2 SAMUEL 1 - Kok Borok (Re-edited) Bible (BSI)

Sol thwimano Daud khnamani

¹ Sol thwi bai khe Daud Amelekrokno butharmani kiphilwi phaiwi Jiklago tei nokha salnwi tong kha.

² Tei nokha salthamni salo borok khoroksa bini rí sichigwi bokhorogo ha phulwi Solni bathamni phai kha. Bo Daudni thani phaiwi botok khe ha-o klaiwi kha.

³ Daud bono, “Nwng buroni phai?” hwnwi sẃng kha. Bo Daudno, “Ang Israil Bathamni yógwi phai-o,” hwnwi sa kha.

⁴ Hakhe Daud bono hai hwnwi sa kha, “Tamo wng lang?” Ano sa di. Bo hai hwnwi sa kha, “Chini sengkrakrok chobani ma khár bai kha, kwbángma borok butharjak bai kha. Sol bai bini bwsla Jonathanbo butharjak kha.”

⁵ Hakhe Daud a siklano hai hwnwi sẃng kha, “Nwng bahai khe Sol tei bini bwsla Jonathan thwi kha hwnwi saui man?”

⁶ A sikla hai hwnwi sa kha, “Ang achomsa hathái Gilboa thángmani jora-o, Sol bini sengo klai tong kha, aphuru arirokni korai malkhungrok bai korai kasanai sengkrakrok bini bwkhak phaiwi tongo.”

⁷ Bo uphilwi naiwi ano nuk khe ringhor kha. Ang hai hwnwi sa kha, “Tamo habugra.”

⁸ “Nwng sabo?” hwnwi bo ano sẃng kha. Hakhe ang bono hai hwnwi sa kha, “Ang Amalekni borok.”

⁹ Hakhe bo ano hai hwnwi sa kha, “Oro phaiwi ano buthar di, ang kaham kheno kwsa bai dundrokjak, ang thwinai kha”

¹⁰ Hakhe ang bini thani thángwi bono tanthar kha, bo ulo phano thwinai hwnwi ang saui man kha, ang bini khorogo tongmani motokno tei bini yaktwgo khopjakno naui abono oro nini thani tubu kha.

¹¹ Daud bini rírok sichik kha tei bini bororokbo abo haino khlai bai kha.

¹² Bórok sanja jora chá yaui khá khamjagwi kap laiwi Solni tei Jonathan tei Israilni bagwi Subraiyungni chongjak bororokni bagwi tong lai kha. Tamni hwn ba borok kwbángma choba-o thwiwi tháng bai kha.

¹³ Daud bono sa phainai siklano, “Nwng buroni phai?” hwnwi sẃng kha, Bo hai hwnwi sa kha, “Ang buini hani bororok, Amaleksa se.”

¹⁴ Daud bono, “Nwng bahai khe Subraiyungni chongjak borokno butharnani kiri ya wng kha ba?” hwnwi sẃng kha.

¹⁵ Hakhe Daud bini sikla khoroksano ringhorwi bono buthar di hwnwi dagi kha, hakhe bo aro’-no bono buthar kha.

¹⁶ Hakhe Daud bono hai hwnwi sa kha, “Nini thẃi nini saka-o klai thung,” tamni hwn ba nwng sak phang’-no, “Ang Subraiyungni chongjakno buthar kha,” hwnwi sa kha.

Daud Sol bai Jonathanni bagwi kapmani

¹⁷ Daud sol bai bini bwsla Jonathanni bagwi abo hai khá khamwi kapmung kap kha.

¹⁸ Hakhe Judani bororokno phrwng baina bagwi dagi kha. Abo Jasarni bijabo swijak tongo.

¹⁹ Israilni chẃngsacha nini hathái saka-o butharjak kha! Chini bwkha kotor sengkrakrok thwi bai kha!

²⁰ Gato ta sa hor si di tei Askelonni laharo bo ta sakhlai di. Wng ya khe Philistiani bwrwirok tongthok bainai. Sakur rajak yani bwsajwksong tongthok bainai,

²¹ Gilboani hathái saka-o pantwi eba uatwi ta klai thung, bini panthor bukcha wng si thung, tamni hwn ba aro phan gwnang borokni phui klai kha, Solni phui thok phuljak li ya.

²² Jonathanni badukhung kiphil li ya, Solni sengbo bukcha kiphil li ya, phan gwnangrokno tantharwi, arirokno buthar kha.

²³ Sol bai Jonathan belai naithokma tei khájani! Kwthang tongwibo eba thwi thángwibo bórok kak lai ya, bórok tolingni slái kodo, singhorokni slái’-bo phan gwnang kuk.

²⁴ Israilni bwrwirok Solni bagwi kap lai kha. Bo nono rí kuphur naithok kan rw kha. Tei nono rangchakni ganthi kan rw kha.

²⁵ Bahai khe bwkha kotor sengkrakrok bórok choba-o butharjak bai kha! Jonathan nini hathái sakarogo kwthwi klai tong kha.

²⁶ Ang nini bagwi khá hamya wngo, ani takhuk Jonathan, nwng ani bwswk se khájani nini hamjakma bwswk uanamasingcha, bwrwirok hamjakma slái’-bo hamjak kugo.

²⁷ Bahai khe phan gwnang kuk sengkrak klai kha, chobani da-sengrok komor bai kha.