2 SAMUEL 17 - Kok Borok (Re-edited) Bible (BSI)

Husai Absalomno lama koró rwmani

¹ Teibo Ahithophel Absalomno, “Borok khorok nwichinwisai ang saiwi naui tini horo’-no ang Daudno riphrik anw,” hwnwi sa kha.

² Ang, bo lengwi bwkha báiwi kirijagwi tong phuru bono choproknai nai, hakhe bo belai kirijaknai tei bini bororok bebak khárwi ma tháng anw, aphuru khe ang habugrano simi’-no butharnai.

³ Hakhe hamjwk kwtal bwsaini thani kiphilmani hai khe bebak bini bororokno nini thani kiphil rwui tubunai, nwng khoroksano simi se butharna nai-o tei bororok khe yók bainai.

⁴ Tei abo hai kókbitino Absalom tei bebak Israilni okra-chakrarok chajak bai kha.

⁵ Hakhe Absalom, “Arkitsa Husainobo ring di, bo tamo sana tong khna lai anw,” hwnwi sa kha.

⁶ Husai Absalomni thani phai khe, Absalom bono hai hwnwi sa kha, “Ahithophel ahai hwnwi se sa-o; bini kókbiti hai khe da chwng khlainai? Wng ya khe ba nwng sa di!”

⁷ Hakhe Husai Absalomno hai hwnwi sa kha, “O jora-o kókbiti rwmani abo kaham ya.”

⁸ Husai teibo hai hwnwi sa kha, “Nwng saui mano nini nwpha bai bini bororok phan gwnang gwja, gong bwsa hai kirimasingcha tei nwpha choba nang lainani belai kwrwng, bo bini bororok bai pal khe horo tong ya.”

⁹ Nai di tabuk bo hakhor kaisaswgo eba kwrẃngsaswgo huijagwi tong khna. Tei kisa swk borok swkangni swprak phuru-o thwi khe tei abono khna khe sa lai anw, hakhe Absalom bai baksa thángnai bororok bebakno butharjak bai kha.

¹⁰ Hakhe bwkha kotor, singho hai bororok phano se ma kirinai tamni hwn ba bebak Israilrok nini nwpha phan gwnang tei bo bai baksa tongnai bororokbo bwkha kotor gwja máng’-no.

¹¹ Ani kókbiti khe omo hai, norok bebak Israilrokno Danni simi Birseba jora ani thani phai lai di, twijlang rukungni hasingsa bángma swk thumwi nwng sak baithangbo choba-o tháng di.

¹² Hakhe chwng bo tong thani’-no thángwi bono swprak lainai, ha-o siyari klaima hai khe bini saka-o klai swprak lainai. Tei bo bai baksa tongnairok khoroksa phano yók glak.

¹³ Bo kamiyung kaisaswgo khár khe bebak chini Israil bororok kamiyungo dwkhwi bai khaui sopreui harung jora tlangnai, hakhe aro holong dulsa phano tong glak.

¹⁴ Tei Absalom bai bebak Israilrok sa kha. Ahithophelni kókbitini slái Arkitsa Husai samani kókbiti se ham kugo! Tamni hwn ba, Subraiyung Ahithophelni kókbiti kaham samano nang ya khlaiwi tei Absalomni saka-o hamya tubuna chong kha.

Daud hus khlaijakma tei yókmani

¹⁵ Hakhe Husai Sadok bai ochai Abiatharno sa kha, Ahithophel, Absalom tei Israilni okra-chakrarokno kókbiti samani haino angbo abo hai’-no kókbiti rw-o.

¹⁶ Aboni bagwi tabuk dakti khe Daudno saui di, tini horo hasing hapharni nok krago ta tong thung, tini’-no oroni láiwi tháng thung, wng ya khe bo bai baksa bebak bini bororokbo butharjak bainai.

¹⁷ Jonathan tei Ahimajsong Enrogelo naising lai tongo; selengjwk khoroksa bórokno tháng thángwi saui-o tei bórok tháng thángwi habugra Daudno kóktun tunwi-o. Tamni hwn ba bórok kamiyungo nukjagwi habwi man ya.

¹⁸ Tamo khe salsa chwrai khoroksa bórokno nuk khe Absalomno sa kha, hakhe bórok khoroknwi’-no dakti khe Bahurimo tongnai borok khoroksani thani thángwi bini nok ganani twikhor bisingo habwi huijak lai tong kha.

¹⁹ Nokphangjwk twikhor búkhúkno kholop kha tei aboni saka-o maichlam lamwi rw kha tei abo mungsa phano sijak li ya.

²⁰ Absalomni selengrok aro nogo phaiwi nokphangjwkno’-no, “Ahimaj bai Jonathan biyang?” hwnwi sẃng phai kha. Nokphangjwk bórokno, “Bórok twisa tẃi bárwi tháng kha,” hwnwi sa kha. Bororok bórokno naituk laiwi man lai li ya hwn khe, Jerusalemo kiphilwi tháng lai kha.

²¹ Bórok tháng bai khe Ahimaj bai Jonathan twikhor bisingni nongkhorwi phai lai kha tei Daudni thani thángwi hai hwnwi sa lai kha, “Dakti khe bachaui twi bárwi tháng lai si di, tamni hwn ba Ahithophel nono kebengwi kókbiti chabwi tongo.”

²² Hakhe Daud tei bini bebak bororok bo bai baksa Jordan bár lai kha tei sal tongsani’-no khoroksa phano Jordan bár ya kwrwi kha.

²³ Ahithophel bo samani kók chajak li ya hwn khe bini koraichirka saka-o kasaui kamiyungo kiphilwi tháng kha, bini núkhungo bebak jai khlaiwi ulo khe bo kotok soroui thwi kha, hakhe buphani simalwngo’-no phobjak kha.

²⁴ Hakhe Daud Mahanaimo sók phai khe tei Absalom bebak Israil bororok bai Jordan basu lai kha.

²⁵ Absalom Joabni sak slái-o Amasano sengkrak bokhorok chong kha, Amasa wng kha Ismael bosongni Ithrani bwsla, bini buma khe Abigail, Nahasni bwsajwk tei Joabni buma Jeruani bahanok.

²⁶ Absalom bai bini bororok ha Giliado batham kha lai kha.

²⁷ Daud Mahanaimo sók phai khe Rabba kamiyungni Nahasni bwsla Ammonsa Sobi, Lodebaro tongnai Amielni bwsla Makir tei Rogelimo tongnai Giliadsa Barjilai bai malai kha.

²⁸ Bórok thuyamrok, dangairok, hani twkrok, gom, barli, chámung, mai yókjak, kosoirok mui bwchlwi yókjak,

²⁹ Piya bwtwi, doirok, merarok tei musuk abuktwini chámung tubu kha, tamni hwn ba bórok hai hwnwi sa kha, “Bororok hasing hapharo ok khui lai kha tei leng lai kha tei twi kangjak lai kha.”