1 JOHON 3 - Kok Borok (Re-edited) Bible (BSI)

Kaitorni bwsarok

¹ Apha chwngno bwswk hamjak kha naisik di! Bo chwngno aswk hamjakma bai chwng Kaitorni bwsarok hwnjak kha, chwngbo sói abo hai’-no. O swngchar Kaitorno sini yani bagwi’-no chwngnobo sini ya.

² Khájani takhukrok, chwng tabuk Kaitorni bwsa; tamo khe chwng ulo tamo wngno abo tabukbo kaham khe saui man ya kho. Chwng saui mano bo nukjak phuru khe chwngbo haino wngnai, tamni hwn ba chwng bono abo hai’-no abo nuknai.

³ Bono omo tẃi khe khatungwi tongnairok bórok sakno katswi bo hai khe’-no kwthar khlaiwi tono.

⁴ Sumsok khlainai borok bo kerong swbaima klai-o; sumsok khlaima wng kha kerong swbaima se.

⁵ Norok saui mano bo bororokni sumsokrokno ruju-ui tlangna bagwi se phai-o, phiya bini le sumsok kwrwi hwnwibo saui mano.

⁶ Bini bisingo tongnai borok bo sumsokrok khlai ya; sumsok khlaiwi tongnai borok le bo bono nubo nuk ya bwkhabo sini ya.

⁷ Angsarok, khoroksa phano norokno ta bandi thung. Samung kaham khlainai borok bo le bo kaham wngma tẃi’-no kaham.

⁸ Sumsok khlaiwi tongnai borok bo wng kha Soitanni bwsa; tamni hwn ba Soitan yaphangni simi’-no sumsok khlaiwi phai kha. Tamni hwn ba Kaitorni Sajla le o samungni bagwi se phai-o, Soitanni samungrokno sokomorna bagwi se bo phai-o.

⁹ Kaitorni bwsa hwn khe bo tei sumsok khlai li ya, tamni hwn ba Kaitorni tongmung bini bisingo tongo; Kaitor bini bupha ba bo tei sumsok khlaiwi man li ya.

¹⁰ Kaitorni bwsarok bai soitanni bwsarokni phér laimung khe oro se sijago: samung kaham khlai ya, eba bini takhukno hamjak ya a borok Kaitorni bwsa ya.

Norok kiching norok hamjak lai di

¹¹ Tamni hwn ba norok yaphangni simi’-no o kókno khnaui phai kha, abo khe chwng kiching chwng hamjak lai thai.

¹² Chwng Kain hai wngthai kwrwi, bo wng kha Soitanni borok, bo buphayungno buthar kha. Tamo wngwi bo bono buthar? Tamni hwn ba bo khlaimani abo wng kha cha ya, bini buphayung khlaimani abo wng kha chamani.

¹³ Takhukrok, tumung o swngcharni bororok norokno naisler khe norok ta uana di.

¹⁴ Chwng saui mano chwng thwinani lama bárwi thángnani lama-o sók phai kha, tamni hwn ba chwng khoroksa tei khoroksano hamjago. Hamjak ya borok khe bo thwima-o se tongo.

¹⁵ Takhukrokno naislernai borok bo wng kha borok butharnai, phiya borok butharnai bo mwthangjak phlai ya hwnwi norok saui mano.

¹⁶ Hamjakma bahai tamo chwng omo tẃi khe saui mano, bo chini bagwi thwi kha hakhe chwngbo takhukrokni bagwi chini langmano rwthai klai-o.

¹⁷ Khoroksa swk o swngcharni rang-mai gwnang wngwi bini takhukno biyalo klaijak nugwi chuba ya hwn khe a borokni thani bahai khe Kaitorni hamjakma tongwi mannai?

¹⁸ Angsarok, chwng búkhúkni kók bai simi hamjak thai klai ya; chwng samung bai se sói khe hamjak thai.

Kaitorni bwskango bwkha rakmani

¹⁹ Aboni bagwi’-no chwng kubuini bwkhak tongo hwnwi saui mano tei aboni bagwi’-no chwng bini bwskango bwkha raknai,

²⁰ chini bwkha chwngno majra ber khe; chwng saui mano Kaitor chini bwkhani slái kotor kuk, phiya bo bebak’-no saui mano.

²¹ Hakhe khájani takhukrok, chini bwkha chwngno majra ber ya khe chwng Kaitorni bwskango bwkha rago;

²² chwng bini thani san tẃi’-no mano, tamni hwn ba chwng bini dagimungrokno khna-o tei hamjakma samungno khlai-o.

²³ Bo hai hwnwi dagi-o: “Ani Sajla Jisu Khristoni mungno poito khlai di, phiya Khristo dagima tẃi’-no norok kiching norok hamjak lai di.”

²⁴ Bini dagimarokno khnanai borok bo bini bisingo tongo, Kaitorbo bini bisingo tongo. Tei omo tẃi khe bo chwngno rwmani Pholabo chini bisingo tongo hwnwi chwng saui mano.