1 JOHON 1 - Kok Borok (Re-edited) Bible (BSI)

Mwthangnai kók

¹ Yaphangni simi’-no tongmani a mwthangnai Kókno tẃiwi chwng norokno swihoro; chwng abono khna kha, mokol baithang’-no abono nuk kha; I’n, chwng abono nuk súk kha’-no, phiya yak baithang’-no abono tang kha.

² A mwthangnai nukjak khe chwng bono nuk kha, abo baino chwng bini kókno sa-o; Apha bai tongnai, phiya chini thani phunukjakmani a kwthang tong phlainaini kókno chwng norokno sa-o.

³ Chwng Apha tei bini Sajla Jisu Khristo bai thansa khe tongma hai norokbo chwng bai baksa bórok bai thansa wng thung hwnwi se chwng khnama nukmano noroknobo ma sa-o.

⁴ Chwng tongthok sukna bagwi se omono swi-o.

Kaitor wng kha pohor

⁵ Chwng bini Sajlani thani khnaui norokno samani kók wng kha omo: Kaitor wng kha pohor, bini bisingo kisicha phano mwnakma kwrwi.

⁶ Tumungno chwng bo bai thansa khe tongo hwnwi saui mwnago tong khe, chwng kógobo tei samungobo tatal wngma klai-o.

⁷ Tamo khe tumung bo pohoro tongma tẃi’-no chwngbo pohoro tong khe chwng kiching chwng thansa khe tongma klai-o, phiya bini Sajla Jisuni thẃi chini bebak sumsokno súcha-o.

⁸ Chini sumsok kwrwi hwnwi tumungno sa khe chwng sakno bandi-o, hakhe chini thani kubui kwrwi.

⁹ Phiya ba, chwng Kaitorni thani chini sumsokrok gosi khe bo kók narwgwi sói khe nainai; hakhe bo chini sumsokrokno nakarnai, phiya chwng bebak samung hamya khlaimano súchanai.

¹⁰ Tumungno chwng sumsok khlai ya hwnwi sa khe chwng Kaitorno se tatal hwnma klai-o, hakhe bini kók chini bwkha-o kwrwi.