2 BOSONG 1 - Kok Borok (Re-edited) Bible (BSI)

Habugra Solomon Elemni bagwi surimani

¹ Daudni bwsla Solomon bini hano kaham khe songcha kha tei Subraiyung bini Kaitor bo bai pal tongwi bono kotor khlai kha.

² Habugra Solomon, bebak Israilrokno khorok 1,000-rokni tei 1,00-rokni sengkrak bokhorokrokno, buj thumnairokno tei núkhungni bokhorokrokno sa kha.

³ Aphuru khe Solomon tei bo bai bebak kuthumnairokno bini logi-o Gibeonni khulumma jidolo thángna dagi kha, tamni hwn ba hasing panthoro Subraiyungni seleng Musi snammani Kaitor bai malaimani ríni nok aro tongo.

⁴ Tamo khe Daud Kaitorni swmai bokhokno Kiriatjearimni Jerusalemo tubu kha, hakhe bo rí nok snamwi abono aro ton kha.

⁵ Tei bo pitolni háyá Urini bwsla tei Hurni busuk Bejalel snamlangmani abo Kaitor bai malaimani ríni nokni bwskango tongo, habugra Solomon tei bebak bororok Subraiyungno khulum lai kha.

⁶ Solomon pitolni háyá tongma-o Subraiyungni bwskango thángwi aro mak 1,000 yabrwirokno sógwi yapharmung yapharjak kha.

⁷ Aboni horo Kaitor Solomonni thani nukjagwi, “San di, Ang nono tamo rwnai?” hwnwi sa kha.

⁸ Hakhe Solomon Kaitorno hai hwnwi sa kha, “Nwng ani apha Daudno hamjakma kotor phunuk kha tei bini yakchu-o ano habugra chá rw kha.

⁹ O Subraiyung Kaitor, ani apha Daudni thani swmai tangmano tabuk khlai si di, nwng ano hani hasingsa bai baksa kwbángma bororokni saka-o habugra snam kha.

¹⁰ Hakhe tabuk ano o bororokni saka-o bugra chánani elem tei rwngmung rw ja si di, wng ya khe nini aswk borok kwbángmano methebwi man glak?”

¹¹ Kaitor Solomonno hai hwnwi sa kha, “Abo hai nini bwkha-o tongma bagwi nwng gwnang wngnani rang-rírok, bórom, nono naislernairokno butharnani tei ayuk kolok wngnanino san yaui nono habugra chongmani ani bororokni saka-o bugra chánani bagwi elem tei simung se si-o,

¹² ang nono elem bai simungno rw kha teibo rang-rírok tei bórom bebakno rw kha, nini slái swkango habugra chá langnairok tei nini ulo habugra chá phainairok nwng hai wngwi man glak.”

Habugra Solomonni phan tei rang-rírok

¹³ Hakhe Solomon Gibeonni Kaitorno khulumma jidoloni tei Kaitorno monmani ríni nokni Jerusalemo phai kha. Bo Israilo habugra chá kha.

¹⁴ Solomonni korai 1400 malkhungrok tei 12000 korai kasanai sengkrakrokno thumwi kha, bo baksano khe korai malkhungni kamiyungo tei baksano khe Jerusalemo bo bai narwk kha.

¹⁵ Habugra bini jora-o rangchak bai rukphaino holongrok hai khe tei sidar buphangrokno khwichang buphangrok Judani hachuk yaphango manthok rw kha.

¹⁶ Solomonni korairok Ijip tei Kueni paiwi nahorjak bai-o.

¹⁷ Bórok ha Ijipni korai malkhung kaisa 600 rukphai belep bai tei korai masa 150 rukphaini belep bai nahoro, abo hai khe bórokni yak tẃi khe bebak Hiti tei Siriyani habugrarokni thani phaljago.