1 JOHON 4 - Kok Borok (Re-edited) Bible (BSI)

Kaitorni aroni Pholano sinina lama

¹ Khájani takhukrok, bebak pholano’-no poito ta khlai di, tamo khe pholarok abo Kaitorni aroni da potaliui nai di; tamni hwn ba diyari phatra kwbángma swngchar gwnangwi ongkhor kha.

² Nwng a Phola Kaitorni da Kaitorni ya omo tẃi khe saui man anw: Jisu Khristo’-no borok wngwi phai kha hwnwi gosinai borok bo Kaitorni aroni Pholano man kha,

³ tei Jisu Khristono borok wngwi Kaitorni aroni phai kha hwnwi gosi ya borok bo Kaitorni aroni Pholano man ya. Abo wng kha Khristoni kena arini aroni phola se, abono phainai hwnwi norok khna kha; tabuk abo o swngcharo phaiwi se sók phai kha.

⁴ Angsarok, norok khe Kaitorni borok tei norok bórokno mechen kha; tamni hwn ba norokni bisingo tongnai abo o swngcharo tongnaini slái kotor.

⁵ Bórok o swngcharni ba bórok o swngcharni kók se sa-o; tei swngcharbo bórokni kókno khna-o.

⁶ Chwng khe Kaitorni borok. Kaitorno sininai borok hwn khe bo chini kókno khna-o, phiya Kaitorni borok ya khe chini kókno khna ya. Omo tẃi khe’-no bubo kubuini Phola, bubo ba cha yani phola hwnwi abo chwng romwi mano.

Kaitor wng kha hamjaknai

⁷ Khájani takhukrok, phai di, chwng kiching chwng hamjak lai anw, tamni hwn ba hamjakma abo Kaitorni aroni se; hamjaknai borok bo Kaitorni bwsa, bo Kaitorno sini-o.

⁸ Hamjak ya borok bo Kaitorno sini ya, tamni hwn ba Kaitor wng kha hamjakmung.

⁹ Kaitor chwngno hamjakmano omo tẃi khe phunuk kha: Bini songdari Sajlani bising tẃi chwng mwthangjakna tẃi khe Kaitor bono o swngcharo rohor kha.

¹⁰ Hamjakma khe omo tẃi se: Chwng Kaitorno hamjago a kók ya, bo se chwngno hamjago, hakhe bini Sajlano rohorwi chwngno sumsokni phiyókna bagwi ratharwi barokjaknani bono rohor kha.

¹¹ Khájani takhukrok, Kaitor chwngno aswk khe hamjak kha ba chwng kiching chwngbo hamjak lai thai.

¹² Uáisa phano khoroksa swk Kaitorno nuknai kwrwi kho; chwng kiching chwng hamjak lai khe Kaitor chini bisingo tongo, phiya bo chwngno sói khe hamjak rw-o.

¹³ Chwng Kaitorni bisingo tongo, phiya Kaitorbo chini bisingo tongo hwnwi chwng omo tẃi khe saui man súgo: Tamni hwn ba bo chwngno bini Pholano rw kha.

¹⁴ Hakhe Apha bini Sajlano o swngcharno mwthangna bagwi rohor kha hwnwi siui nugwi chwng buino sa-o.

¹⁵ Jisuno Kaitorni Sajla hwnwi gosinai borokni bisingo Kaitor tongo, bo’-bo Kaitorni bisingo tongo.

¹⁶ Hakhe Kaitor chwngno hamjakmano chwng sauibo mano poitobo khlai-o. Kaitor wng kha hamjakmung, hakhe hamjagwi tongnai borok bo Kaitorni bisingo tongo, Kaitorbo bini bisingo tongo.

¹⁷ Chwngno sói khe hamjak rwma khe buj thumjakma salo chwng bwkha rakna bagwi se; tamni hwn ba bo o swngcharo tongma tẃi’-no chwngbo tongo.

¹⁸ Hamjaknai borok kiri ya, phiya sói khe hamjakma abo kiri ya wng rw-o; tamni hwn ba kirima bai bo sátokjago tei bo sói khe hamjagwi man ya.

¹⁹ Bo chwngno swkang hamjak gra kha ba chwngbo bono hamjago.

²⁰ Khoroksa swk, “Ang Kaitorno hamjago,” hwnwi saui bini takhukno naisler khe a borok tatal se; tamni hwn ba bo mokol bai nukmani takhukno se hamjak ya hwn khe bo uáisa phano nuk ya kho a Kaitorno hamjagwi man ya.

²¹ Hakhe Khristo chwngno hai hwnwi dagi kha: Kaitorno hamjaknai borok bo takhuknobo hamjak thai.