1 KORINTH 3 - Kok Borok (Re-edited) Bible (BSI)

Chwng Kaitorni Seleng

¹ Takhukrok, Kaitorni Phola gwnangrokno kók sama tẃi ang norokno saui man li ya; o swngcharni bororokno kók sama tẃi ang norokno ma sa kha, norok Khristono poito khlai thani chwrai hai kho ba chwrairokno kók sama tẃi ang norokno ma sa kha.

² Ang norokno mai chá rw yaui dut se ma khan si-o, tamni hwn ba norok mai cháui man ya kho. Tabuk suda norok mai cháui man ya kho,

³ tamni hwn ba tabuk suda norok o swngcharni borok hai khe tong kho. Tabuk suda norok músú laiwi tong kho, uálai laiwi tong kho hwn khe norok o swngcharni bororok hai khe tongma klai ya diba?

⁴ Norokni bisingo baksa, “Ang Polni,” baksa ba, “Ang Apoloni,” hwnwi sa lai khe abo norok o swngcharni bororok tongma hai tongma klai ya diba?

⁵ Hakhe Apolo sabo? Pol ba sabo? Norokno poito khlaiwi rwna bagwi chwng Kaitorni seleng hai simi se. Kaitor khlai di hwnmani samungno simi se chwng jotono khlai-o:

⁶ Ang buphang bwsa kái kha, Apolo abono twi lu kha, Kaitor khe abono tor rw kha.

⁷ Oro káinaisa bai twi lunaisa khe mungsa buya; buphang tor rwnai Kaitor se sói.

⁸ Káinaisa bai twi lunaisa phér lai ya; bórok samung tang tẃi’-no Kaitor bórokno sak sakni manthai rwnai.

⁹ Chwng hwn khe Kaitorni samung tang lainairok, norok hwn khe Kaitorni kheto. Norok Kaitor tangmani nokbo klai-o.

¹⁰ Kaitor ano suar rwma bai ang nok tangna kwrwng hai khe nokthai lu kha, hakhe tei khoroksa a saka-o nok tango. Sabo bahai khe tang abo jotono kaham khe nai thung.

¹¹ Tamni hwn ba Kaitor nokthai lumani abo wng kha Jisu Khristo, bo simi se nokthai, tei kaisa nokthai phano lu-ui man ya.

¹² A nokthai-o baksa rangchak, eba rukphai, eba monirok bai tango; baksa khe buphang, eba chwkap, eba sonrok bai tango.

¹³ Jotono bahai khe tang kha abo Khristoni salo dak-dak khe phunukjak anw. A Salo joto borokni samung bahai abo hór bai phunukjak anw: A hór abono sói da sói ya potaliui nai anw.

¹⁴ Tumungno a nokthai-o tangmani nok hór bisingo tong rwk khe a nok tangnaisa sokat mannai.

¹⁵ Phiya khoroksa swk tangmani abo khamwi tháng khe a tangnaisa abono keplenai, hai phano hórni yakni yókma hai khe bo thangnai.

¹⁶ Norok saui man ya da, norok wng kha Kaitorni nokthar, phiya Kaitorni Phola norokni bisingo tongo.

¹⁷ Aboni bagwi khoroksa swk Kaitorni nokthar swbai khe Kaitorbo bono swbainai, tamni hwn ba Kaitorni nok wng kha kwthar, phiya norokbo bini nokthar.

¹⁸ Khoroksa phano lama ta koró thung. Norokni bisingo khoroksa swk phano bo o swngcharni sinai hwnwi khá chong khe bo sói sói sinai wngna tẃi khe si ya wng gra thung.

¹⁹ Tamni hwn ba o swngcharni bororok elem hwnmani abo Kaitorni thani samung nang ya. Elembago hai hwnwi sama hai, “Kaitor elem gwnangrokno bórokni siyan bai khẃi-o khiklai-o.”

²⁰ Elembago hai hwnwibo sa-o, “Elem gwnangrokni uansukma samung chúk ya hwnwi Kaitor saui mano.”

²¹ Aboni bagwi borok khlaiwi manmano tẃiwi kók kotor sa thai kwrwi. Tamni hwn ba bebak’-no norokni mángno:

²² Pol, Apolo tei Pitorbo norokni’-no; o swngchar norokni’-no; tabukni mol bai phainai molbo norokni’-no; thwiwibo thangwibo omorok bebak’-no norokni’-no,

²³ norok Khristoni tei Khristo Kaitorni.