2 BOSONG 7 - Kok Borok (Re-edited) Bible (BSI)

Nokthar yapharmani

¹ Solomon bini surima pái khe chuknohani hórjlai nongkhorwi phaiwi sógwi yapharmung tei yapharmungrokno khampraui tei noktharo Subraiyungni chẃngsacha bai kupulung wng kha.

² Nokthar bisingo Subraiyungni chẃngsacha bai kupulung wngmani bagwi ochairok nok bisingo habwi man li ya.

³ Bebak Israil bororok chuknohani hórjlai phaiwi nokthar bisingo Subraiyungni chẃngsacha bai kupulung khe nuk khe, bórok ha-o bokhorok bomwi khulum lai kha tei hai hwnwi Subraiyungno hambai rw lai kha, “Bo belai kaham tei bini hamjakma mol brúm brúm tong phlai-o.”

⁴ Hakhe bugra tei bebak bororok Subraiyungni thani yapharmung yaphar lai kha.

⁵ Habugra Solomon 22,000 musuk beres, 120,000 merarok yapharmung yaphar kha. Hakhe habugra tei bebak bororok Kaitorni noktharno yaphar lai kha.

⁶ Ochairok bórokni chongjak jidolo bacha lai kha, Lebirokbo Subraiyungno hambai rwjaknai hwnwi habugra Daud bórokno rwmani tammungrok bai khe bacha lai kha, tamni hwn ba bini hamjakma mol brúm tong phlai-o, bórok bai khe se Daud yapharmung yapharo, bórok tei kaisa bwkhago ochairok totro sup lai-o tei bebak bororok khe bacha laiwi tong lai-o.

⁷ Solomon Subraiyungni nok bwskangni nokhlani kwcharno kwthar khlai kha, hakhe bo aro sógwi yapharmung bai khakchangma yapharmungrok yaphar kha, tamni hwn ba Solomon snammani pitolni háyá-o sógwi yapharmungrok tei mai yapharmungrok tei buphamrok chak súk ya.

⁸ A jora-o Solomon bebak Israilni bororok bai khe salsni chámung panda khlai lai kha, phainairok Lebohamatni Ijipni twisani borok kwbángma tongo.

⁹ Bórok salsni háyá-o yapharmani panda tei salsni chámung panda khlai kha. Salcharni salo khe bórok páithakni panda khlai kha.

¹⁰ Teini salo, talsni talni 23 salo, Solomon bororokno bórokni nogo kiphilwi rohor bai kha. Bebak Israil bororokni saka-o, Daudni thani tei Solomonni thani Subraiyungni hamarini bagwi bórok tongthok lai kha.

Kaitor Solomonni thani tei uáisa nukjakmani

¹¹ Abo hai khe Solomon bo chongmani tẃi khe Subraiyungni nokthar bai bini noyung kaham khe tangwi páiwi man kha.

¹² Hakhe Subraiyung Solomonni thani horo nukjagwi bono hai hwnwi sa kha, “Ang nini surima khna kha tei ang o nogo ani thani yaphar mung yapharjak si thung hwnwi chong kha.

¹³ Ang uatwi rohor ya wng khe eba mairok cháui sokomornani kúkthorarok rohor khe eba ani bororokni thani bok rohor khe,

¹⁴ tumung ani bororok koinene khe ani mungwi ringwi suri khe tei ano naituk khe phiya bórok samung hamya khlaimarokno khibiui kiphilwi phai khe, hakhe ang chuknoha-o tongwi khnanai tei bórokni sumsokno nakarnai tei bórokni hano ham rwnai.

¹⁵ Tabuk o nogo surimano khnanani bagwi ani mokol kaiwi tei khunju kwkrwk khe tongnai.

¹⁶ Tamni hwn ba ani mung mol brúm brúm tong thung hwnwi ang o nokno chongwi kwthar khlai kha, ani mokol tei ani bwkha oro máng kaichomwi tongnai.

¹⁷ Nwng nini nwpha Daud hai khe bebak ani dagimarok, raidarok tongma tẃi kaham khlaiwi tong khe,

¹⁸ hakhe nini nwpha Daudni thani, ‘Israil ha-o bugra chánani cho glak,’ hwnwi ang swmai tangmano khlainai.

¹⁹ “Phiya ba nwng uphilwi ani raidarok tei ang dagimarokno yakarwi kubun mwtairokni thani thángwi bórokno khulum khe,

²⁰ aphuru khe ang nono rwmani hani nornai tei ani mungni bagwi kwthar khlaimani o nokno yakarnai tei bebak bororokni thani abono kók thesra sa laijaknai khlai anw.

²¹ “Bororok gana tẃi lái phuru nokno nugwi lobsanairok, ‘Tamo wngwi Subraiyung ba o hano tei nokno abo hai ma khlai lang?’ hwnwi mwlang chaui ma sa anw.

²² Aphuru khe bórok hai hwnwi ma sa anw, ‘Tamni hwn ba bórok Subraiyung ha Ijipni tẃitherwi tubunai bórokni chuchusongni Kaitorno yakar bai kha tei kubun mwtairok naui bórokno khulum lai kha, mon lai kha; aboni bagwino bo bórokni saka-o omo hai hamya klai rw kha.’ ”