1 BOSONG 12 - Kok Borok (Re-edited) Bible (BSI)

Benjamin bosongni swkango Daudni bororok

¹ Omorokno Jiklago Daudni thani phainai bororok, Kisni bwsla Solni yakni khárwi tong phuru bórokno phan gwnang bono choba-o chubanairok.

² Bórokno badukhung bai chakhla kogwi mano tei yaksi-yagra holong bai bo kogwi mano. Bórok bebakno Benjamin bosongni Solni sandairok.

³ Bórokni bokhorok wng kha Ahiejer bai Joas, bórok Gibea-o tongnai Semani bwsarok. Jejiel bai Pelet, bórok Asmabetni bwsarok. Beraka bai Jehu khe Anathoto tongnairok.

⁴ Ismaia khe Gibeono tongnai; khorok thamchini bisingo khoroksa phan gwnang tei tẃiphang sengkrak. Jirimia, Jahasiel, Johanan tei Jojabad khe Gedera-o tongnairok

⁵ Elujai, Jerimot, Bialia, Semaria tei Harupisa Sephatia,

⁶ Elkana, Isia, Ajarel, Joeser tei Jasobiam khe Kora bosongni.

⁷ Joela tei Jebadia khe Gedoro tongnai Jerohamni bwsajlasong.

Gad bosongni Daudni sengkrakrok

⁸ Gado tongnai phan gwnang sengkrakrok hasing panthoro Daudni thani tháng lai kha, bórok belai khe olonga tei phui bai nang lainani kwrwng gwja; bórok singhoni mwkhang hai tei hachukni mwswi hai doui khárwi mano.

⁹ Bórokni kotor khe Ejer, aboni ulo khe Obadia, ulthamo khe Eliab

¹⁰ ulbrwi-o khe Mismanna, ulba-o khe Jirimia,

¹¹ uldogo khe Atai, ulsini-o khe Eliel,

¹² ulcharo khe Johanan, bini ulchuku-o khe Eljabad,

¹³ ulchi-o khe Jirimia ulchisa-o khe Makbanai.

¹⁴ Omorok wng kha Gad bosongni sengkrak okrarok, bórok khorok sarani bokhorokni simi khoroksaini bokhorok.

¹⁵ Bisini puilani talo omorokno Jordan twima twi kupulung tong phuru bár lai kha, harungni salka tei salthángo tongnai bororokno oroi-poroi khlaiwi rw bai kha.

Benjamin bai Judani bini logi himnairok

¹⁶ Baksa Benjamin tei Judani bororok Daud tongmani nok kwrakma-o phai lai kha.

¹⁷ Daud bórok bai malainani nongkhorwi thángwi hai hwnwi sa kha, “Tumungno norok ano kiching hwnwi chubanani phai khe norok bai thansa wngnani tiyar tongo; phiya ba ang mungsa cha ya khlai ya twtwi ano bandiui ani kena arirokni thani yapharna phai khe le chini chuchusongni Kaitor abono nainai tei buj thumnai.”

¹⁸ Hakhe Kaitorni phola Amasaini bokhorok khorok thamchirokni thani phaiwi hai hwnwi sa kha, “Jisaini bwsla Daud, chwng nini se! Khakchang bai hamkrai nini thani tei nono chubanairokni thani. Tamni hwn ba nini Kaitor nono chuba-o.” Hakhe Daud bórokno yachagwi bini sengkrak bokhorok snam bai kha.

Manaseni bini logi-o phainairok

¹⁹ Daud habugra Sol bai choba nang lainani bagwi Philistiasarok bai baksa nongkhor laiwi tháng lai phuru-o baksa Manaseni bororok Daudni thani tháng lai kha. Phiya ba bo bórokno chuba li ya, tamni hwn ba Philistiani bugrarok kirijak laiwi hai hwnwi saui rohor lai kha, “Chini bokhorok bai se bo bini bugra Solno bandinai,” hakhe bo bórokno Jiklago kiphilwi rohor kha.

²⁰ Bo Jiklago thángwi tong phuru Manaseni bororok bini thani phainairok, bórok khe: Adna, Jojabad, Jediael, Mikail, Jojabad, Elihu tei Jilethai, bórok Manase-o khorok 1,000 sengkrakrokni bokhorokrok.

²¹ Bórok Daudni sengkrak wngwi chuba kha, tamni hwn ba bórok bebakno phan gwnang sengkrak máng, ulo bórok Israilo sengkrak bokhorok wng kha.

²² Sal brúm se bororok Daudno chubanani bagwi phai lai máng tong bai-o, hakhe bini sengkrakrok kwbángma Kaitorni sengkrak hai wng kha.

Daudni sengkrakrok sujakma

²³ Kwbángma sengkrakrok Hebrono Daudni thani thángwi, Subraiyung swmai tangmani hai Solni sak slái-o bono habugra chá rwna nai lai kha. Bórok bángmani wng kha:

²⁴ Judiani bororok: Khorok 6,800 bórok kolongarok tẃi laijak.

²⁵ Simonni bororok: Khorok 7,100 phan gwnangrok.

²⁶ Lebirok: Khorok 4,600.

²⁷ Jehoiadano rwktharnairok, Aron bosongni bororok: Khorok 3,700.

²⁸ Sadok, sikla phan gwnang tei bini buphani nokni khorok nwichinwi bokhorokrok.

²⁹ Benjaminsarok, (Solni sandairok khorok 3,000, bórokni bere kwbángkuk’-no Solni núkhungno bórom khlai-o.)

³⁰ Ephraimni borok: khorok 20,800 bórok thángwi Daudno habugra chá rwnani chongjak.

³¹ Manaseni salthángni khorok charchi borokrok Daudno habugra hwnwi gosi laijak.

³² Isakarni: Khorok 200 tẃiphangrok, bórokno o ojama songwi bebak bórokni sandairok (o tẃiphangrok molni jorano tei Israilrok tamo khlaina nangno kaham khe saui mano.)

³³ Jebulunni: Khorok 50,000 sengkrakrok, bórok bebak chobani sílai-patham tẃinani kwrwng gwja; Daudno chubaui mano.

³⁴ Naptalini: Khorok 1,000 tẃiphangrok tei bórok bai pal khe khorok 37,000 phui bai, olongarok bai tẃijak sengkrakrok.

³⁵ Danni: Khorok 28,600 chobani bagwi phrwngjakrok.

³⁶ Aserni: Khorok 40,000 sengkrak chobani bagwi tiyar wngjak.

³⁷ Ruben, Gad tei khaksa Manaseni: Khorok 120,000 bororok bebak chobani manwi tẃi laijak.

³⁸ Bebak o sengkrakrok chobani bagwi tiyar wng laiwi Daudno Israilni habugra chá rw lainani bwkha-o chap laiwi Hebrono tháng lai kha tei Israilni kubun bororok bo haino abo hai khe Daudno habugra chá rwna bwkha soi lai kha.

³⁹ Bórok aro Daud bai nokha saltham jora bororokni takhukrok bórokni bagwi tiyar khlaimano chá lai kha nung laiwi tong lai kha.

⁴⁰ Tei bórokni gana-o tong bainairok, Isakar, Jebulun tei Naptalini bororok Korai chirkarogo, mangingangrogo, korairogo, musuk sakarogo khe chámungrok, mai, khwichangni auanrok, angur tei olibni thok, musukrok, merarok tubu lai bai kha, tamni hwn ba Israilrokni bisingo tongthok laima kupulung wng kha.