2 BOSONG 27 - Kok Borok (Re-edited) Bible (BSI)Judani habugra Jotham ( 2Ha 15.32-38 ) 1 Jotham nokha bisi nwichiba umoro habugra chána chengwi Jerusalemo nokha bisi chidok jora bugra chá lang kha. Bini buma wng kha Sadokni bwsajwk Jerusa. 2 Bo bini bupha Ujia khlaimani hai khe bo Subraiyungni mokolo chajakmani haino khlai kha, phiya ba bo Subraiyungni nogo tháng li ya. Phiyaba bororok samung hamyano tanglaima thaklai li ya. 3 Jotham Subraiyungni nokni sakani duglam tang kha tei Ophel chokdeualbo kwbángma tang kha. 4 Teibo bo Judani hathái kami-o kamiyungrok tang kha tei bolongrogo sengkrakrokni nok tei nok kuchukrok tang kha. 5 Bo Ammonsarokni habugra bai choba nang laiwi bórokno mechen kha tei Ammonsarok a bisi-o sara rukphai talen, Kg. 1800 gom tei Kg.1800 barli ma rw kha. Abo hai khe máng bisik tham jora abo swk ma rw kha. 6 Hakhe Jotham phan wngwi bacha kha, tamni hwn ba bo Subraiyung bini Kaitorni kókno khna-o. 7 Aswk Jotham samung khlai langmani, choba nang laimani, bini himmarok Israil bai Judani habugrarokni bijabo swijak tongo. 8 Jotham nokha bisi umor 25 phuru-o habugra chána chengwi Jerusalemo nokha bisi chidok jora habugra chá lang kha. 9 Jotham thwi khe Daudni kamiyungo phobjak kha, bini bwsla Ahas bini yakchu-o habugra chá kha. |
Kok Borok Bible (Re-edited), Baibel Kwthar
Copyright © 2017 by The Bible Society of India
Used by permission. All rights reserved worldwide.
Bible Society of India