1 PITOR 4 - Kok Borok (Re-edited) Bible (BSI)

Tongmung kwtal

¹ Khristo borok wngwi, sátokjak kha ba norokbo abo haino uansugui khá rak di; sátokjaknai borok bo tei sumsok bai gwdal ya.

² Hakhe norok o swngcharo tong lang sak sakni muchungma tẃi’-no tong yaui Kaitorni muchungma tẃi’-no tong di.

³ Poito kwrwirok tongma hai khe norok swkango kwbángma’-no tong kha. Norok sak tongthok tẃi’-no tong kha, sak motók tẃi’-no tong kha, chuak nungwi jurang uaija lai kha, chá lai kha-nung lai kha, selengmasingcha takjak mwtairokno suri lai kha.

⁴ Tabuk khe poito kwrwirok norokno a uak-tokrokni tongmung hai khe bórok bai tong li yani bagwi uanajago, hakhe bórok norokno kulo.

⁵ Hai phano bórok Kaitorni thani janija sakni kók ma sa bainai, bo kwthwirok bai kwthangrokni buj thumna bagwi tiyar tongo.

⁶ Aboni bagwi’-no kwthwirokni thanibo Kothoma Kaham pírjak kha; a kwthwirok o swngcharni bebak bororok hai kheno buj thumjak phano bórok phola wngwi Kaitor hai khe tongwi manna tẃi khe bórokni thani Kothoma Kaham pírjak kha.

Kaitor rwmani suarrokno samungo phnang di

⁷ Bebak’-no páina nai kha. Norok suri sanna bagwi sak soi di, sichaui tong di.

⁸ Kók kotor khe hai, norok kiching norok kaham khe hamjak lai di, tamni hwn ba hamjakma bai sumsok kwbángma kholopjago.

⁹ Khá srangwi norok kiching norok tháng lai di phai lai di.

¹⁰ Kaitor khairogwi podrepot suar rwmano kaham khe nai di, jotono suar manma tẃi’-no buini kaham khlaina bagwi abono samungo phnang di.

¹¹ Kók sanai borok bo Kaitorni kók sa thung; buino nainai nuknai borok bo Kaitor bono phan rwma bai nai thung nuk thung; omo tẃi khe bebago’-no Jisu Khristoni bising tẃi Kaitor lobjak anw. Mol brúm brúmno bo chẃngsacha wngwi kwplai wngwi tongnai. Amen.

Khristan wngwi sátokjakmani kók

¹² Khájani takhukrok, tabuk norok belai khe sátokjagwi potalijagwi tongmani abo wng thotok se wng ya bla hwnwi ta hwn di.

¹³ Abo wng yaui norok Khristo bai baksa sátokjago hwnwi se tongthok di, hakhe bo chẃngsacha wngwi nukjak phuru norok belai khe tongthoknai.

¹⁴ Khristoni mungwi lachi rwjak khe norok hamchajak; abo wng kha Kaitorni a chẃngsacha Phola norok bai tongo hwnwi sijakma se.

¹⁵ Norokni bere khoroksa phano borok butharnai wngwi, sikhok wngwi, samung hamya khlainai wngwi, eba khe buini samungo yak rwnai wngwi ta sátokjak di.

¹⁶ Norok Khristan wngwi sátokjak khe ta lachi di, tamo khe norok Khristan hwnjakma bai Kaitorno hambai rw di.

¹⁷ Buj thumnani jora sók phai kha, phiya Kaitorni bororok’-no swkang buj thumjaknai. Chwng suda buj thumjak khe Kaitorni aroni Kothoma Kahamno poito khlai yarokni tamo wngno?

¹⁸ Elembago hai hwnwi sama hai, “Borok kahamrok se mwthangjakna tuk khe Kaitorno kiri yarok bai sumsok gwnangrokni tamo wngno?”

¹⁹ Hakhe tabuk, Kaitorni muchungma tẃi sátokjaknairok bórok samung kaham khlaiwi kók narwknai Snamnaisani thani khá bera súk thung.