1 SAMUEL 1 - Kok Borok (Re-edited) Bible (BSI)

Silo-o Elkana bai bini núkhung

¹ Elkana hwnwi Ephraim bosongni borok khoroksa tongo, bo Iphraimni hathái kami Rama kami kotoro tongo. Bo Jehoramni bwsla tei Elihuni busuk, bo Juph bosongni Tohu núkhungni borok.

² Bini bihik khoroknwi tongo; Hanna bai Penina, Peninani khe bwsa-bẃtẃi tongo, Hannani khe bwsa khoroksa phano kwrwi.

³ Bisi brúm brúm bórok Ramani Silo-o phan gwnang Subraiyungno khulumnani tei yapharnani bagwi tháng thángo, aro Elini bwslasong khoroknwi Hopni bai Phinehas Subraiyungni ochai wngo.

⁴ Elkana yapharmung yapharmani salo bini bihik Peninano banta kaisa rw-o, abo hai khe’-no bini bwsa chwla tei bwrwiroknobo rw-o.

⁵ Hakhe bo Hannano belai khe hamjak phano bono banta kaisa se rw-o, tamni hwn ba Subraiyung bono bwsa rw li ya.

⁶ Penina bono podrepot kók saui thesra khlai-o; tamni hwn ba Subraiyung bono chwrai rw li ya.

⁷ Abo hai khe máng nokha bisi kwbángma lái tháng kha, bórok Subraiyungni nogo tháng lai phuru khe Penina Hannano podrepot kók saui thesra kari-o, hakhe bo kabwi mungsa chá ya-nung ya khe tongo.

⁸ Bini bwsai Elkana bono hai hwnwi sẃng kha, “Hanna, tamo wngwi nwng kap? Tamni nwng mungsa chá li ya-nung li ya wng lang? Tamni aswk nini bwkha dukhu nangjak? Sajla khorokchisongni slái ang ham kuk ya diba?”

Hanna bai Eli

⁹ Salsa bórok Silo-o Subraiyungni nok bisingo chá bai khe nung bai khe Hanna bacha kha. Eli ochai Subraiyungni nokni dugar gana-o achugwi tongo.

¹⁰ Hanna belai bwkha hamya wngwi Subraiyungni thani suriui kap kha.

¹¹ Hakhe bo swmai tangwi hai hwnwi sa kha, “Sengkrakrokni Subraiyung!Nini selengjwk, ano naikhlai ja di, ani tektono naiwi ano muitu khlai ja di, ano ta pok ja di! Nwng ano bwsa chwla khoroksa rw khe, ang swmai tangwi sa-o, ang bono kwthang tong sak Subraiyungni thani yapharnai teibo bwkhnai bo rajak glak.”

¹² Hanna Subraiyungni thani suri san máng tong kha, Eli khe bini búkhúkno naichomwi tongo.

¹³ Hanna bini bwkha bisingo kók saui tongo, bini búkhúk simi se ula-ula wngo, bini khorang khe khna ya; hakhe Eli bo chuak nungjak se wng khna hwnwi chong kha.

¹⁴ Hakhe Eli bono, “Nwng bwswk kwdwk arak phegwi tong sinai? Nini aroni arak khibiui rohor si di!” hwnwi sa kha.

¹⁵ Phiya ba Hanna hai hwnwi sa kha, “I’nhi, bubagra ang arak kephek ya, ang belai’-no tekto nangjak bwrwija se; ang suri twtwi Subraiyungni thani bwkhani kók se saui tongo.

¹⁶ Ahaino baliknai bwrwi hwnwi ta chong di, ang belai bwkha ui-ui wngwi se abo hai khe suri-o.”

¹⁷ Hakhe Eli, “Kwchang kwchang khe tháng di, Israilni Kaitor nwng sanmano rw si thung,” hwnwi sa kha.

¹⁸ Tei bwrwi hai hwnwi sa kha, “Nini selengjwk khairokmung man thung.” Hakhe Hanna thángwi chá kha-nung kha tei bwkha-o tekto kwrwi kha.

Samuel achaima tei yapharjakmani

¹⁹ Bórok teini phung aidrobo dakti bachaui Subraiyungno khulum baiwi Rama-o bórokni nogo kiphilwi tháng kha. Elkana bini bihik Hanna bai thu kha-chá kha; hakhe Subraiyung bini surimano khna kha.

²⁰ Hanna jora’-ono sakderiya wngwi chwla bwsa khoroksa bá kha, bini mung Samuel hwnwi phar kha, tamni hwn ba bwrwi hai hwnwi sa kha, “Ang bini bagwi Subraiyungno san kha.”

²¹ Elkana bai bini núkhungni bororok tei uáisa Silo-o Subraiyungni thani bisini yaphar lainani tei bo chakmano yapharnani phai lai kha.

²² Tamo khe a jora-o Hanna khe tháng li ya. Bo bini bwsaino hai hwnwi sa kha, “Chwrai abuk cháma yakar khe ang Subraiyungni thani tlangnai, hakhe bo thwi yasak’-no aro tongnai.”

²³ Elkana bini bihikno hai hwnwi sa kha, “Nwng chajakmani tẃi’-no khlai di; abuk kak ya sak nwng nogo’-no ton di, Subraiyung bini kók narwk thung. Hakhe Hanna abuk kak ya sak jora nogo tongwi chwraino naikini khlai kha.”

²⁴ Bo abuk cháma yakar khe Silo-o bono tlangwi logi-o nokha bisik thamni musuk bwsa masa, auan kilo kaichi tei mui bukur sola bai kupulung arak tlang kha. Bo Silo-o Subraiyungni nogo Samuelno tubu kha, aphuru chwrai belai kwlwi kho.

²⁵ Bórok musuk rathar bai khe chwraino Elini thani tubu kha.

²⁶ Hanna bono hai hwnwi sa kha, “O bugra! Oro Subraiyungni thani suriui tong phuru nwng nukmani bwrwi ang’-no.

²⁷ O chwraini bagwi ang suri sanmani, Subraiyung ang sanmano rw kha.

²⁸ Hakhe ang bono Subraiyungni thani yapharo. Bo kwthang tong sak Subraiyungni’-no wngnai.” Hakhe bórok aro Subraiyungno khulum lai kha.