1 TIMOTHI 3 - Kok Borok (Re-edited) Bible (BSI)

Mothani bokhorokrokni kók

¹ O kók khe sói’-no: khoroksa swk mothani bokhorok wngna muchung khe bo samung kaham khlaina muchungjago.

² Mothani bokhorok bo majra kwrwi wngthai; bihik khoroksa’-no wngthai, bo bebago’-no yak lái ya wngthai, bo sak soiwi mannai wngthai, bo borok khom khom wngthai; nogo borok phai khe bo kasa rwnai wngthai; bo phrwngwi mannai wngthai;

³ bo phegwi nung ya wngthai; bo thamchi kutung wng yaui uálai yaui borok kwchang wngthai; bo rangno mokol chẃng ya wngthai;

⁴ bo bini núkhungno kaham khe narwgwi mannai wngthai, phiya bo bwsa-bẃtẃiroknobo kaham khe bini kók khna rwui mannai wngthai.

⁵ Tamni hwn ba khoroksa swk borok bini núkhungno narwgwi man ya hwn khe bahai khe Kaitorni mothano nai mannai.

⁶ Bo Khristan kwtal ya wngthai, wng ya khe bo kung chugui borok tornai, hakhe bo Soitan hai khe majra berjaknai.

⁷ Bo lachi rwjagwi Soitanni khẃi-o klai ya tẃi khe mothani phatarni bororok baibo kaham hwnjaknai wngthai.

Mothani samung khlainairokni kók

⁸ Mothani samung khlainairokbo tongmung kaham tei kók narwknai wngthai; bórok angur bwtwi kwbáng nung ya wngthai, rangni bagwi khámai ya wngthai.

⁹ Chwng poito khlaimani aboni sói sói kókno bórok khá sutrang khe romwi ma tongthai.

¹⁰ Bórok swkang’-no potaliui naijakthai, aro chúk khe bórok samung khlai thung.

¹¹ Bórokni bihiksongbo tongmung kaham wngthai; bórok kók ruju sa ya wngthai; bórok bebago’-no yak lái ya wngthai, bebago’-no kaham wngthai.

¹² Mothani samung khlainaini bihik khoroksa’-no wngthai, phiya bo bwsa-bẃtẃirok bai núkhungno kaham khe narwgwi mannai wngthai.

¹³ Kaham khe samung khlainairok bórok kaham hwnjaknai, phiya bórok Khristo Jisuno poito khlaimano khá torwi saui mannai.

Bisingni kók

^14-15 Ang dakti’-no nini thani thángwi man anw hwnwi khá ka-o. Hai phano ang ler khe chwng Kaitorni núkhungo bahai khe tongthai saui manna tẃi khe ang nono omono swihoro. Subraini a núkhung wng kha Kaitor kwthangni motha, abo kubuino narwknai thongla.

¹⁶ Chini tongtharni bisingni kók bwswk kotor abo joto’-no ma gosi-o. Bo borok wngwi phai kha, bo Phola bai kaham hwnwi sijak kha, bo suarirok bai nukjak kha. Bini kók dopharokni bisingo pírjak kha, bo swngcharni bororok bai poito khlaijak kha, bo chuknoha-o tisaui tlangjak kha.