1 BOSONG 22 - Kok Borok (Re-edited) Bible (BSI)

¹ Hakhe Daud hai hwnwi sa kha, “Oro se Subraiyung Kaitorni nok ma wngthai tei oro se Israilni bagwi sógwi yapharjaknai háyá ma wngthai.”

Nokthar tangnani bagwi tiyar wngmani

² Daud bebak buini hani aro tong bainai bororokno kuthumnani bagwi dagi kha tei bórokno Kaitorni nok tangnani bagwi holong tannani samung tang rw bai kha.

³ Daud sorrok, khilirok, duglamo nangmani bagwi kwbáng khe thum kha tei rwta bai li ya khe pitolrok tubu kha.

⁴ Tei Tayar bai Sidonni bororok kwbángma sidar buphangrok Daudni thani tubu kha.

⁵ Daud hai hwnwi uansuk kha, “Ani sajla Solomon belai chwrai kho, mungsa phano si ya, Subraiyungni bagwi nokthar tangna tongmani, abo belai kaham, chẃngsajak tei swngcharni mung gwnang ma wngthai, aboni bagwi ang tiyar khlaiwi ma klangthai.” Hakhe Daud bo thwi ya sakno kwbángma manwirok thumwi klang kha.

⁶ Hakhe bo bini sajla Solomonno ringwi Subraiyung Israilni Kaitorni bagwi khungsa nokthar tangnani bagwi dagi kha.

⁷ Daud bono sa kha, “Subraiyung ani Kaitorni mungno bórom khlaiwi nokthar tangna hwnwi chongwi tongo.

⁸ “Phiya Subraiyung ano hai hwnwi sa kha, ‘Nwng kwbángma borok buthar kha tei kwbángma choba nang lai kha; nwng ani mung bai khungsa phano nokthar tangwi man glak, tamni hwn ba nwng ani bwskango kwbángma ha saka-o thẃi sar kha.

⁹ Nai di, nwng bwsa chwla khoroksa mannai, bo tong kwchangni borok wngnai, tamni hwn ba ang bono bebak phaisingni bini kena arirokni tong kwchang tong rwnai, bini bumung Solomon wngnai; ang bini jora-o Israilo tong kwchang tong rwnai.

¹⁰ Bo se ani bagwi nokthar khungsa tangnai. Bo ani sajla wngnai tei ang khe bini bupha wngnai. Ang bini achukthayungno Israilo mol brúm brúm kwrwng rwui tong rwnai.’

¹¹ Tabuk ani sajla, Subraiyung nini logi tong thung, bo nini bagwi kók samani hai Subraiyung nini Kaitorni nok kaham khe tangwi man thung,

¹² Israilni barja yaphar phuru Subraiyung nini Kaitorni raidano kaham khe tẃiwi manna tẃi khe bo nono simung tei elem rw thung.

¹³ Subraiyung Israilni bagwi Musini khúk tẃi khe dagimani bebak kerongrokno kaham khe khnaui tong khe nwng hamchanai. Phan kwrak wng di, khá rak di. Ta kiri di, khábo ta báijak di.

¹⁴ Belai yak chúksak jora tẃi khe ang Subraiyungni nokni bagwi 3,400 ton rangchak tei 34,000 ton rukphai tei rwta baiwi man ya khe pitol tei sorrok thum kha. Buphangrok tei holongrokbo tiyar wng bai kha, phiya ba nwng teibo thum phai di.

¹⁵ Nini kwbángma samung tangnai bororok tongo, holong tannai, si kwrwngrok tei mistirirok tei kwbángma samung mannairok,

¹⁶ rangchak, rukphai, pitol tei sorni samung khlaiwi mano. Bachaui samung cheng di tei Subraiyung nini logi-o tong thung.”

¹⁷ Daud bebak Israilni tẃiphangrokno bini bwsla Solomonno chubanani bagwi hai hwnwi dagiui sa kha,

¹⁸ “Subraiyung nini Kaitor nini logi-o tongwi bebak bwkhakni nono tong kwchang tong rw kha, tamni hwn ba bo o ha-o tongnairokno ani yago yaphar kha, tabuk bórok norokni tei Subraiyungni yago se.

¹⁹ Tabuk Subraiyung nini Kaitorno nini bwkha bai khúk bai monnani chong di. Tháng di, Subraiyungni swmai bokhok bai Kaitorni kwthar manwirok Subraiyungni mungwi tongmani nogo tubu-ui manna tẃi khe Subraiyung Kaitorni noktharno tang di.”