Zakaria 4 - Bibl Koad 21: Ar Bibl e Brezhoneg evit ar Vretoned

Pennad 4

¹ Goude-se an ael a gomze ouzhin a zistroas davedon hag am dihunas, evel un den a zo dihunet eus e gousked,

² hag e lavaras din: Petra a welez? Hag e lavaris: Sellout a ran, ha setu ez eus ur c'hantolor aour, gant ul lestr en e grec'h, hag e seizh lamp outañ, gant seizh korzenn evit ar seizh lamp e krec'h ar c'hantolor,

³ hag en e gichen ez eus div olivezenn, unan a-zehou d'al lestr, hag eben a-gleiz.

⁴ Hag e komzis o lavarout d'an ael a gomze ouzhin: Petra eo an traoù-se, va aotrou?

⁵ An ael a gomze ouzhin a respontas o lavarout din: Ha n'ouzout ket petra eo an traoù-se? Hag e lavaris: Nann, va aotrou.

⁶ Respont a reas din o lavarout: Houmañ eo komz an AOTROU disklêriet da Zorobabel o lavarout: N'eo ket dre c'halloud na dre nerzh met dre va Spered, eme AOTROU an armeoù.

⁷ Piv out menez bras, dirak Zorobabel? Plaenaet e vi. Lakaat a raio ar maen pennañ gant youc'hadegoù: A-drugarez, a-drugarez warnañ!

⁸ Komz an AOTROU a voe disklêriet din o lavarout:

⁹ Daouarn Zorobabel o deus soliet an ti-mañ, hag e zaouarn a echuo anezhañ, hag e ouezi ez on bet kaset davedoc'h gant AOTROU an armeoù.

¹⁰ Rak piv eo en deus disprizet amzer an deroù bihan? Laouen e vint o welout ar gordenn-vuzuliañ e dorn Zorobabel. Ar seizh-se a zo lagadoù an AOTROU oc'h ergerzhout an douar holl.

¹¹ Hag e komzis o lavarout dezhañ: Petra eo an div olivezenn, en tu dehou d'ar c'hantolor hag en tu kleiz?

¹² Hag e komzis un eil gwech o lavarout dezhañ: Petra eo an daou skourr olivez a zo e-kichen an div gorzenn aour ma tever an aour drezo?

¹³ Hag e respontas din o lavarout: Ha n'ouzout ket petra eo an traoù-se? Hag e lavaris: Nann, va aotrou.

¹⁴ Hag e lavaras: Int a zo an daou olevad, ar re en em zalc'h dirak AOTROU an douar holl.