Salmoù 94 - Bibl Koad 21: Ar Bibl e Brezhoneg evit ar Vretoned

Salm 94

¹ Doue ar veñjañsoù, AOTROU, Doue ar veñjañsoù, laka da splannder da lugerniñ!

² Sav, barner an douar, ro o gopr d'ar re lorc'hus!

³ Betek pegoulz ar re zrouk, o AOTROU, betek pegoulz e trec'ho ar re zrouk?

⁴ Betek pegoulz e stlabezo an holl vicherourien a zireizhder komzoù fall, hag en em veulint?

⁵ AOTROU, flastrañ a reont da bobl, hag e waskont da hêrezh.

⁶ Lazhañ a reont intañvez ha diavaeziad, hag e lakaont ar vinored d'ar marv.

⁷ Hag e lavaront: An AOTROU ne wel ket, Doue Jakob ne daol ket evezh.

⁸ Diwallit, c'hwi ar re ziskiantañ eus ar bobl! Tud diboell, pegoulz ho po skiant?

⁹ An hini a blant ar skouarn, ha ne glevo ket? An hini a stumm al lagad, ha ne welo ket?

¹⁰ An hini a gastiz ar broadoù, ha ne skoio ket, eñ hag a zesk an anaoudegezh d'an dud?

¹¹ An AOTROU a oar n'eo nemet moged soñjoù an den.

¹² Eürus eo an den a gastizez, o AOTROU, an hini a zeskez dre da lezenn,

¹³ evit e lakaat er goudor en deizioù fall, ken na vo kleuziet ar poull evit an hini drouk.

¹⁴ Rak an AOTROU ne lezo ket e bobl, ha ne zilezo ket e hêrezh.

¹⁵ Rak ar varnedigezh a vo hervez ar reizhder, hag an holl re a zo eeun a galon hec'h heulio.

¹⁶ Piv a savo evidon a-enep an dud fall? Piv a vo ganin a-enep ar vicherourien a zireizhder?

¹⁷ Ma ne vije ket bet an AOTROU va sikour, buan e vije aet va ene e lec'h ar sioulded.

¹⁸ Pa em eus lavaret: Risklet en deus va zroad, da vadelezh, o AOTROU, he deus va harpet.

¹⁹ Pa em boa kalz a soñjoù em diabarzh, da frealz en deus laouenaet va ene.

²⁰ Ha bez' e vefes sikourer tron ar fallentez, a ra direizhderioù a-enep al lezenn?

²¹ En em zastum a reont a-enep ene an den reizh, hag e kondaonont ar gwad didamall.

²² Met an AOTROU eo va repu uhel, va Doue eo roc'h va bodenn.

²³ Lakaat a raio da gouezhañ warno o direizhder, o distrujañ a raio dre o fallagriezh o-unan. An AOTROU hon Doue o distrujo.