1 SAMUEL 10 - Kok Borok (Re-edited) Bible (BSI)

¹ Hakhe Samuel olib thok langisa naui Solni bokhorogo lu-ui rwui bono motom su-ui hai hwnwi sa kha, “Subraiyung nono bini borok Israilrokni habugra hwnwi thok phul ya diba? Phiya, nwng Subraiyungni bororokni saka-o bugra chánai tei nwng bórokni kena arirokni yakni bórokno phiyóknai. Subraiyung bini bororokni saka-o bugra chánani bagwi chongmani omo’-no mari wngnai.

² Tini nwng oroni kutulwi tháng khe ha Benjaminni Jelja-o Rahelni simalwng gana-o borok khoroknwi bai malainai tei bórok nono hai hwnwi sanai, ‘Nwng rutukmani koraichirkarok manjak kha,’ hakhe nwpha abórokni bagwi uana yaui nini bagwi se uanama cháui ‘Ang ani sajlani bagwi tamo khlaima chano?’ hwnwi sẃng trwngwi tong si-o.’

³ Nwng aroni tháng te tháng te Taborni uk buphang gana jora tháng khe, aro nwng Bethelo Kaitorni thani thángnai borok khorokthamrokno malainai, khoroksa khe maktham punjua tẃijak, khoroksa khe auan leptham tẃijak tei khoroksa khe bukurni sola kupulung arak tẃijak khe nuknai.

⁴ Bórok nono chubai rwui auan lepnwi yapharnai, nwng bórokni yakni abono ma yachaknai.

⁵ Aboni ulo nwng Gibeath-o Kaitorni hathái-o Philistiasarokni batham tongma-o thángnai, nwng kamiyungo phai khe diyarirokni bodol dolsa bai malainai, bórok hatháini kuchugo tammungrok, donidong-drong, khamgodok, sumui tei chongpreng bai ongkhorwi phai lai tongo tei thinangni kók sa lai-o.

⁶ Hakhe achomsa khe Subraiyungni phola nono kobolnai tei nwngbo bórok bai baksa thinangni kók sanai tei borok juda wngnai.

⁷ Abo hairok wng khe Kaitor khlai rwmani hai’-no khlai di; tamni hwn ba Kaitor nwng bai tongo.

⁸ Nwng ani slái swkang Gilgalo thángnai, ang aro sógwi yapharnai tei khakchang yapharmungrok yapharna bagwi phainai, ang phaiwi nono tamo khlaina nangno sa phai ya sak nwng aro salsni ma naisingnai.”

⁹ Sol Samuelno yakarwi thángnani uphil khe Kaitor bono tei kaisa bwkha rw kha tei a salo’-no Samuel aswk kók samarok nang bai kha.

¹⁰ Sol bai bini seleng Gibea-o sók phai khe bodol dolsa diyarirok bo bai malai kha. Kaitorni phola bini thani achomsa phai khe bórokni bisingo bo’-bo thinangni kók sa kha.

¹¹ Bono swkango sininai bororok omo hai khe bono nuk khe bórokni bisingo hai hwnwi sa lai kha, “Kisni bwsla tamo wng kha? Sol ba diyari de wngwi tháng kha?”

¹² Tei aro-o tongnai borok khoroksa hai hwnwi sa kha, “Bórokni bupha sabo?” Aboni bagwi omo hai kók tongo, “Sol ba diyari de wngwi tháng kha?”

¹³ Sol Kaitor rwmani kók diyari sama pái khe bo hathái saka-o tháng kha.

¹⁴ Solni bukhra bo bai bini selengno nuk khe’-no, “Norok biyango tháng lai?” Hwnwi sẃng kha. Sol, “Koraichirkarokno rutuknani thángmani tamo khe chwng abórokno rutugwi man li ya hwn khe Samuelni thani tháng lai kha,” hwnwi sa kha.

¹⁵ Solni bukhra hai hwnwi sẃng kha, “Ano sa di, Samuel nono tamo hwnwi sa kha?”

¹⁶ Sol bini bukhrano hai hwnwi sa kha, “Koraichirkarok manjak kha hwnwi bo chwngno srai-srai khe sa kha,” tamo khe Samuel bo habugra ma chánani kók samano bini bukhrano sa li ya.

Sol habugra hwnwi sakhlaijakmani

¹⁷ Yagulo Samuel bororokno Subraiyungni thani Mijpa-o ring kha,

¹⁸ bo Israilni bororokno hai hwnwi sa kha, “Subraiyung Israilni Kaitor hai hwnwi sa-o, ‘Ang norokno ha Ijipni tubu-ui Ijipsarokni yakni tei norokno bebak kusupnairokni yakni phiyók kha.’

¹⁹ Ang norokni Kaitor, norokno tekto, sátok-pitok phuru phiyóknai Kaitorno norok tini nor laiwi chwngno habugra rw di hwnwi san lai kha. Tabuk abo bai’-no norok bosong bai bosong tei berem bai berem khe Subraiyungni bwskango thum lai di.”

²⁰ Hakhe Samuel bebak bosongrokno gana-o tubu kha, pat ka rwui Benjaminni bosong najak kha.

²¹ Hakhe Samuel Benjaminni bosongno gana-o tubu kha, hakhe Matrini núkhungno saiwi najak kha, hakhe Matrini bororokno gana-o tubu kha tei Kisni bwsla Solno pat ka rwui najak kha. Bórok bono naituk lai kha, tamo khe bono nuk lai li ya.

²² Hakhe bórok Subraiyungno hai hwnwi sẃng lai kha, “Tei kubun borok de tong kho?” Subraiyung hai hwnwi sa kha, “Nai di! Sol bini sakno manwi kwbángma bisingo huijagwi tongo.”

²³ Hakhe bórok khachigwi thángwi Solno romwi tubu lai kha. Bo bororokni kwcharo bacha phai khe nukjak kha, bo tei kubunni bororok bini bangora jora se chuk bai-o.

²⁴ Samuel bororokno hai hwnwi sa kha, “Omo se Subraiyung chongmani borok! Chini bisingo khoroksa phano bo hai kwrwi.” Aphuru khe bebak bororok, “Habugra umor lok thung!” Hwnwi chirik lai kha.

²⁵ Hakhe Samuel bororokni thani samung tangthaino saui khna rw kha; abono bijabo swiwi Subraiyungni bwskango ton kha. Hakhe Samuel bebak bororokno sakni nogo kiphil rwui rohor bai kha.

²⁶ Sol bini nok Gibea-o kiphilwi tháng kha, bini logi-o phan gwnang bororokno rohor kha, Kaitor bórokni bwkhano rom kha.

²⁷ Baksa nang-nung ya bororok hai hwnwi sa lai kha, “Bahai khe o borok ba chwngno mwthangwi mannai?” Bórok Solno sak nangjak li ya tei hilibo tubu lai li ya. Phiya ba bo kwchang kwchang khe tong kha.