2 SAMUEL 18 - Kok Borok (Re-edited) Bible (BSI)

Absalom mechenwi butharjakmani

¹ Hakhe Daud bororokni thumwi khoroksa khoroksano khorok saini tei khorok ra-ni sengkrak bokhorok snamwi rw kha.

² Tei Daud khakthamni khaksa sengkrakrokno Joab bai rohor kha tei khak thamni bodol khaksano khe Joabni takhuk Jeriani bwsla Abisai bai rohor kha tei khakthamni khaksano khe Gitisa Itai bai rohor kha; hakhe habugra bórokno, “Ang sakphangbo norok bai baksa thángnai,” hwnwi sa kha.

³ Tamo khe bororok hai hwnwi sa kha, “Nwng phataro ta nongkhor di, tumungno chwng khár khe, bórok chwngno sak nang glak, chini bisingo khaksa thwi phano chwngno samung nangjak glak, phiya nwng saichungno chini khorok 1,000 bai baksa. Aboni bagwi nwng chwngno kamiyungni chubachu rohor khe se ham kugo.”

⁴ Habugra bórokno sa kha, norok kaham hwnwi chajakma tẃi’-no ang khlainai. Hakhe habugra duglam kotorni khaksa-o khe bacha kha, aphuru khe bebak sengkrakrok bwtang khe khorok 100 tei khorok 1,000 khe himwi tháng lai kha.

⁵ Hakhe habugra, Joabno, Abisaino tei Itaino dagi kha, ani wngwi norok sikla Absalomno kwchang kwchang khe nai di. Tei bebak sengkrak bokhorokrokno habugra, Absalomno tẃi dagimano bebak bororok khna bai kha.

⁶ Hakhe sengkrakrok Israilrokno kebengwi hapharo tháng lai kha; tei Iphraimni bolongo khe choba nang lai kha.

⁷ Hakhe Israilni bororok aro Daudni selengrok bai mechenjak bai kha. A salo borok kwbángma butharjak bai kha, abo khorok nwichisai ká-o.

⁸ Hakhe ha gwnangwi’-no choba koproi kha, a salo bororok seng bai thwimani slái bolongo se thwi kuk si-o.

⁹ Hakhe Absalom achomsa Daudni bororok bai daksa khe malai kha, bo aphuru bini korai-o kasaui thángmani jora, a korai uk buphangrokni bolong kuphung tẃi tháng phuru khe bini bokhorok bedek kesebo kwchaui lolalai wngwi tong kha, aphuru bini korai khe bono klangwi khibiui tháng kha.

¹⁰ Borok khoroksa abono nuk khe Joabno hai hwnwi saui kha, “Nai di ang Absalomno uk buphango khachijagwi tongma nuk kha.”

¹¹ Joab bono sanai a borokno hai hwnwi sa kha, “Nwng bono bahai khe nuk kha ba! Nwng tamo bono arono ha-o khiklai buthar ya wng? Ang nono rukphai belep lep chi tei bwchango khajaknai rw kha mun.”

¹² Tamo khe a borok Joabno hai hwnwi sa kha, “Nwng ano rukphai belep 1,000 rw phano se ang habugrani bwslani saka-o yak tisa glak, tamni hwn ba ani bagwi Absalomno norok mungsa hamya ta khlai di hwnwi habugra nono Abisai tei Itaino samani kókno chwng khna kha.

¹³ Tumungno ang abo hai poito swbai samung khlai khe habugra si yaui tong glak kha mun, hakhe nwng baithang’-no ang bai kwchal khe bacha kha mun.”

¹⁴ Joab hai hwnwi sa kha, “Ang nwng bai dwgwi tongwi man glak.” Bo olonga kong tham tlangwi, Absalomni khaklabo yórwi rw kha, bo aphuru buphango kwthang’-no tong kho.

¹⁵ Tei Joabni khorok chi sengkrakrok Absalomno kitingwi buthar lai kha.

¹⁶ Hakhe Joab totro kotor tam khe, sengkrakrok Israilrokno riphrikmani kiphilwi phai bai kha, tamni hwn ba Joab bórokno kasu kha.

¹⁷ Bórok Absalomni mangno tlangwi bolong bisingni hakhor kuthukma-o khibiui rw kha tei bini saka-o holong kotorma kholobwi rw lai kha. Hakhe bebak Israilrok sak sakni nogo khárwi tháng bai kha.

¹⁸ Tabuk Absalom kwthang tong phuru-o habugrani harungo bini sakni mungni bagwi thongla kotorma snam kha, tamni hwn ba bini mung narwkna bagwi bwsla khoroksa phano kwrwi, o thonglano bini mung tẃi khe phar kha, tabuk jora abono Absalomni mukumu hwnjago.

Absalom thwima kók Daud sajak kha

¹⁹ Hakhe Sadokni bwsla Ahimaj, “Ang khachigwi thángwi, Subraiyung bini arirokni yakni phiyókma tongthok kóktmano habugrano saui anw,” hwnwi sa kha.

²⁰ Tei Joab bono hai hwnwi sa kha, “I’nhi, nwng tini tongthok kóktmano saui glak tei kubunni salrogo tongthok kóktmano nwng saui phano tini le ma saui glak, tamni hwn ba habugrani bwsla se thwi kha.”

²¹ Hakhe Joab Kuso tongnaino hai hwnwi sa kha, “Nwng nukmano habugrano thángwi saui di.” Kussa Joabno khulumui thángwi pái kha.

²² Hakhe Sadokni bwsla Ahimaj, Joabno hai hwnwi sa phi kha, “Mungsa swk phano wng thung angbo kóktma saui anw.” Joab hai hwnwi sa kha, “Angsla, kóktma kahamni bagwi mungsa se hili manna kwrwi, nwng Kussano rwktharwi tháng sinai?”

²³ Ahimaj, “Mungsa swk phano wng thung ang thángnai,” hwnwi sa kha. Hakhe bo, “Tháng di,” hwnwi sa kha. Hakhe Ahimaj harung tẃi tháng kha tei dakti’-no Kussano slap kha.

²⁴ Tabuk Daud khe kamiyungni duglam kainwini kwcharo achugwi tongmani; mwrwknai borok chokdeual saka-o kasaui núkhúng saka-o bachaui kha tei aro tongwi naharwi bo nuhur kha khoroksa borokno saichung khachigwi phaima nuk hor kha.

²⁵ Hakhe a mwrwknaisa habugrano ringwi hai hwnwi sa kha, “Tei habugra sa kha, bo saichung susuk hwn khe, kóktma kaham sanani se phai-o.” Tei bo gana-o phai rwrwk wng kha.

²⁶ Hakhe mwrwknaisa tei khoroksa borokno khárwi phaima nuk hor phi kha; bo duglam mwrwknaino ringwi hai hwnwi sa kha, “Nai di tei khoroksa borok khachigwi phai tongo!” Habugra, “Bo’-bo kóktma kahamno tubu-ui phai-o,” hwnwi sa kha.

²⁷ Tei mwrwknaisa hai hwnwi sa kha, “Ang swkangni a borokno Sadokni bwsla Ahimaj khachikmano se soljago.” Hakhe habugra sa kha, “Bo borok kaham se tei bo kóktma kaham se tubu-o.”

²⁸ Hakhe Ahimaj habugrano chirigwi hai hwnwi sa kha, “Bebakno kaham máng!” Bo habugrano ha-o klaiwi khulumui hai hwnwi sa kha, “Nini Subraiyung Kaitor hamchajak, tamni hwn ba bo nono yak tisanai arirokni yakni ani bugra, habugrano phiyók kha.”

²⁹ Hakhe habugra, “Sikla Absalom le kaham kwrwng de tong?” hwnwi sẃng kha. Ahimaj hai hwnwi sa kha, “Nini seleng Joab ano rohor khe ang urumuru khe nuk kha phiya ba tamni bagwi wng kha ang mungsa saui man li ya.”

³⁰ Habugra hai hwnwi sa kha, “Uphilwi bachaui tongwi di.” Hakhe kisa kutulwi aro bachaui tong kha.

³¹ Nai di, hakhe Kussa phai kha tei hai hwnwi sa kha, “Habugrano sa phai kha ani bugra, habugrani bagwi kóktma kaham! Tamni hwn ba Subraiyung tini nono bebak nono kebengwi bachanairokni yakni phiyók kha.”

³² Hakhe habugra Kussano hai hwnwi sa kha, “Sikla Absalom le kaham kwrwng de tong?” Hakhe Kussa hai hwnwi sa kha, “Ani bugra, habugrani arirok tei nono hamya khlaina bagwi kebengnairok a sikla wngma tẃi’-no wng thung.”

³³ Tei habugrani bwkha-o belai khe nangjak kha, hakhe sakani khotolo duglam gana-o thángwi kap kha, bo tháng twtwi kabwi hai hwnwi sa kha, “O ani sajla Absalom, ani sajla! O ani sajla Absalom, nini sak slái-o ang thwi khe ham kuk kha mun!”