1 BOSONG 17 - Kok Borok (Re-edited) Bible (BSI)

Nathan Daudno kók samani

¹ Daud bini nogo tong phuru, bo diyari Nathanno hai hwnwi sa kha, “Nai di, ang khe sidar buphangni nok tanjago se tongo, ayang Subraiyungni swmai bokhok kheba ríni nok bisingo se ma tong kha.”

² Nathan Daudno hai hwnwi sa kha, “Nini bwkha-o tongma haino khlai di, Kaitor nwng bai tongo.”

³ Phiya ba aboni horo Kaitor Nathanno hai hwnwi sa phai kha,

⁴ ani seleng Daudni thani thángwi hai hwnwi saui di, “Subraiyung hai hwnwi sa-o; nwng ani bagwi tongthai nok tangwi man glak.

⁵ Ang Israilrokno phiyógwi tubu phuruni simi tini jora ang nok bisingo tong ya kho, ang ríni nogo se tongwi aro-uro kitingwi tong kho.

⁶ Bebak Israilrok bai khe aswk thai kwbángma-o kitingwi tongmani, ang Israilni tẃiphangrokno tháisa phano tamni norok ani bagwi sidar buphangni nok tang ya gwja hwnwi sa ya kho.”

⁷ Hakhe tabuk ani seleng Daudno saui di, kwplaisa Subraiyung hai hwnwi sa-o, “Ani Israil bororokni bugra wngna bagwi nwng sula-o mera mwrwgwi tongmano se ang tubu-ui phai-o.

⁸ Nwng tháng thani’-no ang nwng bai tong kha, ang nini bebak kena arirokno mechen kha tei ang nini mungno ha saka-o kotor khlai kha.

⁹ Ang ani Israil bororokni bagwi tong phlainai tongthai kaisa chong kha, bórok aro tongwi mannai, agi-o wngma hai tei kebo bórokno tekto rwui man glak.

¹⁰ Ang agini simino Israil bororokno tẃithernai chong kha; tei ani Israil bororokni kena arirokno mechennai. Ani khúk bai teibo sa-o, ‘Subraiyung norokni bagwi nok tangnai.’ ”

¹¹ Nwng thwiwi chuchusong phob thani phobjak khe, ang nini yagulo nini bwsano bacha rwui habugra chá rwnai tei nini’-no bwsarokni bere khoroksani tẃi khe bini hano songchanai.

¹² Bo ani banta nok khungsa tangnai tei ang bini achukthayungno mol brúm brúmni bagwi songchanai.

¹³ Ang bini bupha wngnai tei bo ani sajla wngnai, ang ani hamjakmano nini swkang tongnai Solni aroni rosaui namani hai rosa glak.

¹⁴ Ang bono ani bororok tei ani hani barja mol brúm brúmni bagwi bernai tei bini achukthayung mol brúm tong phlainai.

¹⁵ Hakhe Nathan Kaitor bai tholjakmani haino bebak kókno sa kha.

Daud hambai rwui surimani

¹⁶ Hakhe habugra Daud bisingo thángwi Subraiyungni bwskango achugwi hai hwnwi suri san kha, “O Subraiyung Kaitor, ang ba sabo tei ani núkhung ba tamo, nwng ano omo hai khe aswk tolwi tubu lang?

¹⁷ O Kaitor, abo ba haino nini mokolo belai kotoi, nwng nini selengni núkhungo kotor wngnani tei bwskangni bosongni kók sa kha.

¹⁸ Nini selengno bórom khlaimani ang nono tamo sanai? Nwng nini selengno saui mano.

¹⁹ O Subraiyung, nini selengni bagwi, nini bwkha-o chong tẃi, nwng samung kotor khlaiwi, kwmamsingcha samung phunuk kha.

²⁰ Subraiyung, nwng hai kebo kwrwi; chini khunju bai chwng khnamani khe nono karwi tei Kaitor kwrwi.

²¹ Nini borok snamnani bagwi phiyógwi tubumani Israil hai tei kubun dopha kwrwi, nini mung pír rwnani bagwi kwmamsingcha samung kotor khlai kha, nwng ha Ijipni phiyógwi tubumani nini bororokni bwskango kubun dopharokno rwkhlaiwi rohor kha.

²² Nwng Israilno mol brúmni bagwi nini borok snam kha tei Subraiyung, nwng, bórokni Kaitor wng kha.

²³ Tabuk Subraiyung, nwng nini selengni bagwi tei ani núkhungni bagwi kók rwmani tẃi’-no khlai si di.

²⁴ Nini mung kotor wngwi bororok mol brúm brúm, ‘Kwplaisa Subraiyung, Kaitor se Israilni Kaitor,’ hwnwi ma hwn bainai tei nini seleng Daudni núkhungno songchanai.

²⁵ Tamni hwn ba nwng, ani Kaitor, nini selengno phunuk kha tei ani núkhungno songcha kha hwnwi sa kha, aboni bagwi nini seleng abo hai khe suri rago.

²⁶ Tei tabuk o Subraiyung, nwng se Kaitor, nwng nini selengni thani omo hai kaham swmai tang kha.

²⁷ Hakhe nini bwskango mol brúm kwrwngwi tongwi manna tẃi, tabuk abo hai nwng chajak khe nini selengni núkhungno hamari rw di; tamni hwn ba Subraiyung nwng hamari rwmani abo mol brúmno tongo.”