2 SAMUEL 14 - Kok Borok (Re-edited) Bible (BSI)

Joab Absalom kiphilna lama Snam kha

¹ Habugra, Absalom bai malaina muchungjak kha hwnwi Jeruiani bwsla Joab saui man kha.

² Hakhe Joab Tekoa-o borok rohorwi aroni khoroksa siyan kwrwng bwrwi khoroksano na rohorwi hai hwnwi sa kha, khá khamwi kapjak hai khe tong di tei khá khamwi kap phuru chummani rí chumwi na di tei nwng thokbo ta phul di tamo khe khoroksa swk borok thwijagwi sal kwdwkma kapjak hai khe tong di.

³ Habugrani thani thángwi ang samani hai khe saui di, hakhe Joab tamo ma sanai bono saui rw kha.

⁴ Tekoani a bwrwi habugrani thani phaiwi ha-o pwtapsa khe klaiwi hai hwnwi sa kha, “O bugra, ano chuba ja di.”

⁵ Habugra a bwrwino hai hwnwi sẃng kha, “Nwng tamo nai ba?” Bwrwima hai hwnwi sa kha, ang randijwkma se, ani angsai thwi kha.

⁶ Hakhe nini o selengjwkni bwsarok takhuknwi tongo, hakhe bórok haba-o thángwi uálai lai kha, bórokno khoroksa phano swkaknaibo kwrwi hakhe khoroksa tei khoroksano swpragwi buthar lai kha.

⁷ Tabuk ani jaiti-masarok bebakno nini o selengjwkno kebengwi bacha kha, bórok takhukno butharmani bagwi ani tei khoroksa sajlanobo butharna bagwi san lai kha, hakhe ang saichung susuk wngnai, hakhe bórok ang mwkhang naiwi tongmano suda sokomorwi tei ani bwsaini mung narwknai kwrwi khe páinai.

⁸ Hakhe habugra o bwrwimano, “Nogo kiphilwi tháng di, ang abono cherwi naiwi tamo khlainai dagiui rw anw,” hwnwi sa kha.

⁹ Tekoani a bwrwima habugrano hai hwnwi sa kha, “O bugra ani’-no cha ya ba ani saka’-ono majra klai thung tei ani núkhungni saka’-ono klai thung tamo khe mungsa majra kwrwi habugrani saka-o tei bini achukthayungo ta klai thung.”

¹⁰ Habugra hai hwnwi sa phi kha, “Tumungno khoroksa swk nono mungsa swk sa khe, bono ani thani tubu di, bo nono tei mungsa khlaiwi man glak.”

¹¹ Hakhe a bwrwima, “Bugra nini Subraiyung Kaitorno sa ja di, ani jaitirokno tei khoroksa sajlano butharwi yagul ta sujak thung,” hwnwi sa kha. Hakhe bo, “Ang Subraiyungni mungwi sa-o oroni nini bwsa khoroksa phano thwi glak,” hwnwi sa kha.

¹² Hakhe bwrwima hai hwnwi sa kha, “Nini selengjwk nono tei kók tháisa sanani muchung kho.” Bo hai hwnwi sa kha, “Hakhe, sa di.”

¹³ Bwrwima bono hai hwnwi sa kha, “Hakhe nwng tamni bagwi Kaitorni bororokni bagwi hamya uansuk?” Hakhe habugra kók sama bai majra khlai kha, tamni hwn ba bugra bini sajlano buini hani kiphilwi tubu li ya.

¹⁴ Chwng bebak’-no ma thwinai, chwng ha-o klainai twi hai se, abono khoroksa phano tei thumwi man phiya. Kaitor suda kwthwino mwthang ya tamo khe habugra le buini ha-o tongmano kiphilwi tubuna khe tubu-ui mano.

¹⁵ O ani nokphang, habugra ang tabuk phaimani khe bororok ano sikiri-o; nini o selengjwk hai hwnwi uansuk kha, “Ang bugrano sa-o; bini o selengjwk koimano bugra omoni bagwi mungsa swk le khlai anw.”

¹⁶ Hakhe bugra khnanai tei bini selengjwkno tei ani sajlano ano butharwi Kaitorni núkhungno sokomorna nainairokni yakni phiyók anw.

¹⁷ Tei nini selengjwk uansuk kha, bugrani khukni kók bai ano kwchang kwchang khe tonwi mano, tamni hwn ba habugra khe Kaitorni suari hai bubo kaham bubo hamya saui mano. “Subraiyung nini Kaitor nwng bai tong thung.”

¹⁸ Hakhe habugra a bwrwino, “Ang sẃngmani kókno mungsa phano huiwi ta ton di,” hwnwi sa kha. Tei a bwrwi, “Ani bugrano sa si thung,” hwnwi sa kha.

¹⁹ Habugra hai hwnwi sa kha, “O samungrogo tamo Joabni yak de tong?” Bwrwi hai hwnwi sa kha, “Ang swmai tangwi sa-o, nini kók norwi yagrani yaksi khlaiwi mannai khoroksa phano kwrwi. Nini seleng Joab se ano chuba-o tei tamo sana nang phrwngwi rohoro.

²⁰ Bebak tongmung sláinani bagwi bo abo hai khlai-o. Hwn ba ani bugra Kaitorni suarini slái’-bo elem gwnang kuk, bebakno saui mano.”

²¹ Hakhe habugra Joabno hai hwnwi sa kha, “Belai kaham, ang lono; tháng di siklasa Absalomno kiphilwi nahor di.”

²² Joab habugrani bwskango pwtapsa khe klaiwi hai hwnwi sa kha, “Kaitor nono hamari rw thung. Tabuk ang saui man kha, nwng ano chajagwi nini seleng naimano rw kha.”

²³ Hakhe Joab bachaui Gesuro thángwi Absalomno Jerusalemo tubu kha.

²⁴ Phiya ba habugra hai hwnwi dagi kha, “Absalom bini nogo’-no tong thung, ani bwskango tei ta phai thung.” Hakhe Absalom bini nogo’-no tong kha tei habugrani bwskango phai li ya.

Absalom Daud bai kwthamani

²⁵ Israilni bising khoroksa phano Absalom hai khe naithokma tei kwrwi, yakungni simi bokhorok jora bini mungsa derajak se kwrwi.

²⁶ Bini bwkhnai bisi páithago uáisa rasujago. Abo hilikmani habugra rwtamungni rwtamani bai kilo kainwi ká-o.

²⁷ Absalomni bwsla khoroktham tei bwsajwk khoroksa tongo, bini mung khe Tamar. Bo belai bwrwi naithokma.

²⁸ Hakhe Absalom habugra bai malai ya khe máng’-no Jerusalemo bisiknwi khrangsa tong kha.

²⁹ Hakhe Absalom habugrani thani thángnani bagwi Joabno na rw hor kha, hwn ba Joab phai li ya. Bo tei uáisa sa hor kha, hai phano Joab phai li ya.

³⁰ Hakhe Absalom bini selengno hai hwnwi sa kha, “Nai di, Joabni haphar ani bai gana-o tongo, aro barli tongo, norok thángwi abono hór phnangwi rwui di.” Hakhe Absalomni selengrok hór phnangwi rw lai kha.

³¹ Hakhe Joab Absalomni nogo thángwi bono, “Tamni nini selengrok ani hapharo hór phnangwi ma rw lai?” hwnwi sa kha.

³² Absalom Joabno hai hwnwi sa kha, “Nai di ‘Ang tamni Gesurni phai lang? Ang aro tongma se ham kuk kha mun’ hwnwi sa hor rwna bagwi ang nono oro phai di hwnwi sa hor kha. Tabuk ano habugra bai malai rw di; tumung ani cha ya tong khe bo ano buthar thung!”

³³ Hakhe Joab habugrani thani thángwi Absalom samani kókno saui kha, habugra Absalomno na rw hor khe bo habugrani bwskango phaiwi ha-o botok khe klaiwi khulum kha. Habugra bono motom su-ui yachak sók kha.