2 SAMUEL 12 - Kok Borok (Re-edited) Bible (BSI)

Nathanni kók bai Daud khá kiphilmani

¹ Hakhe Subraiyung Nathanno Daudni thani rohor kha. Bo bini thani phaiwi bono hai hwnwi sa phai kha, “Kamiyung khungsa-o khoroknwi borok tongo, khoroksa khe gwnang tei khoroksa khe bigra ja.

² Gwnangsani khe kwbángma musukrok tei merarok tongo,

³ tamo khe kwrwisani khe bo páimani merajwk bwsa masa susuk tong ja-o. Bo abono kaham khe naikini khlaiwi bini nogo bini chwrairok bai baksa tor rw kha, bo bini chámungno chá rw-o tei bini khuri bai twi khan rw-o, bini khúri’-ono thu-o tei abo bini bwsajwk hai se.

⁴ Salsa gwnangsani nogo nograirok phai kha tei a gwnangsa bini nograirokno chá rwna bagwi bini merano butharna muchungjak li ya, phiya ba bo a bigrasani mera masasusukno naui nograirokni banta abono sóng kha.”

⁵ Aphuru khe Daud a gwnangsano belai jolijagwi Nathanno hai hwnwi sa kha, “Kwthang tongnaisa Subraiyungni mung bai sa-o, omo hai samung khlainai bo ma butharjakna se nango.

⁶ Bo abo hai samung hamya tangmani bagwi bo a mera masani mak brwi rwui ma suthai tamni hwn ba bini khairokma kwrwi.”

⁷ Nathan Daudno, “Nwng’-no a borok,” hwnwi sa kha. Subraiyung Israilni Kaitor hai hwnwi sa-o, ang nono Israilni habugra chongmani tei nono Solni yaknibo phiyók kha;

⁸ tei ang nono nini bubagrani nokno nono rw kha, bórokni hikroknobo nini khuri-o rw kha tei ha Israil bai Judanobo rw kha; tamo khe tumung omorokno kisicha wngjagwi tong khe ang nono teibo se rw kha mun.

⁹ Nwng tamni Subraiyungni kókno khibiui bini mokolo cha yano ba khlai lang? Nwng Hitisa Uriano Ammonsarokni yago seng bai buthar rw kha tei bini bihikno na kha.

¹⁰ Aboni bagwi tabuk nini núkhungni sakani seng tei yakarwi tháng glak, tamni hwn ba nwng Hitisa Uriani hikno naui ani kók khna ya wng kha.

¹¹ Subraiyung hai hwnwi sa-o, “Ang nini núkhungni’-no nini bagwi jwngjal phnangnaino bacha rwnai; tei nini mokol bwskangni nihiksongno segwi nini nok arirokno rwnai tei bórok nihiksong bai sal kwthango’-no pal thunai.

¹² Nwng abono tepsa khe khlai kha, tamo khe ang abono bebak Israilrokni bwskango sal kwthango’-no abono khlainai.”

¹³ Daud Nathanno, “Ang Subraiyungni thani sumsok khlai kha,” hwnwi sa kha. Nathan Daudno hai hwnwi sa kha, “Subraiyung nono nakar kha, nwng thwi glak.

¹⁴ Tamo khe omo tẃi samung khlaimani bagwi Subraiyung nono swprak sinai, hakhe nini a achainai absa kwlwi ma thwinai.”

¹⁵ Aphuru khe Nathan bini nogo kiphilwi tháng kha. Hakhe Uriani bihik bai manmani Daudni bwslano Subraiyung lum rw kha.

Daudni bwsla thwimani

¹⁶ Hakhe Daud chwraino ham rw ja di hwnwi Kaitorni thani suri san kha; Daud mungsa chá li ya tei bini nok bisingo thángwi hopung ha-o klaiwi tong kha.

¹⁷ Bini nokni okrarok bini gana-o thángwi, bono bacha rwna nai lai kha, hai phano bo bacha li ya tei bórok bai pal mungsa chá li ya.

¹⁸ Nokha salsnini salo khe absa kwlwi thwi kha. Hakhe Daudni selengrok absa thwi kha hwnwi bono sanani kiri kha. Bórok hai hwnwi sa lai kha, “Nai di, absa kwthang tong phuru-o se bo chini kókno khna ya, hakhe chwng bahai khe absa thwi kha hwnwi sa raknai? Bo sakno se dera-duru rwui mano.”

¹⁹ Tamo khe Daud bini selengrokno serek-serek sa laiwi tongmani khna khe, bo a chwrai thwi kha hwnwi saui man kha, hakhe Daud selengrokno ahai hwnwi sẃng kha, “Absa de thwi lang?” Bórok ahai hwnwi sa kha, “I’n bo thwi ja kha.”

²⁰ Hakhe Daud hani bacha kha tei twi tuku-ui, sago thok phulwi, bini rírok sláiwi Subraiyungni nogo tháng kha tei bono khulum kha; ulo khe bo bini nogo kiphil kha tei bo chámung san khe abono bono rwjak kha hakhe bo abono chá kha.

²¹ Bini selengrok bono hai hwnwi sa kha, “Nwng omo tamo khlai kha? A chwrai kwthang tong phuru khe nwng chá ya nung ya khe kap kha, tabuk chwrai thwima le bachaui mai chá kha!”

²² Bo hai hwnwi sa kha, “A chwrai kwthang tong phuru ang chá ya tongwi kapmani le Subraiyung ano khairogwi a chwraino mwthangwi da narwkno? hwnwi ang uansukmani.”

²³ Tabuk chwrai thwiwi se pái kha hwn khe tamni ang chá yaui tong sinai ba? Ang chwraino mwthangwi de man phino ba? Ang se bini aro thángwi mano, phiya bo le ani aro kiphilwi phai man li ya.

Solomon achaimani

²⁴ Hakhe Daud bini bihik Batsebano bwkha ham rwui bini thani tháng phi kha tei bo bai thu kha-chá kha hakhe bo tei khoroksa bwsa chwla man phi kha, bono Solomon hwnwi mung phar kha,

²⁵ tei a chwraino Subraiyungni bagwi Jedidia mung phar di hwnwi diyari Nathan borok rohorwi sa rw hor kha.

Daud Rabbano Mechenwi rommani

²⁶ A jora-o Joab Rabbani bororok bai choba nang laiwi Ammonsarok kamiyungno segwi na kha.

²⁷ Hakhe Joab Daudni thani borok rohorwi sa hor kha, ang Rabba bai choba nang laiwi aroni kamiyungni twirokno segwi na kha.

²⁸ Tabuk bebak nini sengkrakrokno thumwi kamiyungno kasu-ui na phai si di. Wng ya khe ang kamiyungno naui ani mung klainai.

²⁹ Hakhe Daud bini bebak sengkrakrokno thumwi Rabba-o thángwi bórok bai choba nang laiwi abono segwi na kha.

³⁰ Daud Ammonsarokni habugrani (Milkom) bokhorokni rangchakni khorok thupmano na kha, abo hilikmani thamchiba kilogram wngnai tei aboni bisingo holong kaham tongo, abono Daudni bokhorogo thubui rwjak kha. Bo teibo kwbángma kamiyungni manwirok segwi tubu kha.

³¹ Hakhe aro tong bainai bororokno tubu-ui koratni samung, sorni samung, ruani samungo tei itrok taknani samungo phnang bai kha. Bo abo hai khe’-no Ammonsarokni kamiyungni bororokno khlai bai kha. Hakhe Daud bai bini bororok Jerusalemo kiphilwi tháng kha.