2 SAMUEL 16 - Kok Borok (Re-edited) Bible (BSI)

Daud bai Seba

¹ Daud hathái bokhorokni kisa láiwi tháng khe Mephibosetni seleng Seba bai malai kha, bo koraichirka maknwi-o khe auan belep nwira, bochop chop sara angur kwran, sachlang molni bwthái thái sara tei mui bukurni kholjang tháisa arak tubu kha.

² Habugra Sebano, “Nwng tamni omorokno ma tubu?” hwnwi sẃng kha. Seba hai hwnwi sa kha, “Koraichirkarok khe nini núkhungni bororok kasanani bagwi se, auan bai bwtháirok khe bororok chánani bagwi, angur bwtwi khe hasing hapharo lengnairokno khan rwnani.”

³ Habugra bono, “Nini bugrani bwsla biyango?” hwnwi sẃng kha. Hakhe Seba habugrano hai hwnwi sa kha, “Nai di bo Jerusalemo tongo; tamni hwn ba bo hai hwnwi sa kha, ‘Tini Israil núkhung ani aphani hano ano kiphilwi rwnai.’ ”

⁴ Hakhe habugra Sebano, “Nai di, Mephibosetni tong kwrwi bebak tabuk nini se wng kha,” hwnwi sa kha. Tei Seba hai hwnwi sa kha, “Ang nono bóri-o; o ani bugra habugra, ang nini seleng nini khá phur tẃi’-no tong man phlai thung.”

Daud bai Simei

⁵ Habugra Daud Bahurimo sók phai kheno, Solni núkhungni khoroksa Gerani bwsla Simei, bo phai twtwi swrai máng phai kha.

⁶ Teibo Daudno holongrok khitar kha tei habugra Daudni selengroknobo khitar kha; tei bebak bororok, bini bebak phan gwnangrok bini yagra yaksi kiting laijak.

⁷ Simei swraiwi hai hwnwi sa kha, “Nongkhorwi tháng di, nongkhorwi tháng di, borok cha ya, borok butharnai!”

⁸ Solni núkhungni bororokno butharmani bagwi tabuk Subraiyung nono yagul su kha, bini sak slái-o se nwng habugra chá kha, Subraiyung nini nwsla Absalomni yago se hano yaphar kha. Nai di tabuk nwng ma thwinai, tamni hwn ba nwng borok butharo.

⁹ Hakhe Jeruiani bwsla Abisai habugrano, “Tamni o sẃi kwthwi ba ani bugra habugrano swraithai tong? Ang thángwi bini bokhorokno tannai,” hwnwi sa kha.

¹⁰ Tamo khe habugra hai hwnwi sa kha, “Jeruiani bwsarok ang norok bai mungsa khlaina da tong ba? Tumungno Subraiyung Daudno swrai di hwnwi dagi khe, hakhe nono sabo hwn nai ba omo hai tamni nwng ma khlai?”

¹¹ Daud Abisai tei bebak bini selengrokno hai hwnwi sa kha, “Ani sajla se ano butharnani nai tongo, hakhe o Benjamin bosongni borok ba teibo se butharna nai sinai ta? Bo khlaimano khlai rw di, bo sw phano swrai thung, tamni hwn ba Subraiyung se bono abo hai khlai di hwnwi dagi-o.

¹² Subraiyung ani o tektono nugwi phano mano tei tini ang swraimung man phano yagulo khe ani kaham khlainai.”

¹³ Hakhe Daud bai bini selengrok lama-o him lai tháng kha tei Simeibo swrai twtwi hathái sederwi tháng twtwi holongrok bai hadlwirok khitarwi thángo.

¹⁴ Habugra bai bini bororok lenglaui bórokni thángma-o sógwi lai kha, aro Daud lengla kha.

Jerusalemo Absalom

¹⁵ Tabuk Absalom tei bebak bororok, Israil bororok Jerusalemo phai lai kha, Ahithophelbo bórok bai pal tongo.

¹⁶ Daudni bikiching Arkitsa Husai Absalomni thani phai kha, hakhe Husai Absalomno hai hwnwi hwn kha, “Habugra kwthang tong thung, habugra kwthang tong thung!”

¹⁷ Absalom Husaino, “Omo hai khe da nwng nini kichingni kók khna? Tamni nwng bini logi-o tháng ya?” hwnwi hwn kha.

¹⁸ Husai Absalomno hai hwnwi sa kha, “I’nhi, Subraiyung bai o bororok tei bebak Israilrok chongmani bai pal se ang tongnai.

¹⁹ Ang sabono tei monnai? Bini bwsano ya diba? Ang nwphano monma haino ang tabuk nono monnai.”

²⁰ Hakhe Absalom Ahithophelno, “Tabuk chwng tamo khlaina nangno sa di?” hwnwi sa kha.

²¹ Hakhe Ahithophel Absalomno hai hwnwi sa kha, “Noyung mwrwknani bagwi nini nwpha hik kotoirokno yakarwi klang bai kha, bórok bai thángwi thu-ui di; hakhe bebak Israilrok nwng nini nwphani selengmung wng kha hwnwi saui mannai tei nwng bai pal tongnairok nini bwkhak wng bainai.”

²² Hakhe bórok Absalomni bagwi núkhúng saka-o ríni nok tangwi rw lai kha tei bebak Israilrokni mokol bwskango Absalom buphani hik kotoirok bai thunani tháng kha.

²³ A jora-o Ahithophelni o kókbitino Kaitorni aroni se hwnwi uansuk lai-o; Daud bai Absalom bórok khoroknwnwi’-no abo hai’-no uansuk lai-o.