1 PITOR 5 - Kok Borok (Re-edited) Bible (BSI)

Kaitorni mera gut

¹ Ang norokni bisingni mothani okrarokno sa ja-o. Ang sakphangbo okrano: Angbo Khristo sátokjakmano nuknai, phiya a chẃngsacha phunukjak phuru angbo tongnai. Ang norokno sa ja-o:

² Kaitor norokni yago rwmani a mera gutno mwrwk di; naithai hwnwi ta nai di, tamo khe Kaitor muchung tẃi ahaino nai di. Rang manna bagwi simi ta nai di, tamo khe naina muchungma bai se nai di.

³ Norokni yago rwmarokno kók khna rwna ta nai di, tamo khe merarokno phunukna bagwi se norok swkang khlai gra di.

⁴ Hakhe Mwrwknai Bokhorok nukjak phuru khe norok hamya wng phlai ya a chẃngsacha motokno man anw.

⁵ Norok chwrairok omo tẃi khe okrarokni thani bomwi tong di. Norok bebak’-no khoroksa tei khoroksano naina bagwi koineneno rí hai khe khaui na di; tamni hwn ba elembago hai hwnwi sa-o, “Kung chuknairokno Kaitor kebengo, koiwi tongnairokno khe khairogo.”

⁶ Aboni bagwi norok bwkha koinene khe Kaitorni phankrak yago sak sakno rw di, hakhe bo sói jora-o norokno kuchugo tisanai.

⁷ Norok bebak uanamarokno bini thani yakarwi rw di, tamni hwn ba bo norokno khá súgo.

⁸ Sichaui tong di, naiwi tong di. Norokni kena ari Soitan singho pungjak hai khe khoroksa swkno monokna bagwi yang yang naitugwi tong kha.

⁹ Norok poito kwrak khe bono kebeng di; tamni hwn ba norok saui mano swngchar gwnangwi norokni Khristan takhukrok norok hai kheno sátokjagwi tongo.

¹⁰ Norok srapsa sátokjak bai khe bebak khairokmani yaphang Kaitor, Khristo bai thansa wngma tẃi bo bai baksa chẃngsacha wng phlaina hwnwi norokno ringnai a Kaitor, bo sakphang’-no norokno kaham khlainai, rak rwnai, phan rwnai, songcha suknai.

¹¹ Mol brúm brúmno bo kwplai wng thung. Amen.

Khápang rohormani

¹² Ang Silani yak tẃi omo tẃi kók kisa swihoro; ang bono takhuk kaham hwnwi saui mano. Ang norokno khá rak rwna nai-o, phiya omo Kaitorni sói khairokma hwnwi sana nai-o. Kaitor bai omo tẃi khe khairokjagwi kwrak khe tong di.

¹³ Norok bai baksa chongjak Babilonni mothabo norokno khápang rohoro; angsa Markbo khápang rohoro.

¹⁴ Norok kiching norok hamjak laimani sijakna bagwi motom su laiwi khápang rw lai di. Norok Khristoni borok bebak’-no khá kwchang rwjak thung.