Salmoù 9 - Bibl Koad 21: Ar Bibl e Brezhoneg evit ar Vretoned

Salm 9

¹ D'ar mestr-kaner; salm David; war "Mutlabben".

² Meuliñ a rin an AOTROU eus kreiz va c'halon, lavarout a rin da holl vurzhudoù,

³ tridal ha laouenaat a rin ennout, hag e kanin da anv, o Doue uhel-meurbet!

⁴ Peogwir o deus kilet va enebourien en a-dreñv, e kouezhint hag e varvint dirak da zremm.

⁵ Rak roet ec'h eus din va gwir, va c'haoz ac'h eus difennet, azezet out war da dron, te barner reizh.

⁶ Kastizet ec'h eus ar broadoù, distrujet ec'h eus an hini drouk, o anv ac'h eus diverket dalc'hmat ha da viken.

⁷ Da enebourien? Un diskar ez int deuet da vezañ! Distrujet ec'h eus o c'hêrioù, rasket eo o eñvor.

⁸ An AOTROU a ren da viken. Kempenn a ra e dron a-benn ar varnedigezh.

⁹ Barn a raio ar bed gant reizhder, barn a raio ar pobloù gant eeunder.

¹⁰ An AOTROU a zo ur repu evit an hini gwasket, ur repu en amzer an estrenvan.

¹¹ Ar re a anavez da anv a fizio ennout, rak ne zilezez ket ar re a glask ac'hanout, o AOTROU!

¹² Kanit d'an AOTROU a zo o chom e Sion, disklêriit e oberoù bras e-touez ar pobloù,

¹³ rak veñjiñ a ra ar gwad skuilhet, soñj en deus anezhañ, n'ankounac'ha ket kriadenn ar re c'hlac'haret.

¹⁴ Az pez truez ouzhin, o AOTROU! Gwel ar glac'har o deus graet din va enebourien, te hag a laka ac'hanon da adpignat eus dorioù ar marv,

¹⁵ evit ma embannin da holl veuleudioù ouzh dorioù merc'h Sion, ha ma laouenain ez silvidigezh.

¹⁶ Ar broadoù a zo kouezhet er poull o doa graet, o zroad a zo bet tapet er roued o doa kuzhet.

¹⁷ An AOTROU a zo en em roet da anavezout, graet en deus ar varnedigezh, an hini drouk a zo en em ereet e labour e zaouarn.  Seniñ-binvioù. Ehan

¹⁸ Ar re zrouk a gilo betek lec'h ar marv, hag an holl vroadoù a ankounac'ha Doue.

¹⁹ Rak ar paour ne vo ket ankounac'haet evit atav, ha gortoz ar re c'hlac'haret ne vo ket kollet da viken.

²⁰ Sav, AOTROU! Ra ne startaio ket an den, ra vo ar broadoù barnet dirak da zremm.

²¹ Skuilh warno ar spont, o AOTROU! Ra ouezo ar pobloù n'int nemet tud!  Ehan