2 SAMUEL 11 - Kok Borok (Re-edited) Bible (BSI)

Daud bai Bethsebani kók

¹ Sachlangni jora-o Daud bini selengrokno tei bebak Israilrokno, Joab bai baksa choba-o rwui rohor kha. Bórok Ammonsongno mechenwi Rabba kamiyungno segwi na kha, tamo khe Daud khe Jerusalemo’-no tong rwk kha.

² Salsa, sarigo, Daud bini thumani bachaui noyungni nukhúngo himwi tongwi kha, bo aroni khoroksa bwrwi naithokma twi tuku-ui tongmani nuhur kha.

³ Daud borok rohorwi a bwrwi sabo nai rw hor kha. A borok hai hwnwi sa phai kha, “Bo wng kha Eliamni sajwk Batseba, Hitisa Uriani bihik.”

⁴ Hakhe Daud borok rohorwi a bwrwino na rw hor kha, hakhe a bwrwibo bini thani phai kha tei bo bai thu kha chá kha. (Aphuru a bwrwi bokhorok sú-ui kwthar wngwi páidrop) Hakhe bo bini nogo kiphil kha.

⁵ Hakhe a bwrwi sakderiya wng kha tei bo borok rohorwi Daudno “Ang sak kupulung wng kha,” hwnwi sa rw hor kha.

⁶ Hakhe Daud Joabni thani borok rohorwi hai hwnwi sa rw hor kha, “Hitisa Uriano ani thani rohor di.” Hakhe Joab bono Daudni thani rohor kha.

⁷ Uria sók phai khe, Daud bono Joab tei bororok kaham kwrwng de tong bai, choba nang laima kaham de hwnwi sẃng kha.

⁸ Hakhe Daud Uriano, “Nogo thángwi yakung sú-ui kisa lengla gra di,” hwnwi dagi kha. Hakhe Uria noyungni tháng kha tei habugra bono hili rwui rohor kha.

⁹ Tamo khe Uria nogo tháng ya karwi habugrani noyungni duglamo selengrok bai baksa khe thu kha.

¹⁰ Daudno hai hwnwi sajak kha, “Uria nogo thuna tháng li ya,” hakhe Daud Uriano hai hwnwi sa kha, “Nwng aswk hakchalmani phaimani ya diba? tamni nwng nogo thángwi thu-ui ya wng?”

¹¹ Uria Daudno hai hwnwi sa kha, “Swmai bokhok, Israilsarok tei Judani bororok kainogo se tonwi tongo tei ani sengkrak Joab tei bebak sengkrakrok hapharo se tongwi tong lai-o, hakhe bahai khe ang nogo thángwi cháui-nungwi hik bai thu lai tongwi mannai? Nini rangma tong sak tei kwthang tong sak ang abo hai khlai man glak.”

¹² Hakhe Daud Uriano, “Tinibo oro’-no tong di tei khwna ang nono kiphilwi rohornai,” hwnwi sa kha. Hakhe Uria a salo tei teini salobo Jerusalemo’-no tong kha.

¹³ Daud bono chánani kobok kha, hakhe bo bini bwskango chá kha-nung kha tei phek súk kha, sanja-o khe bo nogo tháng yaui bini bugrani selengrok bai pal khe thuthai-o thunani tháng kha.

¹⁴ Teini phungo khe Daud Joabni thani kóktun kangsa swiwi Uriani yak tẃi khe rohor kha.

¹⁵ Kóktunno bo hai hwnwi swi kha, “Uriano belai khe choba nang laima-o bwskango khe ton di, hakhe bono yakarwi uslu-ui phai di abo bai bo butharjagwi pái thung.”

¹⁶ Hakhe Joab kamiyungno sekproui choba nang laiwi tongma jora khe bo Uriano phan gwnang kuk arirokni sengkrakrok tongma-o bono rohor kha.

¹⁷ Hakhe arirok kamiyungni nongkhorwi phaiwi Joab bai nang laina phai kha, hakhe Daudni kisa swk selengrok butharjak kha. Hitisa Uriabo butharjak kha.

¹⁸ Aphuru khe Joab borok rohorwi chobani bebak patima kókrokno Daudno sa rw hor kha;

¹⁹ bo a kók tunnaisano hai hwnwibo saui rohor kha, “Nwng habugrano bebak choba-o patimani kókrokno sa khe

²⁰ habugra jolijagwi hai hwnwi saui mano, ‘Tamni nwng choba nang laimani kamiyungni aswk gana-o ma tháng? Bórok chokdeualo tongwi norokno makal kok hornai hwnwi saui man ya de?

²¹ Jerubesetni bwsla Abimelekno sabo buthar lang? Thebesni bwrwi khoroksa swk da chok deualo tongwi bini saka-o holongdap khiklai rwjagwi de bo thwi lang? Norok ba tamni aswk chok deualni samo le tháng lang?’ hwnwi tumung bo nono hwn khe aphuru khe nwng bono ‘Nini seleng Hitisa Uriabo thwi ja kha’ hwnwi sa di.”

²² Hakhe a kók tunnaisa Daudni thani thángwi Joab bai sa di hwnjakmano sana phai kha.

²³ Kók tunnaisa Daudno hai hwnwi sa kha, “Arirok chini slái phan gwnang kuk, hapharo chwng bai nang lainani bagwi kamiyungni nongkhorwi phai bai kha, tamo khe chwng bórokno kamiyungni duglam jora riphrigwi rohor lai kha.”

²⁴ Tamo khe badukhung koknairok chokdeualo tongwi nini selengrokno kok lai hor kha, abo bai bugrani selengrok thwi kha hakhe nini seleng Hitisa Uriabo thwi ja kha.

²⁵ Daud kók tunnaisano, “Bwkha udru mudru ta wng di hwnwi Joabno saui bwkha bacha rw di, khoroksa khoroknwi thwi phano kamiyungno gerebwi mechen di,” hwnwi sa kha.

²⁶ Uriani bihik bwsai thwi kha hwnwi khna khe bo kap kha.

²⁷ Bo kapmani ham khe Daud borok rohorwi bono noyungo tubu-ui bini bihik snam kha tei bini khoroksa chwla bwsa wng kha. Tamo khe Subraiyung Daudni samungno chajak li ya.