “Kók khnanai bai khe nwng kók narwgo, majra kwrwirok bai khe nwng majra kwrwi wngo.

²⁷ Kwthar bororok bai khe nwng kwthar khe tongo, cha ya bororok bai khe nwng cha ya khe’-no khlai-o;

²⁸ nwng koinene bororokno khe phiyógo; tei thamchi kutungrokno khiklaina bagwi mokol kaijak.

²⁹ O Subraiyung nwngno ani chati; ani Kaitor, ani mwnakmano chẃng rw kha.

³⁰ Nwng bai khe ang arirokno sukhrubwi mano, tei ani Kaitor bai chokdeualno bárwi mano.

³¹ O Kaitorni lama wng kha sói; Subraiyungni swmaino kubui hwnwi phunugo. Bini thani katina bagwi phainai bebakni bagwi bono phui.

³² “Sabo Kaitor tei sabo Subraiyung? Chini Kaitorno karwi tei sabo se holong?

³³ O Kaitor se Ani katithai kwrak, tei ani lamano kirina kwrwi khlai-o.

³⁴ Bo ani yaprino mwswini yapri hai khlai-o. Tei hathái kuchugo bo ano kwcha rwui tono.

³⁵ Bo ani yakno choba phrwngo, hakhe ani yak bai pitolni badukhungno thonwi mano.

³⁶ Nini mwthangmani phuino ano rw kha, nini chubamung ano kotor snam kha.

³⁷ Nwng ano yapri berana bagwi haphar kuar rwui tongo, tei ani yapri kásle li ya,

³⁸ Ang ani arirokno riphrigwi mechen kha, bórok komor ya sak ang kiphil li ya.

³⁹ Ang bórokno tanthar kha, suthar kha, bórok bachaui man li ya. Bórok ani yakung yaphango ma klai kha.

⁴⁰ Nwng ano chango rí kha rwui chobani bagwi phan rw kha, tei ani arirokno ani yapha-o yaphar kha.

⁴¹ Nwng ani arirokno uphil rwui khár rwui rohor kha, ano naislernairokno ang sokomor kha.

⁴² Bórok nai phano, khoroksa phano mwthangnai kwrwi kha; bórok Subraiyungno ring phano, bo khna li ya.

⁴³ Ang bórokno hadlwino swprak tẃi khe swprak kha. Ang bórokno laharni harpekno kádul tẃi khe kádul kha.

⁴⁴ “Nwng ano kebengnai bororokni yakni phiyók kha; nwng ano dopharokni bokhorok snam kha, sini ya bororok ano ma mon kha.

⁴⁵ Buini hani bororok ani bwskango phaiwi ani thani ma bom phainai, bórok ani khorang khna khe’-no ani kókno ma khnanai.

⁴⁶ Buini hani bororok bwkha thwijak bai kha, tei kwlwi twtwi bórokni huijak tongmani aroni nongkhorwi ma phai bainai.

⁴⁷ “Subraiyung kwthang tongo; tei ani holongthai hamchajak; tei ano mwthangnai holong, ani Kaitor lobjak thung,

⁴⁸ Kaitor ani arirokno yagul sunaisa, tei bororokno ani yakung yaphango bom rwnaisa,

⁴⁹ bo se ano ani arirokni yakni phiyógo; nwng’-no ano ani arirokni slái kuchugo tisa kha, nwng’-no ano thamchi kutung bororokni yakni phiyógo.

⁵⁰ “Aboni bagwi O Subraiyung ang nono dopharokni bisingo lobnai. Tei nini mungno lobwi rwchapnai.

⁵¹ Kaitor kotor bini habugrano kwplai khlaiwi, tei bini chongjakno, Daud tei bini bosongrokno kusung kusungni bagwi hamjakmung phunugo.”