2 SAMUEL 19 - Kok Borok (Re-edited) Bible (BSI)

Joab Daudno bermani

¹ Nai di, habugra, Absalomni bagwi dukhu nangwi kabwi tongo hwnwi Joabno sajak kha.

² Hakhe a kwplai wngmani sal khe abo bebak bororokni bagwi kap laimani sal se wng si-o; tamni hwn ba a salo bebak bororok khna kha habugra bini bwslani bagwi kabwi tong kha.

³ Sengkrakrok lachima manẃi chobani khár laimani hai bórok kamiyungo siring siring khe hap lai kha.

⁴ Habugra bini mwkhang kholobwi khorang kotor khe, “O ani sajla Absalom ani sajla, ani sajla!” hwnwi kap kha.

⁵ Hakhe Joab habugrani nogo phaiwi bono hai hwnwi sa phai kha, “Tini nwng nini selengrokno nini langma mwthangnai tei nini bwsa bwtwirokno, nini hiksongno tei hik kotoirokno mwthangnairokno lachima rw kha,

⁶ tamni hwn ba nwng nono naislernairokno khe hamjago tei nono hamjaknairokno khe naislero. Tini nwng srai-srai khe phunuk kha, nini tẃiphangrok bai selengrok khe mungsa buya. Ang saui man kha, tini Absalom kwthang tongwi chwng joto thwi bai khe nwng tongthokjak kha mun.”

⁷ Tabuk bachaui nini selengrokno thángwi hai hwnwi saui ja di, “Ang Subraiyungni mung bai swmai tangwi sa-o, nwng tháng ya hwn khe, tini horo nwng bai khoroksa phano tong glak, hakhe abo nini saka-o belai kirimasingcha wngnai abo nwng chwrai phuruni simi tabuk jora abo hai manjak ya kho.”

⁸ Hakhe habugra bachaui thángwi duglam gana-o achugwi kha. Bini bororok bono aro hwnwi sajak khe bebak bororok bini thani kuthumui phai lai kha. Tabuk bebak Israilrok sak sakni nogo khárwi tháng bai kha.

Daud Jerusalemo kiphilmani

⁹ Tei bebak Israil dopharok ha gwnangwi kók báng laiwi hai hwnwi sa lai kha, “Habugra chwngno chini arirokni yakni phiyók kha tei Philistiasarokni yaknibo phiyók kha, hwn ba tabuk bo Absalomni yago khe sakni ha khibiui ma khár kha.”

¹⁰ Tamo khe chwng Absalomno chini habugra chongmani se, bo choba-o butharjak kha. Hakhe tamo wngwi khoroksa phano habugrano kiphilwi tubunani sakthar lai ya ba?

¹¹ Hakhe habugra Sadok bai ochai Abiatharno Judani okra-chakrarokno habugrano bini noyungo kiphilwi tubunani bagwi tamni norok ba buini slái ler kha ba, hwnwi sanani rohor kha.

¹² Norok ani jaitirok ani bahan tei bwthẃi. Hakhe habugrano kiphilwi tubunaniba tamni aswk ma ler lang?

¹³ Tei Amasanobo hai hwnwi saui di, “Nwngbo ani bahan bwthẃi ya diba! Tumungno nwng Joabni sak slái-o ani sengkrakrokni bokhorok wng ya khe, Kaitor ano majra rw thung tei aboni slái bára phano khlai thung.”

¹⁴ Hakhe bo bebak Judani bororokni bwkhano man bai kha, hakhe bórok habugrano bini selengrok bai kiphilwi phai-o hwnwi sa hor kha.

¹⁵ Hakhe habugra kiphilwi phaimani Jordan jora sók phai khe, hakhe Judani bororok habugra bai malainani bagwi tei Jordan twima naro tubunani bagwi Gilgalo phai lai kha.

¹⁶ Hakhe Benjaminsa Bahurimo tongnai Gerani bwsla Simei habugra Daud bai malainani bagwi Jordano doui phai kha.

¹⁷ Bini logi-o Benjaminni bororok khorok 1,000 tongo. Solni nokni seleng Seba bini khorok 15 bwslasong tei khorok 20 selengrok bai khe habugra bai malainani bagwi Jordano phai lai kha.

¹⁸ Tei bórok habugrani núkhungni bororokno tubunani bagwi tei habugrano bwkha ham rwnani bagwi Jordan twima-o phai lai kha. Habugra Jordan barnani naiwi tong phuru khe Gerani bwsla Simei bini bwskango klaiwi khulum kha,

Daud Simeino khairokmani

¹⁹ hakhe habugrano hai hwnwi sa kha “O ani bugra, habugra, nwng Jerusalem yakar phuru nini seleng cha ya khlaimano nakar ja si di. Abono tei muitu ta khlai si di tei habugra bwkha ta tẃi ja si di.

²⁰ Tamni hwn khe ang nini seleng sumsok khlai kha hwnwi saui man kha, abo baino ang Josep bosongrokni bisingo buini slái swkang ani bugra habugra bai malainani bagwi tini phai kha.”

²¹ Jeriani bwsla Abisai hai hwnwi sa kha, “Omoni bagwi Simei butharjakna nang glak diba? Tamni hwn ba bo Subraiyung chongmani habugrano swrai kha.”

²² Tamo khe Daud hai hwnwi sa kha, “Jeruiani bwsarok ang norokno tamo khlainai, norok ani bagwi ari ma wng kha ba? Tini Israilo khoroksa phano de butharjak kha mun ba? Tamni hwn khe tabuk ang Israilni habugra wngmano saui man ya diba?”

²³ Hakhe habugra Simeino, “Nwng thwi glak,” hwnwi sa kha. Habugra bono kók rw kha.

Daud Mephibosetno khairokmani

²⁴ Solni bwsla Mephiboset, habugra bai malainani nongkhorwi phai kha. Bo habugra nongkhorwi tháng phuruni simi kaham kwrwng khe kiphilwi phai ya sak jora bo yaklap ká li ya, khochaibo ra li ya tei rírokbo su li ya.

²⁵ Tei bo habugra bai malainani bagwi Jerusalemni phai phuru, habugra bono hai hwnwi sa kha, “Mephiboset nwng tamni ang bai baksa tháng ya wng?”

²⁶ Bo hai hwnwi sa kha, “Ani bugra, O habugra, ani seleng ano bandi kha; tamni hwn khe nini seleng bono hai hwnwi sa kha, ‘Ang kasaui nwng bai baksa thángna bagwi koraichirka masa tiyar khlai di, tamni hwn khe nini seleng le khora.’

²⁷ Bo ani bugra habugrani thani ani mungno hamya khlai kha, phiya ba ani bugra habugra le Kaitorni suari hai se; hai phano nwng tamono kaham hwnwi chong abono’-no khlai si di.

²⁸ Tamni hwn khe ani aphani núkhungni bebak bororok butharjakna se tongmani, phiya ba nwng nini selengno nwng bai pal khe chánairok bai khe baksa khe chámung chánani rw kha, ang habugrani thani kapnanino karwi tei tamo tong si?”

²⁹ Tei habugra bono, “Tei tamo nwng nini kókrokno saui tong si? Ang khá-o chong kha, nwng bai ha Sebano banta khlai na lai di,” hwnwi sa kha.

³⁰ Hakhe Mephiboset habugrano hai hwnwi sa kha, “Ani bugra, habugra kaham kwrwng khe nogo sók phai phi kha ba, bono bebak na bai si thung.”

Daud Barjilaino khairokmani

³¹ Tabuk Giliadsa Barjilai Rogelimni nongkhorwi phai kha tei bo habugra bai baksano Jordan jora tunsana bagwi tháng kha.

³² Barjilai belai chakra wng kha, bo nokha bisi charchi wng kha. Bo habugrano Mahanaim o tong phuru bono chámungrok rw kha. Tamni hwn khe bo belai’-no gwnang.

³³ Habugra Barjilaino hai hwnwi sa kha, “Nwng ang bai Jerusalemo phai di, ang nono ani oro ang bai tonnai.”

³⁴ Tamo khe Barjilai habugrano, “Ang ba tei bwswk kwthang tong sinai, habugra bai tongna bagwi Jerusalemo thángna nang?” hwnwi sa kha.

³⁵ Ang nokha bisi charchi wng kha, nini seleng bubo kaham bubo hamya saui da man ba, nini o seleng bo nungmarok tei chámarokno kothok thok ya saui se man li ya, ang chwlarok tei bwrwirok rwchapmani khorang da khna kho ba, tamni bagwi nini o seleng ani bugra habugrani bagwi poja boksinai.

³⁶ Nini o seleng Jordan láiwi kisa simi habugra bai thángnai. Hakhe habugra tamni bagwi omo tẃi sokatrok rwui ano suna nangnai?

³⁷ Ang koi ja-o, nini o selengno ani sakni kamiyungo thángwi thwi manna bagwi tei ani apha bai amani mangkhorni samo phobjagwi manna tẃi khe kiphilwi rohor ja di. Iko oro nini seleng Chimham; Chimhamno se habugra bai baksa rohor di. Tei nini chajakmani hai’-no bono khlai ja si di.

³⁸ Hakhe Habugra hai hwnwi sa kha, “Chimham ang bai baksa khe thángnai tei nwng kaham hwnwi uansukma haino ang bono khlainai tei nwng nini bagwi ano khlai rwna muchungma tẃi’-no nini bagwi khlainai.”

³⁹ Hakhe bebak bororok Jordan bár laiwi tháng kha tei habugrabo twi bárwi tháng kha. Tei habugra Barjilaino motom su-ui hamari rw kha, hakhe bo sakni nogo kiphilwi tháng kha.

Habugrano tẃiwi Juda bai Israil kók báng laimani

⁴⁰ Habugra Gilgalo tháng kha tei Chinhambo bo bai baksa tháng kha; bebak Judani bororok tei Israilni khaksa bororok habugrano tubu lai kha.

⁴¹ Aphuru khe bebak Israilni bororok habugrani thani phai lai kha tei habugrano hai hwnwi sa kha, “Tamni chini takhukrok, Judiani bororok nono tei nini núkhungno Jordan bárwi khogwi tubu lang tei Daudni bebak bororokno pal khe tlang phi lang?”

⁴² Hakhe bebak Judani bororok Israil bororokno, “Tamni hwn ba habugra chini jaiti borok. Tamni norok omono jolijak lai. Chwng da habugrani rang swbai ba? Eba bo chwngno mungsa swk hilirok da rw kha ba?” hwnwi sa kha.

⁴³ Phiya ba Israilni bororok Judani bororokno hai hwnwi sa kha, “Chwng habugrani thani banta kaichi manthai tongo tei Daudni thani bo norokni slái manthai báng kugo. Tamni norok chwngno sak nang ya ma wng? Chwng se swkang chini habugrano kiphilwi tubunani bagwi kók sa lainairok ya da?” Tamo khe Judarokni kók Israil bororokni kók se rak kugo.