2 SAMUEL 10 - Kok Borok (Re-edited) Bible (BSI)

Daud Ammonsarok bai Siriyarokno mechenmani

¹ Aboni ulo Ammonsarokni habugra thwi khe bini bwsla Hanun habugra chá kha.

² Aphuru Daud hai hwnwi sa kha, “Ang Nahasni bwsla Hanun bai kaham khe tongnai, bini buphabo ang bai kaham khe tong kha; hakhe Daud bini selengrokno rohorwi buphani bagwi bwkha-o tongmani kókno sa rohor kha.” Hakhe Daudni selengrok Ammonsarokni ha-o tháng lai kha.

³ Tamo khe Ammonsarokni tẃiphangrok habugra Hanunno hai hwnwi sa kha, “Nini nwphano bórom khlaimani bai de Daud ba nini thani khá kaham sa horna rohor hwnwi nwng chong?” Daud bini selengrokno kamiyungno naichomnani tei mechen phainani bagwi se rohoro.

⁴ Hakhe Hanun Daudni selengrokno tubu-ui bórokni babaisa babaisa khochai silwi, bórokni rírokno khichlang jora raui rohor bai kha.

⁵ Bórok nogo kiphilnani belai lachi lai kha. Daud abono khna khe, bórokno Jeriko bórokni khochairok lok phi ya sak tongnani dagi kha.

⁶ Aphuru khe Ammonsarok tabuk Daudno kebengnai bororokni ari wng kha hwnwi saui man khe, Ammonsarok Bethrehob bai Jobani khorok 20,000 Siriyarokni sengkrakrok tei Tobni khorok 12,000 bororok tei Makani habugra bai pal borok khorok 1,000 na rw hor kha.

⁷ Daud abono khna kha khe Joabno bebak phankrak sengkrakrokno rohor kha.

⁸ Ammonsarok nongkhorwi phaiwi duglam hapmani-o tong lai kha, Joba tei Rehobni Siriyarok, Tob tei Makani bororok khe phataro tong lai kha.

⁹ Joab nai ba bini arirok chobani bagwi bwskang, kebengwi tiyar wng laijak. Hakhe bo Israilni kaham kuk sengkrakrokno saiwi Siriyarokni bwkhak naharwi tong rw kha.

¹⁰ Tei bebak sengkrakrokno khe bini buphayung Abisaino bokhorok chongwi rw kha, hakhe bórok Ammonsarokni bwkhago naharwi bacha lai kha.

¹¹ Joab bono hai hwnwi sa kha, “Siriyarok ano mechenwi tong khe, nwng ano chuba phai di, phiya Ammonsarok nono mechen khe, ang nono chuba phainai.

¹² Khá rak di, chini bororokni bagwi tei chini Kaitorni kamiyungrokni bagwi nang lai anw. Subraiyung kaham naima tẃi’-no wng thung.”

¹³ Hakhe Joab bai bini bororok choba nang lainani bagwi sederwi tháng lai khe Siriyarok khárwi tháng bai kha.

¹⁴ Ammonsarok Siriyarokno khármani nuk khe, bórokbo Abisaini bwskangni khárwi kamiyungo hap lai kha. Hakhe Joab Ammonsarok bai choba nang laimani kiphilwi Jerusalemo tháng kha.

¹⁵ Phiya Siriyarok Israilrok bai mechenjak kha hwnwi saui man khe, bórok bebakno kuthum lai kha.

¹⁶ Habugra Hadadejer Uphratis twimani ayang naro Siriyarokno na rw hor khe bórok Helamo Subakno sengkrak bokhorok chongwi phai lai kha.

¹⁷ Daud abono khna khe, bebak Israil sengkrakrokno thumwi Jordan twima barwi Helamo tháng lai kha, a Siriyasarok Daud bai nang laina tiyar wng laijak. Hakhe bo bai choba nang lai kha.

¹⁸ Siriyarok Israilrokni bwskangni ma khár bai kha, Daud bai bini bororok Siriyarokni mak snira korai malkhung tei mak brwichisai korai sengkrakrokno buthar kha, arirokni bokhorok Subakno bu-ui khiklai kha, bo aro’-no ma thwi kha.

¹⁹ Tei bebak Hadadejarni yago tong bainai habugrarok Israilrok bai mechenjak kha hwnwi saui man khe, Israilrok bai kwtha lai kha tei bórokni yago bom phai kha. Hakhe Siriyarok Ammonsarokno chuba phinani kirijak kha.