Salmoù 99 - Bibl Koad 21: Ar Bibl e Brezhoneg evit ar Vretoned

Salm 99

¹ An AOTROU a ren, ra greno ar pobloù! Azezet eo etre ar cherubined, ra vrañsello an douar.

² An AOTROU a zo bras e Sion, savet eo dreist an holl bobloù.

³ Ra vo meulet e anv bras ha spontus, rak santel eo.

⁴ Nerzh ar roue a gar ar reizhder, lakaet ec'h eus an eeunder, graet ec'h eus ar varnedigezh hag ar reizhder e Jakob.

⁵ Kanmeulit an AOTROU hon Doue, stouit dirak skabell e dreid, rak santel eo.

⁶ Moizez hag Aaron a voe e-touez e aberzhourien, ha Samuel e-touez ar re a c'halve e anv. Pediñ a raent an AOTROU, hag eñ a responte dezho.

⁷ Komz a rae outo er golonenn a goabrenn, miret o deus e destenioù hag al lezenn en doa roet dezho.

⁸ AOTROU hon Doue, o respontet ec'h eus. Bet out evito un Doue a bardon, en ur ober veñjañs eus o fec'hedoù.

⁹ Kanmeulit an AOTROU hon Doue, stouit dirak menez e santelezh, rak an AOTROU hon Doue a zo santel.