1 TIMOTHI 6 - Kok Borok (Re-edited) Bible (BSI)

¹ Joto selengrok sak sakni nokphangno bebago’-no kotor hwnwi khá ka thai, omo tẃi khe khoroksa phano Kaitorni mungnobo chini phrwngmanobo hamya hwnwi sa glak.

² Poito gwnangrokni selengrok sak sakni nokphangno Khristan takhuk hwnwi sak nang ya wngthai kwrwi. Hai wng yaui bórok teibo kaham khe se samung tang thung, tamni hwn ba bórokni samung bai chánairok wng kha bórok hamjakmani poito gwnangrok. Nwng o kókrokno phwbo phrwng di, sabo sa di.

Kók cha ya phrwngmani

³ Chini Subrai Jisu Khristoni kók kubuino, phiya chini tongtharni kók kahamno nai yaui kók juda phrwngnai borok

⁴ bo kung chugui torsajak, mungsa phano si ya. Bo uansukma hamya bai kókmung tẃiwi kók báng laiwi uálaina muchungjago, abo bai bororok músú lai-o, kak lai-phui lai wng lai-o, hamya sa lai-o, buino haino thari lai-o,

⁵ kók bángwi tong lai-o; omo tẃi bororok bwkha sitra, bórokni thani kubui kwrwi; bórok tongtharno gwnang wngnani lama hwnwi uansugo.

⁶ Kók khe sói’-no, khoroksa swk bini tongma tẃi’-no khá kochomwi tong khe tongthar a borokno belai gwnang khlai-o.

⁷ Chwng o swngcharo tamo tubu kha? Mungsa buya. Chwng o swngcharni tamo tlangwi man? Mungsa buya.

⁸ Aboni bagwi chini chámung-nungmung bai rí-chum tong khe w se wng kha.

⁹ Gwnang wngna nainairok belokjago, hakhe bórok si yaui hamya muchungmarok bai khẃi-o kwcha-o; abo tẃi muchungmarok bai bororok khiklaiwi gaija rwjago.

¹⁰ Rangno belai mokol chẃngmani abo wng kha bebak hamyani yaphang. Baksa baksa belai rang manna muchungwi poito khibiui tháng bai kha, hakhe podrepot khe khá hamya wngwi khá thwijak bai kha.

Kók páithak

¹¹ Nwng le Kaitorni borok ba omo tẃirok khibi di. Kaham wngna nai di, Kaitorno suriui tongna nai di, poito khlaina nai di, hamjakna nai di, khá lokna nai di, kwchang kwchang khe tongna nai di.

¹² Nwng poito kwrak khe kaham khe batai di. Hakhe nwng mwthangjak phlainai; nwng aswk borokni bwskango nini poito khlaimano phunuk phuru omo tẃi khe mwthangna bagwi Kaitor nono ringo.

¹³ Bebakno mwthangnai Kaitorni bwskango, phiya Ponti Pilatni bwskango kubuini bwkhak bachanai Khristo Jisuni bwskango ang nono hai hwnwi hwno:

¹⁴ Chini Subrai Jisu Khristo nukjaknani sal sók phai ya sak a dagima hai’-no tong di, kwthar khe majra kwrwi khe tong di.

¹⁵ Jora sók phai khe Kaitor bono phunuk anw bo wng kha hamchajak Kaitor, bo simi se Bokhorok, bo bugrarokni Bugra, bokhorokrokni Bokhorok.

¹⁶ Bo simi se thangblang; khoroksa phano habwi man ya abo tẃi kwchango bo tongo. Khoroksa phano bono nuk ya kho, khoroksa phano bono nuk glak. Bo bórijak thung, bo mol brúm brúm kwplai wng thung! Amen.

¹⁷ O swngcharni manwirokno tẃiwi gwnangrokno borok ta tor di hwn di; tini tong khe khwna kwrwi abo tẃi rang-rírokno khá bera yaui chini khá kwchangni bagwi yak kuar khe bebak rwnai Kaitorni thani se khá bera di hwn di.

¹⁸ Bórokno samung kaham khlai di hwn di, samung kaham se báng rw di hwn di, yak kuar khe buino rw di hwn di.

¹⁹ Omo tẃi khe’-no bórok ulni bagwi khatima klai-o, a khatimani abo nokthai kwrak hai wngnai. Hakhe bórok sói kubui khe thangwi man anw.

²⁰ O Timothi, nini yago yapharmano nwng kaham khe ton di. Baksa borok si ya phano “Chwng si-o,” hwnwi o swngcharni kók nang ya saui kók báng laiwi tongo, bórok bai ta tong di,

²¹ tamni hwn ba omo tẃi khe chwng si-o hwnwi tongma bai baksa baksa poitoni lama korójak bai kha. Kaitor norokno khairok thung.