1 KORINTH 8 - Kok Borok (Re-edited) Bible (BSI)

Takjak mwtairokni thani barokjakmano chámani kók

¹ Tabuk, takjak mwtairokni thani barokjakmano chámani kók sa anw. “Chwng jotono si-o,” hwnwi borok samani o kók kubui’-no. Hai phano omo tẃi sima bai borok tor-rere wngwi kung chugo, phiya hamjakma bai borok kwrak wngo.

² Khoroksa swk ang si-o hwnwi hwn khe bo sina nangma swk si ya.

³ Tamo khe Kaitorno hamjaknai borok bo Kaitor bai sinijago.

⁴ Hakhe tabuk, takjak mwtairokni thani barokjakmano chámani kók wng kha omo hai: Chwng saui mano takjak mwtai abo kubui’-no kusu buya; chwng saui mano Kaitor kaisa susuk se.

⁵ Ha bai nokha-o mwtai hwnjaknairok tong phano, phiya omo tẃi “Mwtai” kwbángma bai “Subrai” kwbángma tong phano

⁶ chini bagwi Kaitor kaisa susuk se, bo wng kha chini Apha, bo bebak’-no snamnaisa, bini jarwino chwng tongo; Subraibo kaisa susuk se, bo wng kha Jisu Khristo, bini yak tẃi’-no bebak snamjak kha, bini bising tẃi’-no chwng tongo.

⁷ Hai phano jotono o kókno si ya. Baksa borok takjak mwtairokno surimano pogwi man ya kho, hakhe tabuk suda takjak mwtaini thani barokjakmano chá khe abono a takjak mwtaini thani barokjak hwnwi uansugui chá-o. Bórok khá sutrang khe chá yani bai abul wngma klai-o hwnwi khá ka-o.

⁸ Hai phano cháma nungma bai chwng Kaitor bai yachakjakna chúk ya; chwng chá ya khebo mungsa kwma glak, chá khebo mungsa man glak.

⁹ Hus wng di, norok bebak manwino cháui manma bai poito rak tha yarokno sumsogo ta khiklai di.

¹⁰ Rom di, takjak mwtairokni thani barokjakmano bwkha sutrang khe cháui man ya khoroksa swk nwng hai sinai borokno mwtai nogo cháma nuk kha; hakhe abo bai’-no bo takjak mwtairokni thani barokjakmano chá rak glak da?

¹¹ Aboni bagwi nwng sinai borok wngma bai a poito rak tha ya borok komornai, bobo nini takhuk, bini bagwibo Khristo thwi kha.

¹² Omo tẃi kheno norok poito rak tha ya takhukrokni bwkha-o yórwi sumsok khlaima bai Khristoni thani sumsok khlai-o.

¹³ Hakhe tabuk, ang cháma bai ani takhukno sumsogo khiklai khe hakhe ang takhukno sumsogo khiklai ya tẃi khe tei muihan chá phlai glak.