1 SAMUEL 17 - Kok Borok (Re-edited) Bible (BSI)

Goliat Israilrok bai bataimani

¹ Tabuk Philistiasarok choba nang lainani bagwi sengkrakrok Judani Suko-o kuthum lai kha. Bórok Ephesdammim hwnwi kwrẃngsa-o abo Suko bai Ajekani kwcharo batham kha lai kha.

² Tei Sol bai Israil bororok kuthum laiwi Ela harungo batham kha laiwi Philistiasarok bai choba nang lainani bagwi tiyar wng lai kha.

³ Philistiasarok kaisa hathái-o Israilrok tei kaisa hathái-o khe harung bórokni kwcharo khe bacha lai kha.

⁴ Philistiasarokni bisingni Gato tongnai Goliat hwnwi kwplaikuk khoroksa borok phaiwi Israilrokno batai hor kha, bo chukmani muk dok khaksa wng anw.

⁵ Bini bokhorogo khe pitolni thupjaknai tei pitolnino bophor hai chumjak; abo kilo 57 wng anw.

⁶ Bini yakungrokbo haino pitol bai se khopjak tei pitolni jatha bini bangora-o bokjak.

⁷ Bini olonga tei olongani bokhorok hilikmani kaisni kilogram wngnai bini phuino khoroksa sengkrak bini swkango ma tẃi-o.

⁸ Goliat bachaui Israilrokni phaising hai hwnwi chirik kha, “Tamni norok choba nang lainani ongkhor laiwi phai lai? Ang khe Philistia, norok khe Solni seleng ya de? Ang bai nang lainani bagwi norokni bisingo khoroksano chong lai di.

⁹ Phiya ba bo ang bai choba nang laiwi ano butharwi man khe, chwng norokni seleng wngnai, tamo khe ang bono butharwi man khe norokbo chini seleng ma wngnai.”

¹⁰ Philistiasa teibo hai hwnwi sa kha, “Ang tini Israil sengkrakno batai sa-o, ang bai choba nang laina bagwi ano norokni borok khoroksa rw di.”

¹¹ Tei Sol bai bebak Israilrok Philistiasani o kókno khna khe bwkha báijak kha tei kirijak lai kha.

Solni bathamo Daud

¹² Daudni bupha Jisai wng khe Judani Betlehem kami kotorni Ephratha-o tongnai, bini bwsla khorokchar tongo, Sol habugra chámani jora-o bo belai’-no chakra wng kha.

¹³ Bini bwslasongni bere okra khorokthamrok Sol bai baksa choba-o thángo. Choba-o thángnairokni bisingo bwsla khorokthamrokni mungrok wng kha; okra khe Eliab, bini kusu Abinadab tei khoroksa khe Samma.

¹⁴ Daud khe jotoni slái kusu kuk, khoroktham okrarok khe Sol bai tháng kha,

¹⁵ Phiya ba Daud khe jora jora-o Solni arobo thángo tei Betlehemo buphani mera mwrwknani bagwibo tháng thángo.

¹⁶ A Philistiasa abo hai khe máng’-no sal brwichi jora Israilrokno phung ai khe’-no tei sarik sarigo sakno phunuk phunuksa tiro.

¹⁷ Salsa Jisai bwsla Daudno hai hwnwi sa kha, “Kaichi kilo bwchlwi yókjak, auang belep lepchi tlangwi dakti khe nwta song tongmani bathamo tháng di,

¹⁸ tei khoroksaini sengkrak bokhorokni bagwi kaichi dut bothona tlang tháng di, nwtasong bahai tong bai naiwi phai di tei bórokni aroni mungsa swk yakpai mari tubu-ui phai di.

¹⁹ Tabuk Sol tei nini takhukrok tei bebak Israilrok Ela harungo Philistiasarok bai choba nang laiwi tongo.”

²⁰ Daud phung aidrobo bachaui tei khoroksa mera mwrwknaini thani merarokno rwui klangwi chámung tlangwi Jisai dagima tẃi tháng kha. Bo bathamo sógwi phuru khe Israilrok chobani bagwi bwtang khe bacha laiwi chirik laimani jora.

²¹ Israil bai Philistiasarok sengkrakrok chobani bagwi mwkhang bai mwkhang naisik laiwi bacha lai kha.

²² Hakhe Daud manwi mwrwknairokni thani chámung klangwi chobani bwtang bacha laima-o bachaui bwtasongno bahai tong sẃngwi kha.

²³ Hakhe bo bórok bai kók sa laiwi tong phuru khe kamiyung Gatni a Philistiasa kwplaikuk Goliat swkang phuruni hai khe sengkrak bodolni ongkhorwi phaiwi swkangni hai khe kók kotor sa hor phi khua, yang Daud abono khna kha.

²⁴ Israilsarok a borokno nuk khe bini bwskangni belai kirijak laiwi khár lai kha.

²⁵ Israil bororok bo’-bo bono hai hwnwi sa lai kha, “Nwng ongkhorwi phai phainaino nuda nuk kha? Bo Israilsarokno lachi rwna bagwi se phai-o. Bono butharwi mannai borokno habugra Sol kwbángma sokat rwnai tei bini bwsajwk baibo bono káinai, phiya bini núkhungni teks rwnabo nang glak.”

²⁶ Hakhe Daud bini gana-o tongnai borokno hai hwnwi sẃng kha, “O Philistiasano butharwi Israilrokni mwkhang sókjakmani yakni phiyóknai borokno tamo khlaijaknai? Tei o sakur rajak ya Philistiasa bo sabo ba kwthang Kaitorni sengkrakrokno sak nangjak ya khe kók sa trwngwi tong?”

²⁷ Tei bórok sa laiwi tongma hai, “O borokno butharwi mannaino abo hai khlaijaknai,” hwnwi bono sa kha.

²⁸ Daudni bwta okra Eliab o kók sa laiwi tongma khna kha, hakhe Eliab Daudno belai khe jolijagwi, “Nwng oro tamni bagwi ma phai? A mera kisarokno hasing panthoro sabono kabu kha? Ang nini chongmano saui mano, oro nwng choba nang laimani nainani bagwi se phai-o,” hwnwi sa kha.

²⁹ Hakhe Daud, “Tabuk ang tamo khlai lang kha ba? Ang ba kók tháisa simi se sẃng bla!” hwnwi sa kha.

³⁰ Ahai hwnwi saui bo tei khoroksani aro thángwi abo hai’-no hai sẃng phi kha. Hakhe a bororokbo swkang phuruni haino sa kha.

³¹ Baksa bororok Daud samani kókno khna khe Solno sa kha tei Daudno bini thani ring rwui tubu kha.

³² Tei Daud Solno hai hwnwi sa kha, “Khoroksa phano o Philistiasano nugwi ta kiri bai di, nini o selengsa thángwi bo bai choba nang lainai.”

³³ Sol Daudno hai hwnwi sa kha, “Nwng o Philistiasa bai choba nang lai man glak kha, tamni hwn ba nwng le u swkangni chwrai si kho, bo le chwrai phuruni simino nang laiwi phaijak.”

³⁴ Tamo khe Daud Solno hai hwnwi sa kha, “Nini o seleng ang aphani merarokno mwrwgo, singho eba gongrok phaiwi merano bangkhár khe,

³⁵ ang bono riphrigwi butharwi bini búkhúkni phiyógwi tubu-o abo ano uárnani nai khe ang bini khochai romwi bu-ui butharo.

³⁶ Nini seleng singho bai gongrokno buthar kha; hakhe tabuk o sakur rajak ya Philistiasabo abórok hai’-no wngnai, tamni hwn ba bo Kaitor kwthangni sengkrakrokno sak nang ya khe kók sa kha.”

³⁷ Daud teibo, “Subraiyung ano singho bai gongrokni yakni phiyók kha, bo a Philistiasani yaknibo ano phiyóknai,” hwnwi sa kha. Hakhe Sol Daudno, “Hakhe tháng di, Subraiyung nini logi tong thung,” hwnwi sa kha.

³⁸ Sol Daudno bini chobani chummungrokno chum rw kha, pitolni khorok thupma thup rw kha tei chummung chum rw kha.

³⁹ Daud bini sengno chobani chummungo khaui himna nai kha tamni hwn ba swkango bo abo hairok ma chum ya kho. Hakhe Daud Solno hai hwnwi sa kha, “Ang omorokno tẃi choba nang lai man glak, tamni hwn ba ang omo tẃi uáisa phano chum trwng ya kho.” Hakhe bo bebakno khugwi pái kha.

⁴⁰ Hakhe bo bini mera mwrwkmani raidangno na kha tei twisani holong milik dulba khochaui naui bini sola-o ton kha. Yago khe bini badukhungno naui bo a Philistiasani phaising swkangwi tháng kha.

Daud Goliatno mechenmani

⁴¹ Philistia Daudni phaising swkangwi phaisa kha tei bini phui tẃinaibo swkang swkang khe tong kha.

⁴² Tei Philistia naisik ba Daudno nuk kha, hakhe bo bono sak nangjak ya wng kha tamni hwn ba bo belaino chwrai, bini sak kwchak tei naithok.

⁴³ Hakhe bo Daudno hai hwnwi sa kha, “Ang ba tamo sẃi da, ani thani raidangrok tẃiwi phai?” bo bini mwtairokni mung bai Daudno swrai kha,

⁴⁴ Philistiasa Daudno, “Ani thani phai di, ang nini bahanno nokhani tokrok tei hapharni mal-matarokno chá rw anw,” hwnwi sa kha.

⁴⁵ Daud Philistiasano hai hwnwi sa kha, “Nwng ani thani seng, jatha tei koslu bai phai-o, ang khe nwng mung hamya samani a kwplaisa Subraiyung Kaitorni mung bai tei Israilni sengkrakrokni Kaitorni mung bai se nini thani phai-o.

⁴⁶ Tini’-no Subraiyung nono ani yago yapharnai, ang nono butharwi nini bokhorokno tansunai tei ang Philistiani sengkrakrokni mang kwthwini bahanno nokhani toksarok tei hani mal-matarokno chá rwnai, hakhe bebak ha gwnangwi Israilo Kaitor tongo hwnwi saui mannai,

⁴⁷ tei oro tong bainai bororok Subraiyung mwthangna bagwi da-seng samung nang ya hwnwi saui man bainai; tamni hwn ba choba khe Subraiyungni se, bo se nono chini yago yapharnai.”

⁴⁸ Philistiasa bachaui Daudni phaising phai khe Daud dodro chobani bwtango nang lainani bagwi Philistiasani bwkhak tháng kha.

⁴⁹ Daud bini sola-o yak rwui holong dulsa kariui Philistiani kwpalo naiwi kók khe holong bini kwpalo habwi kha tei bo ha-o mwkhang sutubwi klai kha.

⁵⁰ Hakhe Daud holongdul tei badukhung bai’-no Philistiasano mechen kha; bo abo bai khe kogwi bono buthar kha; bini thani sengbo kwrwi.

⁵¹ Aphuru khe Daud khachigwi thángwi Goliatni gana-o bachaui kha tei bini seng bokhokni seng kariui bini bokhorok tansu-ui buthar kha. Hakhe Philistiasarok bórokni phan gwnang kukno thwimani nuk khe khárwi tháng bai kha.

⁵² Israil bai Judani bororok chirik laiwi bórokno Gat tei Ekron duglam jora riphrik lai kha. Philistiasarok Saraim lamarogo tei Gat bai Ekrono kwsa lala-lilingrok khe tanjak klai tong bai kha,

⁵³ Israilrok Philistiasarokno riphrikmani kiphilwi phai kha, bórokni bathamrogo habwi bebak na bai kha.

⁵⁴ Daud khe Goliatni bokhorok khochaui Jerusalemo tlang kha, phiya ba Goliatni da-sengno khe bini ríni nogo tonwi kha.

Solni bwskango Daud

⁵⁵ Sol Daudno Goliat bai choba nang lainani ongkhorwi thángma nuk khe bini sengkrak bokhorok Abnerno, “Bo saboni bwsla klai?” Hwnwi sẃng kha. “O Bugra ang mungsa saui man ya,” hwnwi Abner sa kha.

⁵⁶ Habugra, “Saboni bwsla bono sẃngwi nai di,” hwnwi dagi kha.

⁵⁷ Daud Goliatno butharwi bathamo kiphil phuru Abner bono Solni bwskango yago Goliatni bokhorok tẃijak khe tlang kha.

⁵⁸ Sol bono hai hwnwi sẃng kha, “Chwraisa nwng saboni bwsla?” Daud, “Ang Betlehemo tongnai nini seleng Jisaini bwsla se,” hwnwi sa kha.