2 PITOR 3 - Kok Borok (Re-edited) Bible (BSI)

Subrai phaina hwnmani

¹ Khájani takhukrok, ang omo bai khe norokno kóktun kangnwi swihor kha. Ang a kangnwi nwi-o’-no o kókrokno muitu khlai rwui norokno kaham khe uansuk rwna nai kha.

² Agi phuru diyari kwtharrok sa langma kókno norok muitu man thung hwnwi ang nai-o, phiya Mwthangnaisa Subrai norokni chonghorrokni khúk tẃi norokno hwnmanobo norok muitu man thung hwnwi ang nai-o.

³ Jotoni slái swkang doroprok omono si di, mol páinanogo sak motók tẃi tongnai omo tẃi bororok phai anw. Bórok norokno mwnwiwi

⁴ hai hwnwi sanai, “Bo phai anw hwnwi kók rw ya diba? Buko bo? Chini chuchusong thwi bai kha, hai phano o swngchar snamjak phuruni simi bebak’-no tongma haino tabukbo ahai’-no tong bai kho!”

⁵ Agi phuru Kaitorni kók bai se ha bai nokha snamjago bórok o kókno si twtwi’-no si ya hai khe tongo. A ha twini’-no snamjago, twi bai’-no snamjago;

⁶ phiya twi bai’-no, twi tor rwma bai’-no agini swngchar sokomorjago.

⁷ Tamo khe tabuk tongmani o ha bai nokha Kaitorni a kók bai’-no kók bai hór bai sokomorjakna bagwi khatijagwi tongo, Kaitorno kiri yarok buj thumjagwi sokomorjaknani salni bagwi tonjago.

⁸ Khájani takhukrok, norok o kókno ta pok di. Kaitorni thani nokha salsa’-no nokha bisi sai hai, nokha bisi sai’-no nokha salsa hai.

⁹ Baksa bororok Subrai bo kók rwma tẃi’-no khlaina lero hwnwi uansukma hai’-no bo ler ya. Hai wng yaui bo norokno khá logwi tongo; khoroksa phano komor thung hwnwi bo nai ya, bebakno’-no bórokni sumsok yakar thung hwnwi se bo nai-o.

¹⁰ Subraini sal sikhok hai khe se phainai. A Salo nokha gurumsaui kwmaui thángnai, nokhani sal, tal tei athukirirok khamwi tháng bainai, swngchar bai bini aro tongmani bebak’-no kwmaui thángnai.

^11-12 Hakhe omo tẃi khe bebak’-no tháng bainai hwn khe norok bubo tẃi borok wngthai klai? Norok Kaitorni salno naising twtwi, phiya abono dakti’-no phai rwna nai twtwi norok Kaitorni yago yapharjagwi kwthar khe tongthai. A Salo nokha khamwi tháng bainai, hakhe a tungma bai nokhani sal, tal tei athukirirok geleui tháng bainai.

¹³ Chwng khe Kaitor rwna hwnwi kók rwmani a ha kwtal bai nokha kwtalno naisingwi tongo, aro se borok kahamrok tong bainai.

¹⁴ Aboni bagwi khájani takhukrok, a Salno naisingwi tongma tẃi’-no Kaitorni bwskango kwthar khe majra kwrwi khe tongna nai di, phiya bo bai kwchang kwchang khe tongna nai di.

¹⁵ Chini Subrai norokno khá lokmani abo norok mwthangjaknani lama se hwnwi si di. Chini khájani takhuk Polbo Kaitor bono rwmani elem bai norokno omo tẃi kók swihor kha.

¹⁶ Bo o kókno tẃiwi swi brúm brúm omo hai kheno swi-o. Bini kóktunrogo kisa kók kuthuk tongo; borok si yarok bai borok helengrok a kókrokno kók juda khe swbaiwi sa-o, bórok elembakni tei kókroknobo abo hai khe sa-o. Omo tẃi khe’-no bórok thwina lama tano.

¹⁷ Khájani takhukrok, norok omono saui manjak. Hakhe kók khna ya bororokni cha ya bai lama koró rwjak yaui norok kwrak khe tongmani aroni khiklaijak ya tẃi khe hus khe tong di.

¹⁸ Norok chwngno Mwthangnai Subrai Jisu Khristoni khairokmano teibo si rwrwk di, bono teibo saui man rwrwk di. Tabukni simi mol brúm brúmno bo chẃngsacha wng thung. Amen.