2 BOSONG 3 - Kok Borok (Re-edited) Bible (BSI)

¹ Hakhe Solomon Moria hachukni Jerusalemo Subraiyungni bagwi nok tangna cheng kha, abo bini bupha Daudni thani Subraiyung nukjagwi Daud chongjakmani, Jebuso tongnai Araunani khampar klai-o.

² Bo habugra chámani nokha bisi brwini talnwini talo samung tangna cheng kha.

³ Omono wng kha habugra Solomon Kaitorni nokthar tangmani kosongo 27 mitar kolok tei kebengo khe 9 mitar kolok.

⁴ Duglam khe nok kebeng uarmaswkno mitar 9 ká-o, chukmani khe mitar 54. Bo bisingo khe rangchak kaham bai tang kha.

⁵ Bo nok bisingo khe sidar buphang bai snamjak deualo rangchak kaham bai bólwi rw kha tei khajuri phang snamwi aro naithok khe sikol hai khe snamwi kha.

⁶ Habugrani noyungno naithok khlaina bagwi morokma holongrok bai snam kha. Bo rangchak samungo phnangmani khe Parbaimni nahormani se.

⁷ Hakhe bo nokni phaklairok, dugarni buphangrok, deual tei dugarrok rangchak bai snam kha tei chokdeualo cherub tankhurwi rw kha.

⁸ Nok bisingni kwthar kuk khotolno khe; nok uarmano naiwi kebeng uarmani muk 20 tei kosongbo muk 20 khlai kha, phiya abono 20 metrik ton rangchak kaham bai khe a khotolno bólwi rw kha.

⁹ Khilirok snammani 570 gram rangchak nang kha, sakani khotolo bo rangchak bai’-no snam kha.

¹⁰ Bo khotol kwthar kugo buphangni khe maknwi cherub snamwi rangchak bai khobwi rw kha.

¹¹ Cherubni bwkrang kangnwi lokmani muk 20 ká-o, swkang cherubni bwkrang mukba, abo nokni chokdeualo nangjak, aboni tei bwkrang kangsa mukba, abo tei masa cherubni bwkrang bai nang laijak.

¹² Abo hai kheno tei masa cherubni bwkrang mukba nokni deualo nangjak, aboni tei kangsa bwkrang khe mukba, aboni bwkrang swkangni cherubni bwkrang bai nanghor laijak.

¹³ O cherubrokni bwkrang muk 20 ká-o. Bórokni yakung bai bachajak tei nok bising phaisingo nahar laijak.

¹⁴ Solomon kaisa rí swngjak kwkhrang, phantokbarni tei kwchak bai khe aro cherub snamwi rw kha.

Kongnwi pitolni thongla

¹⁵ Nokni bwskango bo thongla kongnwi snam kha, abórok muk 35 ká-o, aboni bokhorok bebakno mukba ká-o.

¹⁶ Bo sikol hai khe mala snamwi thonglani bokhorogo khachi kha, bo kolsara dalim bwchlwi hai khe snamwi sikolo subwi rw kha.

¹⁷ Bo noktharni bwskango a thonglarokno kái kha; kaisa salgrabai-o tei kaisa khe salsibai-o; salgrabai bwkhaknino khe Jakhin hwn jago tei salsibainino khe Boas hwnjak kha.