Salmoù 90 - Bibl Koad 21: Ar Bibl e Brezhoneg evit ar Vretoned

Salm 90

¹ Pedenn Moizez, den Doue. Aotrou, bet out deomp ur repu, a oad da oad.

² A-raok d'ar menezioù bezañ ganet, ha d'an douar ha d'ar bed bezañ krouet, a-viskoazh ha da viken ez out-te Doue.

³ Ober a rez d'an den distreiñ d'ar boultrenn, hag e lavarez: Mibien an dud, distroit!

⁴ Rak mil bloaz dirak da zaoulagad a zo evel an devezh dec'h pa'z eo tremenet, hag evel ur veilhadenn en noz.

⁵ O c'has a rez evel un huñvre, diouzh ar mintin emaint evel ur c'heotenn a dremen,

⁶ bleuniañ a ra d'ar mintin hag e weñv, d'abardaez e vez troc'het hag e sec'h.

⁷ Rak kuzumet omp gant da gounnar, ha spouronet gant da fulor.

⁸ Lakaet ec'h eus hon direizhder dirazout, hag hor pec'hedoù kuzhet dirak sklêrijenn da zremm.

⁹ Hon holl zeizioù a ya kuit dre da gounnar, peurechuiñ a reomp hor bloavezhioù evel un huanad.

¹⁰ Deizioù hor bloavezhioù a zeu da zek vloaz ha tri-ugent, hag evit ar re greñvañ da bevar-ugent vloaz. Hag ar c'haerañ eus an deizioù-se n'eo nemet poan ha trubuilh, rak tremen a ra buan hag ez eomp kuit.

¹¹ Piv a anavez nerzh da gounnar ha da vuanegezh, hervez an doujañs a zo dleet dit?

¹² Kelenn deomp kontañ niver hon deizioù, evit ma c'hellimp kaout ur galon fur.

¹³ Distro, AOTROU! Betek pegoulz? Bez truezus ouzh da servijerien!

¹⁴ Adalek ar mintin ro deomp hor gwalc'h eus da vadelezh, evit ma laouenaimp ha ma vimp leun a levenez a-hed hon deizioù.

¹⁵ Laouena ac'hanomp evit an deizioù ma ec'h eus hor glac'haret, hag ar bloavezhioù ma hon eus bet poanioù.

¹⁶ Ra vo diskouezet da oberenn da'z servijerien, ha da c'hloar war da vibien!

¹⁷ Ra vo madelezh an AOTROU hon Doue warnomp! Starta oberenn hon daouarn, ya, starta oberenn hon daouarn.