1 SAMUEL 25 - Kok Borok (Re-edited) Bible (BSI)

Samuel thwimani

¹ Hakhe tabuk Samuel thwi kha; tei Israilrok bebak thansa wngwi bini bagwi kap lai kha. Hakhe bórok Rama-o bini nogo bono phob lai kha. Aboni ulo Daud Paran hasing panthoro tháng kha.

Daud bai Abigail

² A jora-o Maono borok khoroksa tongo, bo Karmelo samung-humung khlai-o. A borok belai rang gwnang; bini mak 3,000 merarok tei mak 1,000 punrok tongo. Bo bini merarokno Karmelo buikhumu ra-o.

³ A borokni mung khe Nabal tei bihikni mung khe Abigail. Bini bihik khe belai bwrwi naithok tei elem kwrwng, bo khe borok cha ya, thamchibo kutung, bo Kaleb bosongni borok.

⁴ Daud hasing panthoro tong phuru Nabal bini merarokno buikhumu ramani kókno khna kha.

⁵ Hakhe Daud khorokchi siklarokno bini thani rohorwi a siklarokno hai hwnwi sa kha, “Karmelo thángwi Nabalni thani tháng di tei ani mung bai bono khá kaham yaphar di.

⁶ Nwng bono o kók sa di, ‘Khakchang di tei nini núkhung khakchang thung tei nwng bai bebak tongnai khakchang thung.’

⁷ Ang aro nini merarokno buikhumu ra-o hwnwi khna kha, phiya nini mera mwrwknairok chwng bai se tongo, chwng bórokni mungsa hamya khlai ya, bórok Karmelo tong sak bórokni mungsa swk phano kwma trwng ya.

⁸ Nwng nini siklarokno abono sẃng khe nono abono bórok sa anw, aboni bagwi ani bororok nini thani yachakjak thung, tamni hwn ba chwng ter salo se phai-o. Nini yago tongmano nini selengrokno tei nini sajla Daudno rw ja di hwnwi koi ja-o.’ ”

⁹ Daudni bororok Nabalni thani phaiwi Daudni mung bai o kókrokno sa lai phai kha; hakhe bórok aro naising laiwi tong kha.

¹⁰ Nabal Daudni selengrokno hai hwnwi sa kha, “Daud sabo? Jisaini bwsla sabo? Tabukni salo kwbángma selengrok bugrani aroni khárwi thángnai tongo.

¹¹ Ang ani mera buikhumu ranairokni banta auan, twi tei muihanrokno naui ang sini ya bororok phai khe de ma rwnai?”

¹² Hakhe Daudni bororok kiphilwi thángwi Nabal samani kókrokno saui kha.

¹³ Daud bini bororokno hai hwnwi sa kha, “Norok jotono sak sakni seng bwchango khaui na di!” Hakhe abo hai khlai bai kha. Daudbo haino bini seng tiyar khlai kha; borok khorok brwira swk Daud bai tháng lai kha tei manwi-khwnwirok bai khe tei khorok nwira tong rwk kha.

¹⁴ Nabalni sikla khoroksa Nabalni bihik Abigailno hai hwnwi sa kha, “Hasing panthoro tongwi Daud chini bugrano tẃitun rohorwi chini bugrano khá kaham sahorma se bo bórokno mwkhang sók kha.

¹⁵ Phiya ba a borok chwng bai halok kaham khe se tongo, chwng bórok bai panthoro thángwi tong phuru chini mungsa debo dera ya tei mungsa phano kwbo kwma ya;

¹⁶ Hopung sapung chwng mera mwrwgwi tong phuru bórok chwngno kati rwui tono.

¹⁷ Hakhe tabuk aboni bagwi nwng uansugwi nai di, nwng tamo khlaiwi man nai di, wng ya khe chini bugrani saka-o tei bebak bini núkhung hamya-o klai anw; bo aswk khe thamchi kutung, khoroksa phano bono kók tháisa saui se man ya!”

¹⁸ Hakhe Abigail dodro lep nwira auang, kainwi mui bukur sola kupulung arak, mera mak bani bahan, kilo 17 bwchlwi yókjak, chu sara angur bwthái kwran tei kainwira khwichang kwranni auang naui abórokno koraichirka saka-o boksaui

¹⁹ bini selengrokno, “Norok ani slái swkang thángsok di; ang norokni utung-utung phainai,” hwnwi sa kha. Phiya ba bo bini bwsai Nabalno mungsa sa li ya.

²⁰ Bo koraichirka saka-o kasaui hatháini ongkhor lai phai tong phuru Daudbo bini bororok bai tei babaisa hatháini bini phaising ongkhor lai phaimani. Hakhe Abigail bo bai dadak-didik wng lai kha.

²¹ Aphuru Daud hai hwnwi kha, “Ang o hasing panthoro kwrwi kwrwini se a borokni mal-matarokno masa phano kwmaui tháng ya tẃi khe mwrwkma klai si-o. Ang le bini kaham khlaima se yang bo khe ano hamya se khlai si-o.

²² Khwna phungni bisingono ang bini nokni bebak chwlarokno tong kwrwi butharwi man ya khe Kaitor ano buthar thung.”

²³ Abigail Daudno nuk kheno bo dodro dodro koraichirka sakani ongkhorwi Daudni yakung yaphango botok khe klaiwi khulum kha.

²⁴ Hakhe bo Daudni yakungo klaiwi hai hwnwi sa kha, “O bugra, bebak cha ya ani se, nini o selengjwkni kók kisa khna ja di!”

²⁵ Ani bugra, Nabal bokhorok hamyani kókno ta khna thung, bo le bini mung haino borokbo; bo butua hwnjakmaniba butua’-no, nini selengrok tháng phuru ang bai malai li ya.

²⁶ Hakhe o ani bugra, ang Subraiyung Kwthang tei nini mungwi swmai tangwi sa-o; nini kena arirok tei nono hamya khlaina nainairokbo Nabal hai ma wng thung.

²⁷ Hakhe tabuk nini o selengjwk yapharmung tubumano yachagwi nono rwktharnai siklarokno rw ja di.

²⁸ Nini selengjwkni cha yano khairogwi nakar ja di; Subraiyung nono sóino habugra chá rwnai, tamni hwn ba nwng Subraiyungni wngwi choba nang lai-o, nwng kwthang tong langsak nini mungsa hamya khlaijak glak.

²⁹ Tumungno khoroksa swk nono kebengwi bachaui butharnani nai khe Subraiyung nini Kaitor nono rang gola morok mwrwgwi kati rwui tong tẃi khe tonnai; tamo khe nini kena arirok khe ha dulsa norjak tẃi khe norjaknai.

³⁰ “Ani bugrano hamari rwna hwnwi Subraiyung kók rwma tẃi’-no rw bainai tei Israilrokni bugra snamnai,

³¹ hakhe nwng buino ahai’-no buthar phano eba yagul su phano mungsa khá-o ta nangjak di eba wngjak di; tamo khe Subraiyung nono hamari rw phuru khe nini o selengjwkno muitu khlai ja di.”

³² Daud Abigailno hai hwnwi sa kha, “Subraiyung, Israilni Kaitorno hambai, bo nono ang bai malainani bagwi rohor kha!

³³ Nini uansukmung buj thummung hamchajak, nwng hamchajak, tamni hwn ba nwng tini ano thẃi kochok rwna naimano tei yak baithang yagul suna naimano kasu kha.

³⁴ Kaitor se nono ang yak kosonna naimani yakni kasu si-o. Tamo khe Israilni Kaitorni mungwi ang ma sa-o; tumung nwng ani thani dakti khe phaiwi malai phiya hwn khe khwna phungni bisingo Nabal bai bini núkhungni bororok khoroksa phano tong glak kha mun.”

³⁵ Hakhe Daud a bwrwini yakni bini bagwi tubumano yachagwi bono, “Nogo tháng si di, ta uana di ang naima hai’-no khlainai,” hwnwi sa kha.

³⁶ Abigail nogo kiphilwi tháng kha, yang Nabal khe habugrani chámung panda hai khe se nogo panda khlaiwi tongo. Bo arak kephek wngwi belai khe tongthogwi tong kha, hakhe Abigail bono aiyasani bono mungsa phano sa li ya.

³⁷ Phung ai khe Nabal phekma sra kha hakhe bihik bono bebak kókrok saui khna rw khe bo bwkha-o sundruma hapjagwi holong hai khe borsaui raksaui thángjak kha.

³⁸ Nokha salchini ulo khe Subraiyung Nabalno swprak khe bo thwi kha.

³⁹ Daud Nabalno thwi kha hwnwi khna khe bo hai hwnwi sa kha, “Subraiyung lobjak thung, Nabal ano mwkhang sókmani bo bujsói khlai kha tei bini selengno khe cha ya ma khlainani kati rwui Nabal hamya khlaimani bagwi bono’-no manjak rw kha. Hakhe Daud Abigailno káijakna bagwi borok rohorwi kók sur rw kha.”

⁴⁰ Daudni bororok Karmelo Abigailni thani thángwi bono, “Daud nono bini hik khlaina bagwi tlangnani chwngno nini thani rohoro,” hwnwi sa khe

⁴¹ bo ha-o botok khe klaiwi, “Ang bini selengjwk se, bini selengrokni yakung súnani tiyar se,” hwnwi sa kha.

⁴² Abigail dodro bachaui bini koraichirka-o kasa kha; hakhe bini selengjwk khorokbarokno tlangwi Daudni selengrok bai pal thángwi Daud bai káijagwi kha.

⁴³ Daud Jejrilni bwrwi Ahinoam baibo káijak kha; o khorok nwi’-no bini hik wng kha.

⁴⁴ Yang Sol bwsajwk Mikal Daudni bihikno khe Laisni bwsla Paltino rw kha; bo wng kha Galimo tongnai.