2 SAMUEL 15 - Kok Borok (Re-edited) Bible (BSI)

Absalom kebengna chapmani

¹ Aboni ulo Absalom korai malkhung khungsa tei korairok na kha tei borok khorokbachi bini bwskango thángna bagwi na kha.

² Hakhe Absalom sal brúmno phung aidrobo bacha bachaui kamiyung duglamni lama-o bachaui tongo. Khoroksa swk borok habugrani thani bujni bagwi phai khe Absalom bono ring horwi, “Nwng bu kamiyungni wng kha?” hwnwi sẃngo. Tei bo, “Nini seleng Israilni omo hai omo hai bosongni,” hwnwi sa-o.

³ Absalom bono hai hwnwi sa-o, “Nai di, nini naimani abo sói tei kahamno, tamo khe nini kók khnana bagwi khoroksa phano chongjak borok kwrwi.”

⁴ Absalom teibo hai hwnwi sa kha, “Ang o hani buj thumnai wngma te ani thani bujni bagwi tei sajaknai kókrok sana phainai bebak bororokno’-no phai khe ang bebakno’-no sói tei kaham khe buj thum kha mun.”

⁵ Khoroksa swk bini thani phaiwi bono ha-o klaiwi khulum khe, bo bono khochaui motom su kha mun.

⁶ Abo hai khe’-no Absalom bebak Israilrokno habugrani thani bujni bagwi phai bainairokno abo hai’-no khlai kha tei aboni bagwi Absalom bebak Israilrokni bwkha man kha.

⁷ Nokha bisik brwini páithago Absalom habugrano hai hwnwi sa kha, “Ang koi ja-o, ang Subraini thani swmai tangmano khlainani bagwi Hebrono rohor ja di.

⁸ Ang nini seleng Aramni Gesuro tong phuru Subraiyungni thani swmai tangmani tongo, nwng ano Jerusalemo kiphil rwui tlang phi khe ang Subraiyungno khulum phainai.”

⁹ Habugra bono, “Kaham kwrwng khe tháng di,” hwnwi sa kha. Hakhe bo Hebrono tháng kha.

¹⁰ Tamo khe Absalom tepsa khe bebak Israil bosongni thani borok rohorwi hai hwnwi sa hor kha, “Norok totro kotor pungma khorang khna khe, Hebronni habugra Absalom hwnwi chirikhók lai di.”

¹¹ Absalom bai kobokjagwi borok khorok ranwi Jerusalemni bo bai tháng kha, phiya ba bórok Absalom chapmarokno mungsa saui man ya.

¹² Absalom yapharmung yapharwi tong phuru khe, kamiyung Gilo-o Daudno kókbiti rwnai Ahithophelno na rw hor kha. Bini kók hamya chapma teibo rak kha. Tei bini palbo báng rwrwk wng kha.

Daud Jerusalemni khármani

¹³ Khoroksa tẃitun phaiwi Daudno, “Israil bororok Absalomno máng chajak rwrwk kha,” hwnwi sa kha.

¹⁴ Hakhe Daud Jerusalemo tong bainai bebak bini selengrokno hai hwnwi sa kha, “Chwng dakti khárwi tháng lai sinai, wng ya khe khoroksa phano Absalomni yakni yógwi man glak. Do di! Wng ya khe chwng bebakno bo bai butharjak bainai tei kamiyungbo sokomorjak sinai.”

¹⁵ Selengrok habugrano, “Nwng sama hai’-no chwng khlaina bagwi tiyar tongo,” hwnwi sa kha.

¹⁶ Hakhe habugra bebak bini núkhung tei selengrok bai khe nongkhorwi tháng kha, tamo khe habugra noyung mwrwknani bagwi bihik kotoi khorokchirokno klangwi tháng kha.

¹⁷ Habugra tei bini bororok kamiyungni nongkhorwi tháng lai phuru, kamiyungni páithakni nogo bathak lai kha.

¹⁸ Tei bebak selengrok bono láiwi tháng bai kha tei Keritsarok, bebak Pelethisarok tei khorok dok-ra Gitisarokno, Gatni simi bono rwktharwi thángnairok bebakno bono láiwi tháng bai kha.

¹⁹ Hakhe habugra Gitisa Itaino hai hwnwi sa kha, “Tamni nwngbo chwng bai pal thángna hwn ba? Kiphilwi thángwi habugra Absalom bai’-no tongwi di, nwng sakni hani búkhlai rohorjak tei phabo phatarsa.

²⁰ Nwng miya se phaidrop, hakhe tamni ang nono tẃinai, ang sak sak se ang buro thángwi tong saui man ya? Nwng kiphilwi tháng di tei nini takhuksongnobo nwng bai baksa tlangwi tháng di; Subraiyung nono chuba thung tei khairok thung!”

²¹ Tamo khe Itai habugrano hai hwnwi sa kha, “Ang Subraiyungni mung bai swmai tangwi sa-o tei ani bugra kwthang tong sak ani bugra tong thani’-ono ang thángnai, thwiwibo thangwibo nini o selengbo arono tongnai.”

²² Hakhe Daud Itaino, “Hakhe him si di tho! Hakhe Gitisa Itai bebak bini bororok bai tei chwrai bwsarok bai khe tháng kha,” hwnwi sa kha.

²³ Hakhe bebak bororok tháng lai khe hani bebak bororok khorang kotor khe kap lai kha. Habugra tei bini bebak bororok Kidron twisa bárwi hasing haphar bwkhago tháng lai kha.

²⁴ Abiathar aro phai kha tei bebak Lebirok bai khe Sadokbo Kaitorni swmai bokhokno tẃiwi phai lai kha, bórok abono kariui bebak bororok kamiyung láiwi tháng bai yasak’-no ton lai kha.

²⁵ Hakhe habugra Sadokno hai hwnwi sa kha, “Kaitorni swmai bokhokno kamiyungo kiphilwi tlang phi si di. Tumungno Subraiyung ano hamjak khe, bo ano tei uáisa kiphil rwui tubu-ui abo bai bini tongthaino phunuk phinai.”

²⁶ Tamo khe bo, “Ang chajak ya, hwnwi sa khe, ‘Nai di ang oro’-no tongo, bo chajakma tẃi’-no ano khlai thung.”

²⁷ Habugra ochai Sadokno teibo hai hwnwi dagi kha, “Nai di, nwsla Ahimaj tei Abiatharni bwsla Jonathanno tlangwi kamiyungo kwchang kwchang khe kiphilwi tháng si di.

²⁸ Nai di, ang khe twima bár dropni hasing panthorni nok krago nini kók khna ya sak naisingwi tongnai.”

²⁹ Hakhe Sadok bai Abiathar swmai bokhokno Jerusalemo kiphilwi tlangwi aro’-no tongwi lai kha.

³⁰ Daud Olib hachugo yakung bukcha khe tei khorok rí kholobwi kap twtwi tháng khe tei bo bai baksa thángnai bororokbo bo hai khe’-no khorok kholobwi kabwi tháng lai kha.

³¹ “Ahithophel bo haino Absalom bai baksa kebengma-o gwdal kha,” hwnwi Daud sajak khe Daud, “O Subraiyung, Ahithophelni bitirokno samungno mungsa chúk ya khlai di,” hwnwi suri kha.

³² Daud hachuk bokhorogo Kaitorno khulummani-o sók phai khe, nai di Arkito tongnai Husai rí kichik kanjak tei bini bokhorok ha rujujak khe malaina phai kha.

³³ Daud bono hai hwnwi sa kha, “Tumungno nwng ang bai baksa phai khe ani bagwi poja wngnai.”

³⁴ Tamo khe nwng kamiyungo kiphil khe Absalomno hai hwnwi sa di, “Nini nwphani seleng wngma hai tabuk ang nini seleng wng anw, hakhe nwng Ahithophelni kókbitirokno kebengwi man anw.

³⁵ Ochai Sadok bai Abiatharbo aro nwng bai ya diba? Aboni bagwi habugrani nokni khnama kókno ochai Sadok bai Abiatharno saui di.

³⁶ Nai di, bórokni bwslasong aro bórok bai’-no Sadokni bwsla Ahimaj tei Abiatharni bwsla Jonathansongni khúk tẃi bebak khnamarokno ano sa hor di.”

³⁷ Hakhe Absalom Jerusalemo hapdrop kheno, Daudni bikiching Husai, kamiyungo sók phai kha.