2 BOSONG 25 - Kok Borok (Re-edited) Bible (BSI)

Judani habugra Amajia

¹ Amajia nokha bisi umor 25 phuru-o habugra chána chengwi Jerusalemo nokha bisi 29 jora habugra chá lang kha. Bini buma khe Jerusalemo tongnai Jehoadan.

² Bo Subraiyungni mokolo chajakmani haino khlai kha, hai phano bwkha kaham bai wng súk ya.

³ Bini phan wng khe bini buphano butharnai selengrokno buthar kha.

⁴ Phiya Musini bijabo raida swijak tongmani hai khe bo bórokni bwsarokno buthar li ya, Subraiyung hai hwnwi dagi-o, “Bwsarokni bagwi bupha butharjak glak, eba buphani bagwi bwsarok butharjak glak; phiya ba borok jotonono sak sakni sumsok bai se ma thwinai.”

Idom bai choba nang laimani

⁵ Hakhe Amajia bebak Juda bai Benjaminni bororokno thumwi bosong tẃi khe 1,000-rokni tei 100-rokni sengkrak bokhorok chongwi rw kha. Abo nokha bisi 20 tei aboni kwbáng kukrok khopjago, bebagwi khorok 300,000 borok saiwi najak, bórok choba nang laiwi mano tei bórok olongarok tei phuirok bai nang laiwi mano.

⁶ Bo 100 talenni rangchak rwui Israilni khorok 100,000 sengkrakrokno nahor kha.

⁷ Phiya ba khoroksa Kaitorni borok bini thani phaiwi sa kha, “O habugra, nwng Israilni sengkrakrokno nini logi-o ta tlang di, tamni hwn ba Subraiyung Israilrok bai tei Ephraimrok bai tong ya.

⁸ Tumungno nwng bórokno tlangwi thángwi kirima kwrwi khe choba nang lai phano, Subraiyung nono nini kena arirokni yago mechennai, tamni hwn ba chubanani eba mechen rwnani Kaitorni phan tongo.”

⁹ Amajia Kaitorni borokno sa kha, “Hakhe ang Israilni sengkrakrokno rukphai 100 talen rwmani tamo khlainai?” Kaitorni borok hai hwnwi sa kha, “Subraiyung nono aboni slái teibo kwbáng kuk rwui mano.”

¹⁰ Hakhe Amajia Ephraimni phai bainai sengkrakrokno nogo tháng bai di hwnwi saui rohor kha. Bórok belai khe Judano joliui nogo kiphilwi tháng bai kha.

¹¹ Tamo khe Amajia bwkha kwrak khe bini sengkrakrokno Sóm harungo tlang kha, aro bo choba nang laiwi khorok 10,000 Idomsarokno buthar kha.

¹² Judani bororok tei khorok chisai borokno kwthang khe rom kha, bórokno holongdap kotor ma saka-o tlangwi, aroni bórokno khiklai rwui rohor khe bórok cheke-chakai wngwi thwi bai kha.

¹³ Phiya ba Amajiani logi-o choba-o ma tháng ya Israilni sengkrakrok Samariani simi Bet-horon jora Judani kamiyungrokno choprok laiwi borok khorok 3,000 butharwi kwbángma manwirok na lai kha.

¹⁴ Amajia Idomsarokno butharwi kiphil khe, bo bórokni mwtairokno tubu-ui abórokno khulum kha tei yapharmung yaphar kha.

¹⁵ Subraiyung Amajiano belai joli kha tei bini thani diyari khoroksano rohor kha, bo bono hai hwnwi sa kha, “Nwng tamni bini bororokno nini yakni phiyógwi man ya abo tẃi buini hani mwtairokno ma khulum?”

¹⁶ Phiya ba bo kók saui tong phuru khe habugra bono hai hwnwi sa kha, “Chwng nono habugrani kók phrwngnai de snam kha ba? Thak di! nwng tamni butharjakna muchung?” Hakhe diyari kók sama thak kha, tamo khe bo hai hwnwi sa ka, “Ang saui mano, Kaitor nono sokomorna hwnwi bwkha chabwi pái kha, tamni hwn ba nwng omo hai samung khlaiwi ani kókbitino khna li ya.”

Israil bai choba

¹⁷ Hakhe Judani habugra Amajia kókbiti naui Israilni habugra Jehoahasni bwsla tei Jehuni busuk Joasno tẃitun rohorwi, “Phai di, chwng mwkhang dak-dak khe nang lai anw,” hwnwi sa hor kha.

¹⁸ Israilni habugra Joas, Judani habugra Amajiani thani hai hwnwi sa hor phi kha, “Kaisa Lebanonni busulwng sidarno hai hwnwi sa hor kha, ‘nini bwsajwkno ani bwsla bai kái di;’ hakhe bolongni yabrwi masa yang tẃi thángwi busulwngno kádulwi klang kha.

¹⁹ “Nwng hai hwnwi sa kha, ‘Nai di, ang Idomsarokno mechen kha,’ abo bai nwng belai khe kung chuk kha. Tabuk khe nwng nogo tong di; tamni bagwi nwng tei nini logi-o Juda ma komornai?”

²⁰ Phiya ba Amajia khna li ya, bini arirokni yago yapharna bagwi Kaitor chong kha, tamni hwn ba bórok Idomni mwtairokno khulum kha.

²¹ Hakhe Israilni habugra Joas, Judani habugra Amajia bai choba nang laina nongkhorwi thángwi ha Judani Betsemeso khoroksa tei khoroksa bai malai lai kha.

²² Judia Israil bai mechenjak kha tei bórok bebakno bini nogo khárwi ma tháng kha.

²³ Israilni habugra Joas, Judani habugra Amajiano Betsemeso kasu-ui rom kha tei bono Jerusalemo tubu kha tei Jerusalemni chokdeualno Ephraimni duglamni simi Busuni duglam jora muk nwira swbaiwi khibi kha.

²⁴ Bo bebak Kaitorni nok bisingo nukmani rangchak, rukphai tei bebak manwirokno tei Obed-Idomno tlang kha; bo teibo habugrani noyungni rangkhókrokno tei bebak bororokno khaui Samaria-o tlang bai kha.

²⁵ Joasni bwsla Judani habugra Amajia, Jehoasni bwsla Israilni habugra Joas thwimani ulo tei nokha bisi chiba jora thangwi tong kha.

²⁶ Tei Amajia aswk samung khlai langmani yaphangni simi páithak jora Judia tei Israilni habugrarokni bijabo swijak tongo.

²⁷ Bo Subraiyung bai kagwi tháng phuruni simi Jerusalemo bono kebengwi bacha khe, bo Lakhiso khárwi tháng kha, phiya ba bini arirok bono rwktharwi aro buthar kha.

²⁸ Bini mangno korai saka-o khe Jerusalemo tubujak kha, hakhe bo Daudni kamiyungo bini buphasong bai baksa phobjak kha.