2 BOSONG 2 - Kok Borok (Re-edited) Bible (BSI)

Nokthar tangna bagwi tiyar khlaimani

¹ Tabuk Solomon Subraiyungni mungwi nokthar khungsa tei bini bagwi noyung tangnani chong kha.

² Bo borok khorok 70,000 no manwirok tẃinani, khorok 80,000 hathái-o holong tokhrupnani tei khorok 3600 borokno khe samung tangnairokno nainani chong kha.

³ Solomon Turni habugra Hiramno hai hwnwi kók sa hor kha, “Nwng ani apha Daudno bini bagwi nok tangnani sidar buphang phalmani hai khe ano bo phal di.”

⁴ Nai di, ang Subraiyung ani Kaitorni mungwi nokthar khungsa tangnani nai-o, aro Israilni bagwi mol brúmni khlaina chongjak; satrai motom sógwi yapharnani, thak phlaima kwrwi khe auan kwthar yapharnani tei sal brúm phung-sarik bai tei sabat salo sógwi yapharnani bagwi tei tal kwtalni yapharmung panda bai tei aro Subraiyung chini Kaitor bai chongjak pandarok khlaijaknai.

⁵ Ang nok tangnani naimani khe kotorma wngnai, tamni hwn ba chini Kaitor le tei bebak mwtairokni slái tor kugo.

⁶ Phiya ba sabo bini bagwi nok tangwi mannai? Tamni hwn ba chuknoha kotorma suda bono chak glak. Sógwi yapharmani thaino karwi bini bagwi nok tangwi mannai ang sabo?

⁷ Hakhe tabuk ano rangchak, rukphai, pitol tei sorni kwkhrang, phantokbar tei kwchak rí khlainani bagwi samung tang kwrwngno ano rohor di, bo ani apha Daud chongmani Judia tei Jerusalemni samung tang kwrwngrok bai baksa ma tangnai.

⁸ Ang saui mano nini selengrok Lebanonni buphang tanna rwng bai-o, ano Lebanonni sidar buphang, Saipras tei algam buphangrok ano rohor di. Ani selengrok nini selengrokno chubanai.

⁹ Kwbángma buphangrok ma thumnai tamni hwn ba ang nok tangnani chongmani Kotor tei kwmamsingcha wngnai.

¹⁰ Ang nini selengrokno 2000 metrik ton gom, 2000 metrik ton barli, 400,000 litar arak tei 400,000 litar olibni thok rohornai.

¹¹ Hakhe habugra Hiram hai hwnwi kóktun swiwi Solomonno rohor kha, “Subraiyung bini bororokno hamjakmani bagwi, bo nono bórokni saka-o habugra snam kha.”

¹² Hiram hai hwnwibo sa kha, “Subraiyung Israilni Kaitorno lob di, chuknoha bai hano snamnai, bo habugra Daudno elem gwnang bwsla rw kha, buchimung bai rwngmung kupulung, bo tabuk Subraiyungni bagwi nokthar tei bini sakni bagwi noyung tangnai.

¹³ Ang tabuk Huramno khoroksa tang kwrwng borok tei buchiui mannaino rohoro.

¹⁴ Bini buma khoroksa Dan bosongni tei bini bupha khe Turni borok. Bo rangchak, rukphai, pitol, sor, holong tei buphangni samung tangna kwrwng. Bo kwkhrang, phantokbar rí kwchak tei rí kahamni samung khlaiwi mano. Bo teibo podrepot bumulrok naithok khe, sajakmani hai khe khlaiwi mano. Bo nini samung tangnairok tei nini nwpha Daudni samung tangnairok bai baksa tong thung.

¹⁵ Hakhe tabuk nwng swmai tangmani hai khe gom, barli, arak tei olibni thokrok nini selengno rohor ja di.

¹⁶ Nwng nangmani tẃi’-no chwng Lebanonni buphangrok tannai, hakhe nwng aroni Jerusalemo tlangwi mannai.”

Nokthar tangna chengmani

¹⁷ Hakhe Habugra Solomon Israil ha-o tong bainai bebak buini hani bororokno, bini bupha Daud khlaimani hai khe lekhaui nai kha, bórok bebagwi khorok 153, 600 ká-o.

¹⁸ Bo borok khorok 70,000 rokno manwirok nahorna chong kha, khorok 80,000 bororokno hathái saka-o holong tanna rohor kha tei khorok 3,600 borokno khe samung tangnairokno nainani phrwngnani chong kha.