1 PITOR 2 - Kok Borok (Re-edited) Bible (BSI)

Holongthai kwthang bai dopha kwthar

¹ Aboni bagwi norok bebak hamyano khibi di; tatal ta sa si di, phatra ta wng si di, ta músú si di, kók hamya ta sa si di.

² Achai dorop chwrai hai khe abuktwi kaham nungna nai di (Kaitorni aroni abuktwini kók se sa-o), norok abono nungwi torwi logwi mwthangjagwi mano.

³ Elembago hai hwnwi sama hai, “Subraini khairokmano norok chánaiwi kha.”

⁴ Subraini thani phai di, bo wng kha a holongthai kwthang, bororok bai khibijak phano abo Kaitor bai samung nangnai hwnwi chongjak kha.

⁵ Holongthai kwthang hai khe phai di, hakhe Kaitorni nokthar tangna bagwi norok sak sakno tisajak di, a noktharo norok ochai kwthar wngwi Jisu Khristoni bising tẃi Kaitor hamjakma haino bini mungwi ratharwi barok anw.

⁶ Tamni hwn ba Elembago hai hwnwi sa-o, “Ang samung nangnai holongthai tháisano chong kha, abono ang tabuk Siyono nok busuni bagwi bera-o; bono poito khlainai borok bo lachina nang súk glak.”

⁷ Norok poito khlainairokni bagwi o holongthai wng kha belai samung nangnai; poito khlai yarokni bagwi khe: “Nok tangnairok samung nang ya hwnwi khibiui rwmani holongthai abo’-no wng phai kha nok busuni holongthai.”

⁸ Elembago hai hwnwibo sa-o, “O holongthai bororokno yakung thutaiwi rwnai, abo bórokno khiklai bainai.” A kókno poito khlai yani bagwi bórok yakung thutai kha; Kaitor bórokno ahai’-no khlaina muchungjago.

⁹ Norok khe chongjak bosong, norok Bugrani ochairok, norok dopha kwthar, norok Kaitorni sakni bororok; norok Kaitorni uanamasingcha samungrokno pírna bagwi chongjak kha, bo’-no norokno “Mwnakmani ongkhorwi ani naithok chẃngsacha-o phai di,” hwnwi ringo.

¹⁰ Agi norok Kaitorni borok ya, tabuk khe norok Kaitorni borok wng bai kha; agi norok Kaitor bai khairokjak ya, tabuk khe khairokjak bai kha.

Kaitorni seleng wngwi tong di

¹¹ Khájani takhukrok, norok o swngcharo sinijak ya riphuji hai se hwnwi ang norokno sa ja-o. Sakni muchungma tẃi’-no ta tong di, abo bwkha bai nang lai máng tongo.

¹² Norok poito kwrwirokni bisingo kaham khe tong di, hakhe bórok norokno samung hamya khlainai hwnwi sa khe bórok’-no norokni samung kahamrokno ma gosinai; omo tẃi khe Kaitor phainani salo bono ma lobnai.

¹³ Subraini bagwi swngcharni bebak bokhorokni kók khna di: Bugra kotorni kók khna di, bo wng kha bebakni bokhorok;

¹⁴ gobornorrokni kók khna di, bórok samung hamya khlainairokno yagul suna bagwi, phiya samung kaham khlainairokno kaham hwnna bagwi se bugra kotor bai rohorjago.

¹⁵ Kaitor naima khe ahai: Norok samung kaham khlaiwi si yarok si yaui samano muthup di.

¹⁶ Mungsa-o khajak yaui tong di; mungsa-o khajak ya phano norok abo bai’-no mungsa hamya khlaimano kholopna ta nai di, tamo khe Kaitorni seleng se wngwi tong di.

¹⁷ Bebak bororokno bórom khlai di, Khristan takhukrokno hamjak di, Kaitorno kiri di, bugra kotorno bórom khlai di.

Khristo sátokjakma tẃi’-no tong di

¹⁸ Selengrok, norok sak sakni nokphangni kók khnaui bórom khlai súgwi tong di, nokphang kaham kwchangno simi ya, nokphang thamchi kutungnobo bórom khlai di.

¹⁹ Kaitorni muchungmano saui manma bai norok ahaino sátokjakmani tektono soi khe norok kaham hwnjaknai.

²⁰ Norok samung hamya khlaiwi bujakmano soi khe tamo man? Phiya norok samung kaham khlai phano sátokjakmano soi khe Kaitor norokno kaham hwnnai.

²¹ Aboni bagwi se Kaitor norokno ringo; tamni hwn ba norokbo bini yaprino rwkna tẃi khe Khristo sakphang’-no norokni bagwi sátokjagwi phunuk lang kha.

²² Bo sumsok khlai lang ya; khoroksa phano bini búkhúkni kók tatal ongkhorma khnanai kwrwi.

²³ Bo kuljak phano bo kul phi ya; bo sátokjak phano tháisa phano pung yaui sói Buj Thumnai Kaitorni thani khá beraui tongo.

²⁴ Chwng thwiwi sumsok bai kakna tẃi khe, phiya kaham tongna tẃi khe Khristo sak baithangno chini sumsokno kruso ruju-ui tlang kha. Bini kwsarok bai norok ham rwjak kha.

²⁵ Norok wng kha salsa lama korójak merarok hai, tabuk khe norok norokni pholano Mwrwknaini thani, norokni pholano Narwknaini thani kiphilwi phai kha.