1 SAMUEL 6 - Kok Borok (Re-edited) Bible (BSI)

Swmai bokhok kiphilma

¹ Subraiyungni swmai bokhok Philistiasarokni ha-o nokha talsni wng kha.

² Hakhe bororok ochairok tei danda-baji phunuknairokno ringwi hai hwnwi sa lai kha, “Subraiyungni swmai bokhokno chwng tamo khlainai sa di? Tei chwngno sa di, abo bai baksa chwng tamono rohornai?”

³ Bórok hai hwnwi sa kha, “Israilni Kaitorni swmai bokhokno kiphilwi rohor khe abono bukcha ta rohor di, norok chini sumsokni bagwi hili rwui rohor di, hakhe norok ham rwjaknai tei bo tamni bagwi norokno sátok kha abo saui mannai.”

⁴ Hakhe bórok, “Chwng bono tamo hili rwui rohornai?” Hwnwi sẃng kha. Bórok hai hwnwi sa kha, “Philistiani habugra bángma swk’-no kaiba kula hai rangchak tei kaiba rangchakni sinjo. Tamni hwn ba norokni aro abo hai khe’-no khorokba habugraroknobo sátok kha.

⁵ Norokni hano sátoknai kula hai tei sinjo hai khe tagwi Israilni Kaitorno lob lai di, hakhe bo norokno norokni mwtaino tei norokni hano sátokma thaknai.

⁶ Tamni norok Ijipsarok hai tei Pharao hai khe bwkha kwrak khlainai? Bo kwmamsingcha khlaimani ulo Israilrokno phiyógwi ma rohor ya diba?

⁷ Hakhe uáisa phano horbak phnangjak ya kho, dut rwnai musukni malkhung kwtal snam di, a musuk bwrwi maknwino malkhungo khe horbak phnangwi rw di, phiya abórokni bwsarokno khe abórok bai swkagwi nogo tlang di.

⁸ Subraiyungni swmai bokhok naui malkhungo ton di, norokni sumsokni bagwi rangchakni hili rohormano bokhokni gana-o tonwi abono rwui rohor si di.

⁹ Hakhe abono naiwi tong di; tumung abo Bet Semes kami kotor bwkhak tháng khe chini saka-o kirimasingcha hamyano Subraiyung se tubu-o, phiya abo a lama tẃi tháng ya khe abo bo khlaima ya, tamo khe haino achomsa wngmani se hwnwi chwng romwi mannai.”

¹⁰ Bórok sajakmani hai’-no khlai lai kha, bórok maknwi dut rwnai musuk naui malkhungo phnangwi rw lai kha tei bwsarokno khe nogo chobwi ton kha.

¹¹ Bórok swmai bokhokno khe malkhungo ton kha tei rangchakni snamjak sinjo bai kula bokhoknobo ton kha.

¹² Hakhe musuk Bet Semes bwkhak tháng kha, abórok lamani yaksi eba yagra ongkhorwi se tháng li ya. Hakhe ha ari Betsemes jora Philistiani habugrarok tháng lai kha.

¹³ Aphuru Betsemesni bororok harungo gom ra lai tong lai-o, bórok achomsa naisaui nai ba swmai bokhokno nuk laiwi belai tongthok lai kha.

¹⁴ Abo Betsemeso tongnai Josuani panthoro malkhung sók phaiwi holong kotor tongma-o bathak phai kha, bórok musuk malkhungno swkagwi tei musukno khe Subraiyungni thani sógwi yapharmung yaphar lai kha.

¹⁵ Phiya Lebirok Subraiyungni swmai bokhokno tei rangchak bokhokno kari laiwi holong kotor saka-o ton lai kha, Betsemesni bororok a salo Subraiyungni thani sógwi yapharmungrok yaphar lai kha.

¹⁶ Philistiani habugra khorokba abono nuk khe bórok a salo’-no Ekrono kiphilwi tháng lai kha.

¹⁷ Abórok wng kha Philistiasarok bórokni sumsokni bagwi Subraiyungno kaiba rangchakni kula rohor lainairok; kaisa khe Asdod, Gaja, Askelon, Gat tei kaisa khe Ekronni bagwi kaisa kaisa khe thwgwi rohor lai kha.

¹⁸ Hakhe bórok kaiba sinjo habugra khorokbarokni kamiyungni bagwi tei kami kotor kwrak bai chokdeual rwjak ya kamirokni bagwi rohor lai kha. Abo Betsemeso Josuani panthoro holong kotorma saka-o bórok Subraiyungni swmai bokhokno tonmani, abo tabukbo aro sakki tong kho.

¹⁹ Betsemesni borok khorok snichirokno swmai bokhok naisonwi naimani bagwi Subraiyung buthar kha. Abo hai khe Subraiyung kwbángma borok butharmani bagwi bororok kap lai kha.

Kiriatjearimo Swmai bokhok

²⁰ Hakhe Betsemesni bororok, “Omo hai Subraiyung kwthar Kaitorni bwskango sabo bachaui mannai? Tei chwng bai hakchal khe bo buro thángnai?” hwnwi sa lai kha.

²¹ Hakhe bórok Kiriatjearimni bororokno tẃitun rohorwi hai hwnwi sa hor kha, “Philistiasarok Subraiyungni swmai bokhokno kiphilwi rohor kha, norok abono phaiwi na phai bai si di.”