Salmoù 91 - Bibl Koad 21: Ar Bibl e Brezhoneg evit ar Vretoned

Salm 91

¹ An hini a zo o chom e repu kuzhet an Uhel-Meurbet, a ziskuizh e skeud an Holl-C'halloudeg.

² Me a lavar d'an AOTROU: Va repu ha va c'hreñvlec'h! Va Doue, ennout emañ va fiziañs!

³ Eñ a saveteo ac'hanout eus roued al labousetaer, hag eus ar vosenn noazus.

⁴ Golo a raio ac'hanout gant e bluñv, hag ez po ur repu dindan e zivaskell. E wirionez a vo da skoed hag da hobregon.

⁵ Ne'z po ket aon rak spouronoù an noz, na rak ar bir a nij en deiz,

⁶ na rak ar vosenn a gerzh en deñvalijenn, na rak an distruj a sko da greisteiz.

⁷ Ra gouezho mil en da gostez, ha dek mil a-zehou dit, ne dostaio ket ouzhit.

⁸ Sellout a ri hepken gant da zaoulagad, hag e weli kastiz ar re zrouk.

⁹ Rak te eo va repu, o AOTROU! Eus an Uhel-Meurbet ec'h eus graet da vod.

¹⁰ Poan ebet ne dapo ac'hanout, gouli ebet ne dostaio ouzh da deltenn.

¹¹ Rak gourc'hemenn a raio d'e aeled kaout evezh ouzhit en da holl hentoù,

¹² dougen a raint ac'hanout etre o daouarn, gant aon na stokfe da droad ouzh ur maen.

¹³ Kerzhout a ri war al leon ha war an naer-wiber, mac'hañ a ri al leonig hag an aerouant.

¹⁴ Pa gar ac'hanon meurbet, eme an AOTROU, e tieubin anezhañ. Me en lakaio e surentez, dre ma'z anavez va anv.

¹⁵ Va aspediñ a raio hag e selaouin anezhañ, hag e vin gantañ en anken, hag en tenin ac'hane, hag e roin gloar dezhañ.

¹⁶ E leuniañ a rin a zeizioù hir, hag e tiskouezin dezhañ va dieubidigezh.