1 SAMUEL 26 - Kok Borok (Re-edited) Bible (BSI)

Daud tei uáisa Solno mwthangmani

¹ Aphuru Jipni borokrok Gibea-o phaiwi, “Daud Judia hasing panthorni Hakila hachugo huijagwi tongo,” hwnwi Solno sa lai phai kha. Abo Jesimonni tei babaisa bwkhak.

² Hakhe Sol Israilni kaham kuk khorok thamsai sengkrakrokno tlangwi Daudno rutuknani bagwi Jip hasing panthoro tháng kha.

³ Tei Sol Hakilani hachugo batham khlai kha. Abo Jesimonni lama gana-o. Aphuru Daud hasing panthoro’-no tong kha, Sol bono rutugwi phai kha hwnwi khna khe

⁴ Daud naichomnai rohorwi nai ba Sol kubui’-no phaiwi sók phai kha.

⁵ Daud Sol batham snamthani tháng kha hakhe Sol bini sengkrak bokhorok Nerni bwsla Abner bai roko lai tongmani nugwi kha. Sol bathamni manwi-khwnwirok tong thani rokojak tei abono kitingwi khe bini sengkrakrok roko laijak.

⁶ Hakhe Daud Hitisa Ahimelek bai Joabni takhuk Jeruiani bwsla Abisaino, “Norokni bere sabo ang bai Sol tongmani bathamo thángnai?” Hwnwi sẃng kha. Abisai, “Ang nwng bai thángnai,” hwnwi sa kha.

⁷ Hakhe horo khe Daud bai Abisai Solni bathamo tháng lai kha; aro Sol aro manwi-khwnwirokni kwcharo thu-ui tongmani, bini kolonga khe bini bokhorok gana-o ha-o káijak. Abner bai tei kubun sengkrakrok khe bono kitingwi thu-ui tong bai-o.

⁸ Hakhe Abisai Daudno hai hwnwi sa kha, “Kaitor tini nono nini kena arino nini yago yaphar kha; ano da se dagi si di, tabuk olonga bai khe ang bono uáisa bai yóphlaui ha-o kaisonwi rw sinai. Ang bono tei uáisa yórna nang glak!”

⁹ Tamo khe Daud Abisaino, “Bono hamya ta khlai di, Subraiyung bai chongthar chongjak borokno yak kosonwi sabo majra kwrwi khe tongwi mannai?” Hwnwi sa kha.

¹⁰ Daud teibo hai hwnwi sa kha, “Subraiyung kwthangni mungwi sa-o, bo sak’-no Solno butharnai, eba bini thwinani jora phai khe haino thwinai; wng ya khe bo choba-o thángwi ma thwinai.

¹¹ Subraiyung bini chongjakni saka-o ani yak tisanani bagwi kasu-o. Aboni bagwi bini bokhorok ganani koslu bai twi tilok naui tháng lai sinai.”

¹² Hakhe Daud koslu bai twi tilokno Solni bokhorok ganani naui tháng lai kha. Abono khoroksa phano nubo nuk li ya, sauibo man li ya tei sichanaibo kwrwi kha; bórok bebak kaham kheno thu lai kha. Tamni hwn ba Subraiyung se bórokno muktrwi kaham khe lái rwui ton si-o.

¹³ Hakhe Daud tei kaisa harung barwi thángwi hachuk saka-o bórok bai hakchalo tháng kha.

¹⁴ Daud sengkrakrokno tei Nerni bwsla Abnerno hai hwnwi ring kha, “Abner! Ani khorang da khna kha?” Abner hai hwnwi sa kha, “Habugrano ringhornai nwng sabo?”

¹⁵ Daud Abnerno hai hwnwi sa kha, “Nwng hai borok Israilrokni bisingo sabo tong hai ya de? Hakhe tamni nwng nini habugrano mwrwgwi tong ya wng lang? Tamni hwn ba borok khoroksa nini habugrano butharnani bagwi thángmani se.

¹⁶ Nwng omo hai khlaima cha li ya. Ang kwthang Subraiyungni mung bai swmai tangwi sa-o, nwng butharjakna nangmani, tamni hwn ba nwng Subraiyungni chongjak nini bugrano kaham khe mwrwk li ya. Nai di! Habugrani bokhorok ganani koslu bai twi tilok biyang?”

¹⁷ Sol Daudni khorang hwnwi saui manẃi, “Abo ani sajla Daud de?” Hwnwi sẃng kha. Daud, “I’n angno o ani bugra,” hwnwi sa kha.

¹⁸ Bo teibo hai hwnwi sa kha, “Nwng tamni nini selengno tabuk suda riphrigwi ma tong? Ang tamo hamya khlai kha? Ang tamo samung cha ya tang kha ba?

¹⁹ Aboni bagwi tabuk nini o selengni kókrokno khna ja di. Tumung Subraiyung’-no nono, ano kebeng rwui bacha rw khe ang bono yapharmung yapharmani abo yachakjak thung. Phiya abo borokni samung wng khe Subraiyungni swraimung bórokni saka-o klai thung, tamni hwn ba bórok tini ano Subraiyung rwmani ani manthai hani ano rwkhlai rohorwi ‘Tháng di kubun mwtai-atairokno monwi di’ hwn kha.

²⁰ Abo baino Subraiyung bai kakjak hakchalma ha-o ano ta buthar ja di. Israilni habugra se bolongni tokrokno rutukma hai khe yóngsa masano rutugwi ongkhorwi phai si-o.”

²¹ Aphuru khe Sol hai hwnwi sa kha, “Ang cha ya khlai kha, kiphil si di, o ani sajla Daud, ang nini tei mungsa hamya khlai glak, tamni hwn ba tini nwng ani langmano torjagwi phiyók kha; ang se butua wngwi samung cha ya khlai kha.”

²² Daud hai hwnwi sa phi kha, “Iko oro se nini koslu o bugra! nini borok khoroksa phaiwi abono na phai di.

²³ Subraiyung bini borok kaham tei kók narwknaino sokat rw-o, tamni hwn ba Subraiyung tini nono ani yago yaphar kha, hai phano ang Subraiyungni chongjakni saka-o yak tisa li ya.

²⁴ Tini nini langma ani thani kotor wng tẃi’-no ani langmabo Subraiyungni mokolo wng thung tei ano birmanrokni phiyók thung.”

²⁵ Aphuru khe Sol Daudno hai hwnwi sa kha, “Ani sajla, nwng hamari rwjak thung! Nwng samung kwbángma khlainai tei abórok cha bainai.” Hakhe Daud bini lama-o tháng kha tei Solbo bini nogo kiphilwi tháng kha.