1 JOHON 2 - Kok Borok (Re-edited) Bible (BSI)

Khristo chini bagwi sachrunai

¹ Angsarok, norok sumsok ta khlai thung hwnwi se ang norokno omono swi-o. Phiya ba tumung khoroksa swk sumsok khlai khe chini bagwi Aphani thani sachrunai borok tongo, bo wng kha borok kaham Jisu Khristo;

² phiya chini sumsokrokni bagwi bo chini sak slái-o ratharjak kha, chini simi ya, swngcharni bebak borokni sumsokni bagwibo bo abono khlai kha.

³ Tabuk chwng Kaitorni dagimungrokno khnaui tong khe chwng bono sini-o hwnwi saui man súgo.

⁴ Khoroksa swk, “Ang bono sini-o,” hwnwi saui bini dagima hai khe tong ya khe a borok wng kha tatal, a borokni thani kubui kwrwi;

⁵ phiya ba bini kók khnanai borok khe bo kubui’-no Kaitorno hamjak súgo. Chwng Kaitorni bisingo tongo hwnwi omo tẃi khe saui man súgo:

⁶ “Ang Kaitorni bisingo tongo,” hwnwi sanai borok bo Jisu Khristo tongma tẃi’-no tongthai.

Kwtal khe dagimani

⁷ Khájani takhukrok, ang norokno dagimung kwtalno dagiui swi ya, abo kwcham dagimung se; norok yaphango’-no abo dagijak kha.

⁸ Hai phano ang dagiui swimani omo wng kha kwtal, tamni hwn ba mwnakma tháng rwrwgo tei tabuk sói pohor chẃngwi tongo.

⁹ “Ang pohoro tongo,” hwnwi saui bini takhukno naislernai borok bo tabuk suda mwnago’-no tong kho.

¹⁰ Takhukno hamjaknai borok bo pohoro tongo, hakhe abo tẃi borokni thani thutaina mungsa phano kwrwi.

¹¹ Takhukno naislernai borok bo mwnago’-no tongo, bo mwnago’-no himwi tongo tei bo buro thángwi tong abono saui man ya, tamni hwn ba a mwnak bono mokol nuk ya khlai kha.

¹² Angsarok, bini mungwi norokni sumsokrok nakarjakma bagwi ang norokno swi-o.

¹³ Bupharok, norok a yaphangni simi’-no tongnaino sinima bai ang norokno swi-o. Siklarok, norok hamyano mechenma bagwi ang norokno swi-o.

¹⁴ Angsarok, norok Aphano sinima bagwi ang norokno swi-o. Bupharok, norok a yaphangni simi’-no tongnaino sinima bagwi ang norokno swi-o. Siklarok, norok kwrak, norokni bwkha-o Kaitorni kók tongo tei norok hamyano mechen kha hwnwi ang norokno swi-o.

¹⁵ Norok o swngcharno ta hamjak di, o swngcharni mungsano phano ta hamjak di. Swngcharno hamjak khe le norok Aphano hamjagwi man ya;

¹⁶ tamni hwn ba o swngcharo tongmani bebak hamya muchungmarok, mokol bai nugwi manna muchungmarok, o swngcharni manwirokno tẃiwi kung chukmarok omorok bebak’-no Aphani aroni phaima ya, o swngcharni phaima se.

¹⁷ O swngchar tei o swngcharo borok manna muchungmarok bebak’-no pái rwrwgo, phiya Kaitor muchung tẃi tongnai borok khe bo mol brúm’-no kwthang tong phlainai.

Khristoni Kena Ari

¹⁸ Angsarok, omo wng kha mol páithak! Khristoni a Kena Ari phai anw hwnwi norok khna kha, hakhe tabuk Khristoni kena ari kwbángma bachasa kha. Hakhe omoni bising tẃi mol páina nai kha hwnwi chwng saui mano.

¹⁹ Bórok chini oroni ongkhorwi thángo, tamo khe bórok chini bisingni ya; tamni hwn ba bórok chini bisingni wngma te chwng bai’-no tong kha mun. Phiya bórok ongkhorwi thángma bagwi bórok chini bereni ya hwnwi abo srai-srai khlai-o.

²⁰ Phiya, nwng Kwtharsani tẃi khe chongthar chongjak kha, aboni bagwino norok bebak’-no saui man kha.

²¹ Norok kubuino saui man ya hwnwi ang norokno swima ya, norok kubuino saui mano hwnwi se ang swi-o, phiya kubuini le tatal phaiwi man ya hwnwi norok saui manma bai se ang swi-o.

²² Hakhe sabo tatal? Jisuno Khristo ya hwnwi sanai borok bo’-no tatal. Bo wng kha Khristoni kena ari, bo Phanobo gosi ya, Sajlanobo gosi ya.

²³ Sajlano gosi ya borok bo Phanobo gosi ya; Sajlano yachaknai borok bo Phanobo yachago.

²⁴ Norok yaphangni simi khnaui phaimani a kógo’-no norok tongwi tong di. Norok yaphangni simi khnaui phaimani a kógo tongwi tong khe norok Sajla tei Pha bai thansa khe tongma klainai.

²⁵ Tei omo wng kha bo chwngno mwthang phlaina hwnwi kók rwmani abo.

²⁶ Norokno lama koró rwna naiwi tongnairokni bagwi se ang omo norokno swi-o.

²⁷ Tamo khe norok khe bo bai chongthar chongjak kha, abo norok bai tongwi tongma bagwi khoroksa bai phano norok phrwngjakna nang ya. Tamni hwn ba bini Phola norokno bebakno phrwngo, phiya bo phrwngmani abo kubui se, tatal ya tei bo phrwngma tẃi’-no tongwi bo bai thansa khe tong di.

²⁸ Tabuk angsarok, bini bisingo tong di, hakhe bo nukjak phuru khe chwng bwkha rak súgwi man anw, phiya bo phai phuru chwng bono lachiui huijakna nang glak.

²⁹ Tumung norok bono kaham hwnwi saui man khe, samung kaham khlainai joto bororokno bini aroni achaimani hwnwi norok srai-srai khe si di.